ལང་ཚོའི་འཚོལ་སྙེགས། དཀོན་རྡོས་པར་བླངས།
青春的憧憬

ཉིན་གཅིག་བྲེལ་བས་འདུར་བའི་ངལ་དུབ་རང་མྱོང་མཐར།།

ཞེ་བློ་བདེ་ལ་ལྷོད་དེ་རྒྱ་ཇ་ཞིག་འཐུང་བཞིན།།

བྱེའུ་ཚང་རྡོ་ཡིས་འུར་འདྲའི་སློབ་ར་ལ་གྱེར་ན།།

མི་ཚེའི་ལྷིང་འཇགས་ཟད་པའི་སྣང་བ་ཞིག་སྐྱེས་བྱུང་།།

སྦྱོང་གཞིའི་དཔེ་མང་སྤུངས་བའི་གཞུང་ལས་ལ་བྲེལ་བཞིན།།

སེམས་ཀྱི་ངལ་གསོ་ཐོབ་པའི་གྲུ་ཟུར་ཞིག་བཙལ་ཡང་།།

ལས་གྲོགས་བུད་མེད་དག་གི་ཁ་སྟབས་ལ་ཉན་ན།།

ད་དུང་ཅི་ཞིག་ལྷག་པའི་སྣང་བ་ཞིག་སྐྱེས་བྱུང་།།

ཡིད་ཀྱི་གནོན་ཤུགས་སངས་པའི་དུ་རྐང་ཞིག་འཐེན་བཞིན།།

ཕྱོགས་བཞིར་རྣ་བ་བླགས་ཤིང་མནོ་བསམ་རེ་བཏང་སྟེ།།

སློབ་མར་ཁ་ཕྱོགས་འཚམ་པའི་ཁྲིད་བྱ་ཞིག་བཙལ་ཡང་།།

དོན་གྱི་བརྗོད་བྱས་སྟོང་པའི་སྣང་བ་ཞིག་སྐྱེས་བྱུང་།།

སློབ་མར་སྐར་གྲངས་ཞན་ཚེ་དབྱུག་པ་ཡིས་གཅར་བཞིན།།

སློབ་དེབ་ལྟ་ཀློག་ཁོ་ནའི་འབད་བརྩོན་ལ་བསྐུལ་ཡང་།།

རྒྱུགས་འབྲས་དང་པོར་འཛིན་པའི་ལས་ཀ་དེ་བསམ་དུས།།

དགེ་རྒན་གཤེད་མ་ཡིན་པའི་སྣང་བ་ཞིག་སྐྱེས་བྱུང་།།

རང་ཆེ་རང་མཐོ་སྟོན་པའི་སྐྱིད་སྣང་ཞིག་ཤར་བཞིན།།

གཤིས་བཟང་སློབ་བུའི་མགོན་དུ་དགེ་རྒན་དུ་འཚང་ཡང་།།

སློབ་གསོའི་ལག་ལེན་འཆུག་པའི་འགལ་འདུ་དེ་མཐོང་ཚེ།།

ཀླད་ཆུང་རང་མཚང་ཡིན་པའི་སྣང་བ་ཞིག་སྐྱེས་བྱུང་།།

སྔ་ལངས་ཕྱི་ཉལ་བྱེད་པའི་ལྷག་བསམ་དེ་སྐྱོང་བཞིན།།

ཕན་པའི་གྲུབ་འབྲས་འཚོལ་ལ་འདུར་རྒྱུག་རང་བྱས་ཀྱང་།།

ངལ་བའི་འབྲས་བུ་མེད་པའི་ལས་ཀ་དེ་བསམ་ཚེ།།

སེམས་པ་ཨ་ཐང་ཆད་པའི་སྣང་བ་ཞིག་སྐྱེས་བྱུང་།།

མཐོ་དམན་ལས་གྲོགས་ཀུན་ལ་མཐུན་ཐབས་རང་བརྩོན་བཞིན།།

རང་གཤིས་རྣལ་མ་མངོན་པའི་མི་གཞི་ཞིག་སྲུང་ཡང་།།

ཁ་ཡག་ཁོག་ཚེར་ཅན་གྱི་གྲོགས་ངན་དག་མཐོང་དུས།།

ངུ་དགོད་འདྲེས་མའི་སྣང་བ་བཅོས་མིན་དུ་སྐྱེས་བྱུང་། །