ཀྲུང་དབྱང་མི་རིགས་སློབ་ཆེན་བོད་རིག་པ་ཞིབ་འཇུག་གླིང་གིས་མེ་མོ་བྱ་ལོའི་ལོ་སར་བསུས།

        

        ལུགས་གསར་གྱི་ཟླ་2པའི་ཚེས་27ཉིན་ནི་བོད་ཀྱི་མེ་མོ་བྱ་ལོའི་ལོ་སར་གྱི་ཚེས་གཅིག་ཡིན་ཞིང་། ཉིན་དེའི་ཕྱི་དྲོ་ནས་བཟུང་པེ་ཅིང་ཡུལ་གྱི་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པ་ཞིབ་འཇུག་སློབ་གླིང་གི་དགེ་སློབ་ཡོངས་དང་། སློབ་གྲྭ་དེ་གའི་སློབ་གླིང་གཞན་པའི་བོད་པ་རྣམས་ཀྱིས་ལོ་སར་གྱི་བྱ་འགུལ་ཁག་གཉིས་སུ་བགོས་ཏེ་ལོ་གསར་བ་འཛུམ་གྱིས་བསུས།

        ཕྱི་དྲོའི་ཆུ་ཚོད་བཞི་དང་ཕྱེད་ཀའི་སྟེང་སློབ་གྲྭའི་བོད་པ་རྣམས་སློབ་ཆེན་སློབ་མའི་བྱ་འགུལ་ལྟེ་གནས་སུ་མཉམ་གཅིག་ཏུ་འཛོམས་ཏེ་གླུ་གར་གྱི་རྒྱ་མཚོའི་ཀློང་ནས་དགའ་དགའ་སྤྲོ་སྤྲོའི་ངང་ལོ་སར་གྱི་སྤྲོ་ཚོགས་ལ་རོལ།
        དགོང་མོའི་ཆུ་ཚོད་དྲུག་པར་སློབ་གྲྭའི་སློབ་མའི་ཟ་ཁང་དུ་འཛོམས་ཏེ་དགུ་ཐུག་འཐུང་བར་མ་ཟད། ད་རུང་ཚལ་རིགས་སྣ་མང་དང་སིལ་ཏོག   ཀ་ར།  ལུག་ཤ་སོགས་ཟས་རིགས་མང་པོའི་བྲོ་བ་མྱོང་ཞོར་ལོ་གསར་བའི་ནང་ཀུན་གྱི་ལུས་སེམས་བདེ་བ་དང་། བྱ་བ་ལམ་འགྲོ། སློབ་སྦྱོང་ཡར་ཐོན་ཡོང་བའི་བཀྲ་ཤིས་ཁ་གཡང་བོས་ཏེ་དགའ་དགའ་སྤྲོ་སྤྲོའི་ངང་མེ་མོ་བྱ་ལོའི་གནམ་ལོ་གསར་བ་འཛུམ་གྱིས་བསུས་སོ།