2017ལོའི་ཟླ་4པའི་ཚེས་24ཉིན་ནས་དར་མདོ་ལ་ཁ་བ་ཆེན་པོ་བབས་པ་དང་། ཁྱད་པར་དུ་སྤྱི་ཟླ་4པའི་ཚེས་26གི་དགོང་མོ་ལ་ཁ་བ་ཆེན་པོ་བབས་ཏེ། རྒྱལ་ལམ་318ཀྱི་རྒྱུ་ལའི་ལམ་རྒྱུད་གངས་ཀྱིས་འགག་པ་དང་། རླངས་འཁོར་དང་མི་མང་པོ་རི་མགོར་ལུས་ནས་ལམ་འགྲོ་བའི་འགྲོ་འོང་ལ་བར་ཆད་ཆེན་པོ་བཟོས། དེར་བརྒྱུད་པའི་ཡུལ་སྐོར་བ་དང་ཉེ་འཁོར་གྱི་ཞིང་འབྲོག་མི་དམངས་ཀྱི་བདེ་ཐང་འགན་སྲུང་ཆེན་དུ། ཁུལ་དང་རྫོང་（གྲོང་ཁྱེར）གི་འགོ་ཁྲིད་ཀྱིས་མཐོང་ཆེན་མཛད་དེ། འབྲེལ་ཡོད་སྡེ་ཁག་རྩ་འཛུགས་བྱས་ནས་མགྱོགས་མྱུར་ངང་རོགས་སྐྱོར་དང་ལམ་གཤོང་བའི་ཞབས་ཞུའི་ལས་ཀའི་འགོ་བརྩམས།
དཀར་མཛེས་ཁུལ་གཞུང་ལམ་ཅུས་ཀྱིས་ཁ་བ་གཙང་ཕྱགས་ཀྱི་ཇུས་གཞི་གཏན་ཁེལ་བྱས་ཏེ། མི་སྣ་དང་འཕྲུལ་ཆས་སྒྲིག་འཛུགས་བྱས་ནས་ལས་གཞིའི་འགོ་བརྩམས། དཀར་མཛེས་ཁུལ་གནམ་གཤིས་བརྟག་དཔྱད་ས་ཚིགས་ཀྱིས་ཆེད་དུ་གནམ་གཤིས་ཀྱི་ཆ་འཕྲིན་ཐེངས་གསུམ་ལ་ཁྱབ་བསྒྲགས་བྱས།
