གྲངས་ཉུང་མི་རིགས་ས་ཁུལ་གྱི་ཐུམ་འབུའི་ནད་སྔོན་འགོག་ལས་ཀའི་ཟབ་སྦྱོང་འཛིན་གྲྭ་དཀར་མཛེས་ཁུལ་དུ་འཚོགས།

   ཉེ་ལམ། ཞིང་ཆེན་གྲངས་ཉུང་མི་རིགས་ས་ཁུལ་གྱི་འཕྲོད་བསྟེན་སྐུལ་འཕེལ་ཚོགས་པའི་མངག་བཅོལ་ལྟར། སི་ཁྲོན་ཞིང་ཆེན་གྱི་གྲངས་ཉུང་མི་རིགས་ས་ཁུལ་གྱི་འཕྲོད་བསྟེན་སྐུལ་འཕེལ་ཚོགས་པས་ཐུམ་འབུའི་ནད་སྔོན་འགོག་ལས་ཀའི་ཟབ་སྦྱོང་འཛིན་གྲྭ་དང་དཀར་མཛེས་ཁུལ་གྱི་ཐུམ་འབུའི་ནད་ཕྱོགས་བསྡུས་སྔོན་འགོག་ལས་དོན་གྱི་ཟབ་སྦྱོང་ཚོགས་འདུ་དར་མདོ་ནས་འཚོགས། ཐེངས་འདིའི་ཟབ་སྦྱོང་ནི་དཀར་མཛེས་ཁུལ་གྱི་ཐུམ་འབུའི་ནད་ཕྱོགས་བསྡུས་སྔོན་འགོག་གི་འགག་སྒྲོལ་ལས་ཀ་ལོ་གཅིག་ལ་སྤེལ་བའི་ལག་ལེན་གཞིར་བཟུང་བ་ཡིན་ཞིང་། ལས་ཀའི་ཁྲོད་འཕྲད་པའི་དཀའ་ཁག་དང་གནད་དོན་ལ་ཆེད་མཁས་པ་དག་གིས་མ་ལག་ལྡན་པའི་སྒོ་ནས་གསལ་འགྲེལ་བྱས།