ཨོྃ་སྭ་སྟི། །སྐུ་གསུམ་རྒྱལ་བའི་ཞིང་གི་མཁྱེན་བརྩེའི་དཔལ། མ་ལུས་འགྲོ་བའི་གཉེན་གཅིག་ཐུབ་ཆེན་དེས། །ལེགས་གསུང་བརྒྱད་ཁྲི་བཞི་སྟོང་ཆོས་ཕུང་གིས། །ཡོངས་སུ་བལྟམས་པར་བཤེས་གཉེན་སྐུ་སྣང་བའི། །ངེས་གསང་བླ་མེད་ཐེག་པ་མཆོག་གི་རྩེར། གྲུབ་པའི་དབང་ཕྱུག་འཕྲིན་ལས་རྡོ་རྗེ་ཡིས། །གདམས་པའི་ཞལ་གསུང་མཁའ་འགྲོའི་ཁ་རླངས་ཀྱིས། །བྱིན་རློབས་དངོས་གྲུབ་སྙིང་ལ་འཕོས་པའི་མོད། །མདོ་རྒྱུད་གཞུང་གི་ཟབ་དོན་དགོངས་པའི་བཅུད། གོ་ཡུལ་ཙམ་གྱི་སྣང་བའི་ཤེས་རབ་ཀྱིས། །ངེས་པར་འདྲོངས་པའི་སྤོབས་པ་སྐྱེས་གྱུར་བས། །དྲང་པོའི་ངག་གིས་ལམ་ནས་བརྗོད་པར་སྤྲོ། །སྣ་ཚོགས་སྣང་བའི་ཀུན་རྫོབ་ཆོས་འདི་ཀུན། །བརྟགས་ཤིང་དཔྱད་ན་རྡུལ་ཙམ་མ་གྲུབ་པས། །བརྟག་མཁན་རང་གིས་ངོ་བོ་ལ་བལྟས་ཀྱང་། །རྗེས་མེད་ནམ་མཁའི་དབྱིངས་སུ་ཐིམ་པར་འགྱུར། དེ་ལྟར་སྣང་ཙམ་ཉིད་ནས་སྟོང་གྱུར་ཏེ། །སྟོང་ཙམ་ཉིད་ནས་སྣང་བ་འགགས་མེད་དུ། །རྟེན་འབྲེལ་སྒྱུ་མའི་རང་བཞིན་གང་སྣང་བ། །སེམས་ཉིད་གསལ་བའི་རང་གདངས་ལས་མ་འདས། །འདི་ལ་དགོངས་ནས་ཀླུ་སྒྲུབ་སྙིང་པོ་ཡིས། །མཐའ་བཞི་བརྒྱད་དང་སྤྲོས་པ་སོ་གཉིས་སོགས། རིགས་ཚོགས་རྣམས་སུ་དངོས་བསྟན་སྟོང་ཉིད་ཀྱིས། རྒྱལ་ཡུམ་བཀའ་ཡི་དགོངས་པ་རྣམ་པར་བཀྲ། །ལྔ་རིག་པཎ་ཆེན་ས་སྐྱའི་འཇམ་མགོན་གྱིས། །ཕ་རོལ་ཕྱིན་པའི་ལྟ་བ་ལས་ལྷག་པའི། །ལྟ་ཞིག་མེད་ཅེས་རླུང་ལྟར་གྲགས་པ་དེ། །དགོངས་གཞི་སྤྲོས་བྲལ་འདི་ཉིད་ཁོ་ན་ལ། དགོངས་པ་མདོ་སྔགས་སྤྱི་ལ་ཁྱབ་པར་བཞེད། །དེ་ལྟར་གྲུབ་མཐའ་སྨྲ་བར་རྣམ་བཞི་ཡིས། །རང་རང་ཐེག་པའི་ལྟ་ལ་ཞེན་གྱུར་ཏེ། །རྟག་ཆད་སྤང་བའི་དམ་བཅའ་མི་འདོར་བས། །གཞི་ལམ་འབྲས་བུའི་རྣམ་བཞག་ཐ་དད་འདོད། །དོན་སྨྲ་སྡེ་གཉིས་འདོད་ཚུལ་གཅིག་མཐུན་གྱིས། གཟུགས་ཤེས་མཐར་ཐུག་དོན་དམ་བདེན་པ་ནི། ཆ་མེད་གཉིས་ཀྱིས་རག་པ་རྩོམ་པའི་གཞི། །བདེན་གྲུབ་ཆོས་སུ་སྨྲ་བར་ཁས་འཆེས་པས། །དེ་ཉིད་སློབ་དཔོན་ཆེན་པོ་དབྱིག་གཉེན་གྱིས། །རྩོམ་གཞི་མེད་པར་རྩོམ་ཆོས་མི་གྲུབ་པས། །ཆ་མེད་ཤེས་པ་རང་རིག་ཙམ་དུ་བསྒྲུབས། །རྣམ་རིག་གྲུབ་མཐའི་ལྟ་བའི་འདོད་ཚུལ་ནི། །ཀུན་བཏགས་ཡུལ་གྱི་སྣང་བར་སྣ་ཚོགས་པ། །གཞན་དབང་གཉིས་སྟོང་ཤེས་ཉིད་ཁོ་ན་འདི། །ཆོས་ཉིད་ཡོངས་གྲུབ་དོན་དམ་བདེན་པ་འདོད། །ཕྱི་ནང་སྣང་བའི་དངོས་པོ་འདི་ཀུན་ཀྱང་། །རྨི་ལམ་རྟ་གླང་སྐྲ་ཤད་སྣང་བ་ལྟར། །བདེན་མེད་ནང་གི་བག་ཆགས་ཁྱད་པར་ལས། །གནས་དོན་ལུས་ཀྱི་སྣང་བ་སྣ་ཚོགས་སྨིན། ཕྱི་དོན་རང་བཞིན་མེད་པའི་ལྟ་བ་ལ། །སེམས་ཉིད་ཡུལ་དུ་བག་ཆགས་ཀྱིས་སྣང་བས། །རང་རིག་བདེན་པའི་ཚད་ལ་མངོན་ཞེན་པའི། །སེམས་ཙམ་གྲུབ་མཐའི་ལྟ་བ་འདི་ཡང་རྨད། །གཉིས་སྟོང་ཤེས་པའི་བདེན་འཛིན་མ་སྤང་བར། །གཉིས་མེད་ཡེ་ཤེས་རྟོགས་པར་མི་འགྱུར་བས། །ཡང་དག་ལམ་གྱི་གེགས་སུ་གྱུར་པར་ཡིས། སྲིད་པའི་སྡུག་བསྔལ་ཞི་བར་རིང་དུ་གྱུར། །རིགས་པའི་རྒྱལ་པོ་ཐེག་མཆོག་དབུ་མ་དེས། །རྣམ་རིག་ལྟ་བའི་བདེན་འཛིན་ཞེན་ཡུལ་བཅས། །ཐལ་འགྱུར་གཏན་ཚིག་རྣམ་བཞིའི་མཇིལ་བར་ཡིས། གསལ་རིག་བདེན་མེད་སྟོང་པའི་དབྱིངས་སུ་འདེབས། །དེ་ལྟར་ཆོས་ཀུན་སྟོང་པའི་ངང་ཉིད་ལས། །མ་འགགས་གསལ་སྣང་རྟེན་འབྲེལ་གང་སྣང་བར། །ཟུང་འཇུག་རོ་གཅིག་མངོན་པར་བྱང་ཆུབ་སྟེ། །སྣང་སྲིད་གདོད་ནས་སྐྱེ་མེད་རྟོགས་པར་གྱུར། །སྤྲོས་བྲལ་བདེ་བར་ཆེན་པོའི་རང་བཞིན་ནི། །སྙིང་རྗེའི་རྩི་དང་འབྲལ་མེད་རྟག་ཁྱབ་ཀྱིས། །མཁའ་དང་མཉམ་པའི་འགྲོ་ལ་དམིགས་མེད་ངང་། །ཚད་མེད་ཕན་བདེའི་ཕྲིན་ལས་སྣ་ཚོགས་བསྒྲུབས། །འཁོར་འདས་བཟང་ངན་བདེ་སྡུག་སྣང་བ་ཀུན། །གདོད་ནས་མ་སྐྱེས་རང་བཞིན་གྱིས་སྟོང་སྟེ། །སྐྱེ་མེད་དོན་ལ་བཟོད་པ་ཐོབ་གྱུར་ན། །འཁོར་བ་སྡུག་ཀུན་མིང་གི་ལྷག་མར་ངེས། །དེ་སྐད་གྲུབ་མཐའ་རྣམ་བཞིའི་ཆུ་ཀླུང་ལས། །རིག་པའི་རླབས་ཕྲེང་འཐོར་བའི་ཟེག་མ་འདི། ། མཁྱེན་དཔྱོད་ཡངས་པའི་རྒྱ་མཚོར་འདྲེན་པར་ཡིས། །ཤེས་བྱའི་གནས་ལུགས་ཕ་མཐའ་རྒལ་བར་སྨོན། །བར་སྐབས་ཀྱི་ཚིགས་སུ་བཅད་པའོ། ༑
རྡོ་རྗེ་འཆང་དངོས་འཇམ་མགོན་བླ་མ་ཡིས། །རྒྱུད་སྡེ་རྒྱ་མཚོའི་དཀྱིལ་འཁོར་ཞལ་ཕྱེས་ཏེ། །སྨིན་གྲོལ་གདམས་པའི་བཅུད་ཀྱིས་ཡོངས་བཟུང་ནས། །སྡུག་ཀུན་སྐུ་དང་ཡེ་ཤེས་ཕྱག་རྒྱས་བཏབ། རྡོ་རྗེ་ཐེག་པའི་ལམ་གྱི་འཇུག་སྒོ་ནི། །དཀྱིལ་འཁོར་ཆེན་པོ་ཉིད་ལས་འཇུག་པ་ཡིས། །མཚན་ལྡན་བླ་མ་བརྒྱུད་པ་མ་ཉམས་པར། དབང་གིས་བརྒྱུད་སྨིན་དམ་ཚིག་ལ་གནས་པས། །གསང་སྔགས་ཕྱི་ནང་རྟེན་འབྲེལ་ལམ་བྱེད་ཡིན། །དེ་ནས་རྒྱུད་སྡེ་བཞི་ཡི་རྣམ་བཞག་དང་། །དབྱེ་བ་ལ་སོགས་སོ་སོའི་ཁྱད་པར་རྣམས། །རང་བློའི་གང་འཚམས་བརྗོད་པར་འདོད་གྱུར་པས། །ལྷ་དང་བླ་མས་གནང་བར་སྩལ་དུ་གསོལ། །བྱ་བའི་རྒྱུད་ལ་དབྱེ་ན་རྣམ་གསུམ་སྟེ། །དོན་ཡོད་ཞགས་དང་དམ་ཚིག་གསུམ་བཀོད་དང་། །ལེགས་པར་གྲུབ་པ་གསུམ་གྱི་ཁྱད་པར་ནི། །ཕྱོགས་མཚོན་ཙམ་ཡིན་དོན་ཞགས་ལ་སོགས་ནི། །དབང་བསྐུར་བ་དང་སེམས་བསྐྱེད་མ་ཐོབ་ཀྱང་། །སྙུང་གནས་སྡོམ་ཆོག་ལ་སོགས་ནོད་ནུས་ན། །གང་ཟག་ཀུན་ལ་ཕན་བདེའི་གཞི་གྱུར་བས། །བསྒྲུབ་པར་རིགས་ཞེས་ས་སྐྱ་པཎ་ཆེན་གསུང་། །དམ་ཚིག་གསུམ་བཀོད་ལ་སོགས་བསྒྲུབ་ཆོག་ནི། །འཇུག་པ་སེམས་བསྐྱེད་ཐོབ་པའི་གང་ཟག་གིས། །ཕྲིན་ལས་འགའ་ཞིག་བསྒྲུབ་བ་བྱ་བའི་ཕྱིར། །ཆོ་ག་ཤེས་པར་གྱུར་ན་གནང་བར་སྩལ། །ལེགས་པར་གྲུབ་པ་ཡན་ཆད་རྒྱུད་རྣམས་ཀུན། །ཡང་དག་དབང་གིས་སྨིན་པར་མ་གྱུར་བར། །སེམས་སྐྱེད་ཙམ་གྱི་ལས་ལ་འཇུག་པ་དེར་། །ཆོ་ག་ཤེས་ཀྱང་གསང་སྔགས་སྦྱིན་མི་བྱ། །བྱ་བའི་རྒྱུད་ལ་བདག་བསྐྱེད་ཡོད་མ་ཡིན། །མདུན་བསྐྱེད་བྲིས་སྐུ་ལ་སོགས་ལྷ་བསྒོམས་ནས། །དཀའ་ཐུབ་གཙང་སྦྲས་སངས་རྒྱས་མཉེས་གྱུར་ན། །རྗེ་ཁོལ་ལྟ་བུའི་དངོས་གྲུབ་ལེན་ཞེས་གསུང་། །དོན་དམ་བདག་དང་ལྷ་གཉིས་མཉམ་ཉིད་ངང་། །ཀུན་རྫོབ་རྟེན་འབྲེལ་བསླུ་མེད་ཟུང་འཇུག་གིས། །ལྷ་སྐུའི་ཞལ་ཕྱག་མཚན་མ་སྔགས་སོགས་ལ། །ཚུལ་བཞིན་སྒྲུབ་ཐབས་ལྟར་བགྱིད་འབད་ནུས་ན། །ཐབས་ཀྱིས་མྱུར་བར་ཉིད་དུ་བདག་ཉིད་དེར། །གསེར་འགྱུར་རྩི་ཡིས་ལྕགས་གསེར་སྒྱུར་བྱེད་ལྟར། །ལྷ་ཡི་ངོ་བོ་རྫོགས་སངས་རྒྱས་ཞེས་བཞེད། །དེ་ལས་ལྟ་དགོངས་གོང་དུ་འཕེལ་བ་ཡིས། །བདག་ཉིད་དམ་ཚིག་པ་དང་ཡེ་ཤེས་པའི། །ལྷ་གཉིས་མཉམ་པར་གྲོགས་པོའི་ཚུལ་ལྟ་བར། །རྗེས་སུ་མཐུན་པར་སྤྱོད་པའི་རྒྱུད་ཅེས་བྱ། །ཕྱི་ཡིས་ཁྲུས་དང་ནང་གི་གཙང་སྦྲ་སོགས། །སྤྱོད་པར་སྤྱོད་རྒྱུད་སྒྲུབ་ཐབས་ལྟར་བགྱིས་ཏེ། །བསྒོམ་པ་རྣལ་འབྱོར་རྒྱུད་དང་མཐུན་པར་ཡིས། གཉིས་ཀའི་རྒྱུད་ཀྱི་ཐེག་པ་ཞེས་ཀྱང་བྱ། །རྣལ་འབྱོར་རྒྱུད་ཀྱིས་ཕྱི་རོལ་དངོས་རྣམས་ལ། །དམིགས་པའི་རྐྱེན་ཙམ་ཉིད་ལས་ལྟ་སྟངས་ཀྱིས། །བདག་ཉིད་དམ་ཚིག་སེམས་དཔའ་ལྟ་བ་ཡིས། །ཡེ་ཤེས་འཁོར་ལོ་སྤྱན་འདྲེན་གཞུག་པར་མཛད། །དེ་ནས་ཇི་སྲིད་ཕྱག་རྒྱ་མ་བཀྲོལ་བར། །དེ་ཡིས་བར་དུ་སངས་རྒྱས་བཞུགས་ཅེས་གསུང་། །ཕྱག་རྒྱ་བཀྲོལ་ནས་ཡེ་ཤེས་པ་གཤེགས་ཚེ། །རང་ཉིད་ཐ་མའི་ངང་ལས་གནས་ཞེས་གསུང་། །བདེན་གཉིས་ཟུང་དུ་འཇུག་པའི་ལྟ་བ་ཡིས། །ངེས་པར་དྲོངས་བའི་བློ་ཡིས་ཁྱད་པར་ལས། །བདག་མདུན་དབྱེར་མེད་ཆུ་ལ་ཆུ་བཞག་ལྟར། །བདག་ཉིད་ལྷ་དང་ཐ་དད་མེད་པ་ཡིས། །མཐོང་བའི་ལྟ་བ་རྗེས་སུ་མཐུན་པར་ལ། །ཕྱི་ཡི་སྤྱོད་པའི་བྱ་བར་མ་ལྟོས་པས། །ནང་གི་རྣལ་འབྱོར་ཁོ་ནར་བསྟེན་པ་ཡིས། །རིགས་ལྔའི་སངས་རྒྱས་འགྲུབ་པར་འགྱུར་ཅེས་གསུང་། །དེ་ལྟར་བྱ་སྤྱོད་རྣལ་འབྱོར་རྒྱུད་གསུམ་ལས། །ཀུན་རྫོབ་ལྷ་རུ་ལྟ་བ་མ་གསུངས་ནའང་། །ཀུན་རྫོབ་ཆོས་ཀུན་ཇི་ལྟར་སྣང་བ་ཡིས། །བྲིས་སྐུ་ལྷ་རུ་བསྒོམས་པར་ཐབས་ཀྱི་ཁྱད་། །བྱ་བའི་རྒྱུད་ལ་ཆུ་དང་ཅོད་པན་དབང་། །སྤྱོད་རྒྱུད་གོང་ཉིད་གཞི་བཞག་རྡོ་དྲིལ་དང་། །མིང་གི་དབང་སྟེ་རྣལ་འབྱོར་རྒྱུད་ལ་ནི། །དེའི་སྟེང་ཕྱིར་མི་ལྡོག་པར་འཁོར་ལོའི་དབང་། །དེ་ལྟར་སྒྲུབ་ཐབས་གང་དང་གང་ལ་ཡང་། །རང་རང་རྒྱུད་ཀྱི་ལྟ་སྤྱོད་དང་མཐུན་པར། །ཆོ་གའི་རིམ་པར་མ་ཉམས་སྒྲུབ་པར་ཡིས་། །སྦྱོར་དངོས་རྗེས་ཀྱི་ལས་ལ་འཇུག་པར་གཅེས། །ཀུན་རྫོབ་དག་པར་ལྷ་ཡི་དཀྱིལ་འཁོར་རུ། དོན་དམ་དབྱེར་མེད་རོ་གཅིག་མཉམ་པའི་ངོར། །བསྐྱེད་རྫོགས་ཟུང་འཇུག་རིམ་གཉིས་རྣལ་འབྱོར་ཆེ། །རྣམ་ཀུན་མཆོག་ལྡན་བླ་མེད་ཐེག་པ་བཞེད། །དེ་ནས་སྨིན་བྱེད་དབང་གིསརིམ་པ་ལ། བུམ་གསང་ཤེས་དང་བཞི་པ་དབང་གིས་ཁྱད། །གྲོལ་བྱེད་ཁྲིད་ལ་བསྐྱེད་རྫོགས་ཟུང་འཇུག་གསུམ། །རྒྱུད་སྡེ་འོག་མ་གསུམ་ལ་མེད་པའི་ཕྱིར། །རྣལ་འབྱོར་ཆེན་པོའི་རྒྱུད་ཀྱི་ཁྱད་ཆོས་སོ། །དེ་ལ་དབྱེ་ན་ཕ་རྒྱུད་མ་རྒྱུད་དང། །གཉིས་མེད་རྒྱུད་ཅེས་ནང་གསེས་གསུམ་ཕྱེསཏེ། །ཐབས་དང་ཤེས་་རབ་གཉིས་སུ་མེད་པའི་ཆ། །སོ་སོར་གཙོ་འདོན་དབྱེ་བ་ཙམ་དུ་ཟད། །ནང་གིས་རྡོ་རྗེའི་ལུས