རྒྱལ་ཡོངས་ལུས་རྩལ་འགྲན་ཚོགས་སྐབས་བཅུ་གསུམ་པ་ཐེན་ཅིན་ནས་མཇུག་བསྡུས།

        ཟླ་དགུ་བའི་ཚེས་བརྒྱད་ཉིན་གྱི་དགོང་མོ། རྒྱལ་ཡོངས་ལུས་རྩལ་འགྲན་ཚོགས་སྐབས་བཅུ་གསུམ་པ་མཇུག་བསྡུ་བའི་མཛད་སྒོ་ཐེན་ཅིན་ལུས་རྩལ་ཁང་ནས་བསྡུས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལུས་རྩལ་འགྲན་ཚོགས་སྐབས་བཅུ་གསུམ་པ་མཇུག་བསྡུས་པ་ཁྱབ་བསྒྲགས་བྱས།
        སྐབས་འདིའི་རྒྱལ་ཡོངས་ལུས་རྩལ་འགྲན་ཚོགས་སྟེང་མང་ཚོགས་ཀྱི་འགྲན་བསྡུར་རྣམ་གྲངས་བཙུགས་པ་དང་། ཆུ་ཚད་མཐོ་བའི་ཕྱིར་སྡོད་རང་མིའི་ལུས་རྩལ་པ་གདན་ཞུ་བྱས་ནས་འགྲན་བསྡུར་ལ་ཞུགས་སུ་འཇུག་པ། གསེར་གྱི་རྟགས་མ་དང་བྱ་དགའི་རྟགས་མའི་བསྒྲགས་ཡིག་མེད་པར་བཟོ་བ། རྩལ་འཁྲིད་པ་དང་བྱ་དགའ་ཐོབ་པའི་ལུས་རྩལ་པ་གཉིས་མཉམ་དུ་སྟེགས་བུའི་སྟེང་སོང་ནས་བྱ་དགའ་ལེན་པ་སོགས་ཀྱི་གསར་གཏོད་བྱེད་ཐབས་མང་པོ་བཏོན་ནས། མི་དམངས་གཙོར་འཛིན་པའི་འགྲན་བསྡུར་བསྒྲུབ་པའི་འདུ་ཤེས་འགྲེལ་བཤད་གསལ་བོ་བྱས་པ་དང་། དམངས་ཡོངས་ཀྱི་རྒྱལ་ཡོངས་ལུས་རྩལ་འགྲན་ཚོགས་ཐད་ཀྱི་སྒོ་གླེགས་གསར་བ་ཕྱེས། 
        དུས་ཡུན་ཉིན་བཅུ་གཉིས་རིང་གི་རྒྱལ་ཡོངས་ལུས་རྩལ་འགྲན་ཚོགས་སྟེང་། ལུས་རྩལ་པ་ཁྲི་གཉིས་ལྷག་གིས་རྩལ་འགྲན་ལུས་རྩལ་རྣམ་གྲངས་སོ་གསུམ་དང་མང་ཚོགས་ལུས་རྩལ་རྣམ་གྲངས་བཅུ་དགུའི་བྱ་དགའི་རྟགས་མ་ལྔ་བརྒྱ་དང་ཞེ་གསུམ་འགྲན་རྩོད་བྱས། 
        རྒྱུས་ལོན་བྱུང་བ་ལྟར་ན། རྒྱལ་ཡོངས་ལུས་རྩལ་འགྲན་ཚོགས་སྐབས་བཅུ་བཞི་བ་2021ལོར་ཧྲན་ཞི་ཞིང་ཆེན་ནས་བསྡུ་རྒྱུ་ཡིན་པ་རེད།