ཟུང་ཆུ་རྫོང་གིས་སྐད་གཉིས་སློབ་གསོར་ཤུགས་སྣོན་བྱས་པ།
ཐེངས་འདིའི་གསབ་སྦྱོང་ཚོགས་འདུ་ལ་རྣམ་པ་རྒྱ་ཆེ་ཞིང་རིམ་པ་མཐོ་ལ། ཁ་གཏད་རང་བཞིན་ཤུགས་ཆེ་བ་སོགས་ཀྱི་ཁྱད་ཆོས་ལྡན་ཅིང་། རྔ་བ་ཁུལ་ཁྲིད་ཚན་སུའོ་ཡི་སུའོ་ཀྲང་གཞོན་པ་འཇམ་དབྱངས་བཀྲ་ཤིས་དང་ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ་འབུམ་སྐྱབས་གཉིས་ཆེད་དམིགས་ཀྱིས་གདན་དྲངས་ཡོད་ལ། རྫོང་གི་སློབ་གྲྭ་སོ་སོ་ནས་ཡོང་བའི་དགེ་རྒན་120ལྷག་ཀྱང་ཐེངས་འདིའི་གསབ་སྦྱོང་ལ་ཞུགས་ཡོད།
དེའི་འཕྲོར། དགེ་རྒན་ཆེན་མོ་འབུམ་སྐྱབས་ཀྱིས་ཆེད་དོན་འཆད་ཁྲིད་གནང་། ཁོང་གིས་ཐོག་མར་ཟུང་ཆུའི་སྐད་གཉིས་སློབ་གསོའི་ཀྱག་ཀྱོག་གི་འཕེལ་རྒྱས་བརྒྱུད་རིམ་དང་གྲུབ་འབྲས་ཉམས་དགའ་བ་བླངས་པ་ལ་ཕྱིར་རྟོག་བྱས་ཤིང་། དེའི་རྗེས་སུ་དེང་གི་སྐབས་སུ་སྐད་གཉིས་དགེ་རྒན་རྣམས་རང་གི་བྱ་བར་དགའ་ཞེན་ཇི་ལྟར་བྱེད་དགོས་པ་དང་། སློབ་ཁྲིད་དང་སློབ་མ་གསོ་སྐྱོང་ལ་དགའ་ཞེན་ཇི་ལྟར་བྱེད་པ་སོགས་ཀྱི་ཐད་བློ་རྒྱུ་མས་མ་བསྐུམ་པར་བསམ་བློའི་མཛུབ་སྟོན་གནང་། མཇུག་ཏུ། ཁོས་བོད་རིག་པའི་ངོས་ནས་གོ་ལ་ཧྲིལ་བོས་བོད་ཀྱི་རིག་གནས་ལ་མཐོང་ཆེན་དང་། རྒྱུད་འཛིན་དང་དར་སྤེལ་སོགས་ཀྱི་ཐད་ལ་དབྱེ་ཞིབ་ཁ་གསལ་བ་བྱས།
ཚེས་3གྱི་སྔ་དྲོར། དགེ་རྒན་ལི་ཞའོ་ལིས་སྐད་གཉིས་དགེ་རྒན་རྣམས་ཀྱིས་སློབ་ཁྲིད་གྲོས་གཞི་ཆུང་ངུའི་རིགས་ཇི་ལྟར་བཟོ་ཚུལ་གྱི་ཐད་ནས་ཆེད་དོན་འཆད་ཁྲིད་གནང་ཞིང་། མཇུག་མཐར། ཟུང་ཆུ་རྫོང་སློབ་གསོ་ཅུས་ཀྱི་ཅུའུ་ཀྲང་གཞོན་པ་ཐེན་པའོ་ཏན་གྱིས་ཐེངས་འདིའི་གསབ་སྦྱོང་ཚོགས་འདུ་ལ་གདེང་འཇོག་ཚད་མཐོན་པོ་གནང་ཞིང་ཟུང་ཆུ་རྫོང་གི་2017ལོའི་སྐད་གཉིས་དགེ་རྒན་གསབ་སྦྱོང་སྐབས་གསུམ་པ་ཡོངས་སུ་མཇུག་རྫོགས་པ་ཁྱབ་བསྒྲགས་བྱས།།