འཆི་མེད་རྡོ་རྗེ་2016ལོའི་ལོ་འཁོར་ཕུལ་བྱུང་འགྲིམ་འགྲུལ་མི་སྣ་བཅུ་ཡི་གྲས་སུ་བདམས་པ།
ཡོང་ཁུངས། མི་དམངས་དྲ་བ།
སྤེལ་དུས།: ༢༠༡༧ ལོའི་ཟླ་ ༤ ཚེས་ ༢༨
"2016ལོའི་ལོ་འཁོར་ཕུལ་བྱུང་འགྲིམ་འགྲུལ་མི་སྣ་བཅུ"ཡི་འོས་སྦྱོར་དཔྱད་འདེམས་བྱེད་སྒོ་ནི་རྒྱལ་ཡོངས་འགྲིམ་འགྲུལ་སྐྱེལ་འདྲེན་ལས་རིགས་ཀྱི་གཞི་རིམ་ལས་བྱེད་དང་། སྒེར་པ། ཚོགས་པ་བཅས་ལ་ཁ་ཕྱོགས་ཡོད་ལ། དེའི་ནང་གཞུང་ལམ་དང་། ཆུ་ལམ། སྐྱེལ་འདྲེན། ལྕགས་ལམ། དམངས་སྤྱོད་མཁའ་འགྲུལ། སྦྲག་སྲིད་སོགས་ཀྱི་ཁྱབ་ཁོངས་འདུས་ཡོད། འཆི་མེད་རྡོ་རྗེ་སོགས་པའི་མི་བཅུ་ནི་ཐོག་མའི་དཔྱད་འདེམས་དང་། དྲ་ཐོག་ནས་འདེམས་ཤོག་འཕེན་པ། མཐའ་མཇུག་གི་དཔྱད་འདེམས་བཅས་ཀྱི་དཔྱད་འདེམས་རབ་དང་རིམ་པ་བརྒྱུད་རྗེས་དཔྱད་འདེམས་ཀྱི་འོས་མི་མང་པོ་ཞིག་གི་ཁྲོད་ནས་ཐོན་ཏེ། "2016ལོའི་ལོ་འཁོར་ཕུལ་བྱུང་འགྲིམ་འགྲུལ་མི་སྣ་བཅུ"ནང་བདམས་ཐོན་བྱུང་བ་རེད།
"དེ་རིང་། ང་ཧ་ཅང་དགའ་པོ་བྱུང་།" སི་ཁྲོན་ནུབ་རྒྱུད་མཐོ་སྒང་དུ་སྦྲག་སྲིད་དོས་སྐྱེལ་རླངས་འཁོར་བཏང་ནས་ལོ་28ཕྱིན་པའི་འཆི་མེད་རྡོ་རྗེའི་མིག་ཟུང་ནས་ཆུ་ཞག་འཁོར་བཞིན་དུ། ཁོང་གིས་གཟི་བརྗིད་འདི་ནི་ང་རང་གཅིག་པུར་དབང་བ་མ་ཡིན་པར། འདི་ནི་མཐོ་སྒང་འདིའི་སྦྲག་སྲིད་དོས་སྐྱེལ་ལམ་ཐོག་གི་སྦྲག་སྲིད་པ་མི་རབས་འགའ་ཞིག་ལ་མངའ་བ་ཡིན་ཞེས་བརྗོད་པ་རེད།
འཆི་མེད་རྡོ་རྗེས་བརྗོད་པའི་གངས་ཐིག་སྦྲག་སྲིད་ལམ་བུ་ནི་རྒྱལ་ཡོངས་ཀྱི་རིམ་པ་དང་པོའི་སྦྲག་སྲིད་ལམ་བུ་སྟེ་ཁྲོན་བོད་སྦྲག་སྲིད་ལམ་གྱི་དཀར་མཛེས་ལམ་དུམ་ཡིན་པ་རེད། ལམ་འདི་ནི་དཀར་མཛེས་ཁུལ་གྱི་དར་རྩེ་མདོ་ནས་རྡོག་ཐོན་ཏེ་རྒྱུ་ལ་རི་བོ་དང་། དམུ་རྗེ་ཉག་ག ཧོར་ཁོག་སྒང་། ཁྲོ་ལ་སོགས་བརྒྱུད་རྗེས་ཁྲོན་བོད་སྦྲག་སྲིད་ལམ་དུམ་གྱི་མཐར་མཇུག་འབབ་ཚུགས་སྡེ་དགེ་རྫོང་དུ་འབྱོར་ཞིང་། ལམ་ཐག་ཡོངས་ལ་སྤྱི་ལེ་604ཡོད་པ་རེད། ལམ་རྒྱུད་འདིའི་ས་གཤིས་ཧ་ཅང་ཞན་ལ། གནམ་གཤིས་འགྱུར་ལྡོག་ཆེ་བ། ས་བབ་ཀྱི་མཐོ་ཚད་ཆ་སྙོམས་ལ་སྨི་3500ཡན་ཡོད་པ་རེད། 1954ལོའི་ཟླ་12པར་ཁྲོན་བོད་གཞུང་ལམ་ཤར་གཏོང་ཐུབ་པ་ནས་ད་ལྟ་བར་དུ། ལོ་ངོ་63ཟིན་ཡོད་ལ། བོད་ལྗོངས་དང་སི་ཁྲོན་སོགས་ཀྱི་ས་ཆར་སྦྲེལ་བའི་སྦྲག་སྲིད་འཕྲིན་གཏོང་གི་ལམ་གཙོ་བོ་ཞིག་ཏུ་གྱུར་པ་ཡོད།
ཤེས་རྟོགས་བྱུང་གསལ་དུ། "2016ལོའི་ལོ་འཁོར་ཕུལ་བྱུང་འགྲིམ་འགྲུལ་མི་སྣ་བཅུ"ཡི་འོས་སྦྱོར་དཔྱད་འདེམས་བྱེད་སྒོ་འདི་ནི་2013ལོ་ནས་བཟུང་སྤེལ་འགོ་ཚུགས་ཤིང་། ད་ལྟ་བར་དུ་ཐེངས་བཞི་ལ་སྤེལ་བ་རེད།