བོད་བརྒྱུད་ནང་བསྟན་ལས་རིགས་ཀྱི་མི་སྣས་བླ་སྤྲུལ་ཡང་སྲིད་སྐོར་གྱི་ཆེད་དོན་འགྲེམས་སྟོན་ལ་གཟིགས་པ།
ཡོང་ཁུངས། ཀྲུང་གོའི་བོད་ལྗོངས་དྲ་བ།
སྤེལ་དུས།: ༢༠༡༧ ལོའི་ཟླ་ ༡༡ ཚེས་ ༢༧
འགྲེམས་སྟོན་གཟིགས་རྗེས། པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་མཆོག་ནས་བོད་བརྒྱུད་ནང་བསྟན་གྱི་བླ་སྤྲུལ་རིམ་བྱོན་དག་ལ་ཆོས་ལུགས་ཀྱི་མཁྱེན་རྒྱ་ཟབ་མོ་ཡོད་པ་ཙམ་མ་ཟད། རྒྱལ་ཁབ་གོང་བུ་གཅིག་གྱུར་དང་། སྐབས་དེའི་སྤྱི་ཚོགས་དར་རྒྱས་དང་བརྟན་ལྷིང་གི་ཐད་ལེགས་སྐྱེས་གལ་ཆེན་ཕུལ་ཡོད་པས། རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་ཡང་གཏོད་ཡོད་ཅེས་གསུངས།
《བོད་བརྒྱུད་ནང་བསྟན་བླ་སྤྲུལ་གྱི་ཡང་སྲིད་དོ་དམ་བྱ་ཐབས》ཞེས་པ་རྒྱལ་ཁབ་ཆོས་ལུགས་ལས་དོན་ཅུས་ཀྱིས་ཁྱབ་བསྒྲགས་བྱས་པ་དང་། སྤྱི་ལོ་2007 ལོའི་ཟླ་9 ཚེས་1 ཉིན་ནས་ལག་བསྟར་བྱེད་འགོ་ཚུགས། ལོ་10 ཡི་རིང་བོད་རང་སྐྱོང་ལྗོངས་ཁོ་ནར་བླ་སྤྲུལ་གྱི་ཡང་སྲིད་60ལྷག་ཙམ་བྱ་ཐབས་འདི་གཞིར་བཟུང་ངོས་འཛིན་ཞུས་པ་དང་ཆོག་མཆན་སྤྲད་ཡོད་པས། བླ་སྤྲུལ་ཡང་སྲིད་ངོས་འཛིན་ཞུ་བའི་ལས་དོན་ཡང་ཁྲིམས་ལུགས་ཅན་དང་ཚད་ལྡན་ཅན་དུ་གྱུར་ཡོད།།