་ཀྱི་རྩ་ཡིག་ཁམས། །ཕུང་ཁམས་སྐྱེ་མཆེད་སྐུ་དང་ཡེ་ཤེས་སུ། །གདན་གསུམ་ལྷ་ཡི་དཀྱིལ་འཁོར་དབང་བསྐུར་ཏེ། །བསྐྱེད་རིམ་གསལ་སྣང་ཐོན་པར་བྱིན་གྱིས་རློབས། །བདེ་སྟོང་ཟུང་འཇུག་ཤེས་རབ་དགའ་མའི་ཡུམ། །ཁ་སྦྱོར་བདུན་ལྡན་དབབ་གཟུང་ལྡོག་ཁྱབ་ཀྱིས། བྱང་སེམས་ཐབས་ཀྱིས་བསྐུལ་བའི་ཕོ་ཉ་ཡིས། །དགའ་བཞིའི་ཡེ་ཤེས་སྐྱེ་བར་བྱིན་གྱིས་རློབས། །གདོད་ནས་རྣམ་དག་ཆོས་དབྱིངས་ནམ་མཁའི་ཀློང་། །རང་སྣང་འོག་མིན་ལོངས་སྤྱོད་རྫོགས་སྐུའི་ཞིང་། །ཐུགས་རྗེའི་རྩལ་སྣང་མ་འགགས་སྤྲུལ་པའི་སྐུ། །སྐུ་གསུམ་འདུ་འབྲལ་མེད་པར་བྱིན་གྱིས་རློབས། །དེ་སྐད་མདོ་རྒྱུད་གཞུང་གིས་ལྟ་བའི་གནད། །ཕྱོགས་མཚོན་ཙམ་དུ་བརྗོད་པའི་དགེ་བ་ཡིས། །མ་གྱུར་འགྲོ་ཀུན་སྲིད་མཚོ་ལས་སྒྲོལ་ཏེ། །ཡང་དག་ལྟ་བར་རྟོགས་པའི་རྒྱུ་གྱུར་ཅིག །འོན་ཀྱང་འགལ་འཁྲུལ་ཉེས་སྐྱོན་དྲི་མའི་ཚོགས། ནོངས་པ་གང་མཆིས་་དཀོན་མཆོག་རྩ་གསུམ་དང། ཡི་དམ་རྒྱུད་སྡེ་བཞི་ཡིས་ལྷ་ཚོགས་ལ། །མི་འཆབ་མི་སྦེད་མཐོ་བཤགས་བཟོད་པར་གསོལ། །སླར་སྨྲས་པ། །དྲི་མེད་སེམས་ཀྱི་ངང་མདངས་པད་མའི་རྫིང་། །དྭངས་གཙང་འཆར་ཀའི་རང་གཟུགས་ལྷག་བསམ་གྱིས། །ལྟོས་བཅས་འདོད་ཡོན་རོལ་བའི་བྷྲ་མ་ར། །སྲིད་པའི་འདམ་རྫོབ་འདབ་བརྒྱའི་སྦུབས་སུ་འཐུམ། །ཀུན་གཞི་སྲིད་པའི་གྲོང་ཁྱེར་ལ་ཞུགས་ནས། །ཚོགས་བརྒྱད་གཡེང་བའི་ལམ་དུ་རྒྱུ་བ་ཡིས། །མ་རིགས་གདོན་གྱིས་བཟུང་བའི་རྒྱལ་ཁམས་སུ། མཐའ་མེད་འཁྱམས་པའི་སེམས་ཀྱི་བུ་ཆུང་སྐྱོ། །ཆོས་བརྒྱད་ཆོས་སུ་རློམ་པས་ལམ་གོལ་ཏེ། །རེ་དོག་འཕྲང་གིས་གཡང་སར་འགྲིམ་པ་ཡིས། །རྨོངས་པས་བསླུས་པའི་ལས་ངན་འགྲོ་འདི་དག །བླ་མའི་ཐུགས་རྗེའི་ལྕགས་ཀྱུས་བཟུང་དུ་གསོལ། །
