སྡེ་དགེ་པར་གཞིའི་བཀའ་འགྱུར་གསར་བརྐོས་མ་བརྐོ་མཇུག་རྫོགས་པ་དང་བསྟན་འགྱུར་བརྐོ་འགོ་ཚུགས་གྲབས་ཡོད།

སྤྱི་ཟླ་2པའི་ཚེས་27ཉིན། སྡེ་དགེ་རྫོང་གིས་ཁྲེང་ཏུའུ་རུ་སྡེ་དགེ་པར་ཁང་རྒྱུན་འཛིན་འཕེལ་རྒྱས་དང་སྲུང་སྐྱོང་བེད་སྤྱོད་སྐོར་གྱི་སྐུལ་སྤེལ་ཚོགས་འདུ་འཚོགས། སྡེ་དགེ་རྫོང་ཨུའི་ཧྲུའུ་ཅི་གཞོན་པའམ་རྫོང་དཔོན་ཚུལ་ཁྲིམས་ཡེ་ཤེས་ཀྱིས་ཚོགས་འདུ་གཙོ་སྐྱོང་གནང་། རིམ་པ་ཁག་གི་འབྲེལ་ཡོད་འགོ་ཁྲིད་དང་ཆེད་མཁས་པ། དགེ་རྒན་ཆེན་མོ། སྡེ་དགེ་རྫོང་གི་འབྲེལ་ཡོད་ལས་ཁུངས་ཀྱི་འགན་ཁུར་མི་སྣ་བཅས་ཚོགས་འདུར་ཞུགས་ཡོད།

ཚོགས་ཐོག་ཏུ་རྫོང་དཔོན་ཚུལ་ཁྲིམས་ཡེ་ཤེས་ཀྱིས་སྡེ་དགེ་པར་གཞིའི་བཀའ་བསྟན་གསར་བརྐོས་མའི་ཆབ་སྲིད་ཀྱི་དོན་སྙིང་དང་རིག་གནས་ཀྱི་དོན་སྙིང་། འཕེལ་རྒྱས་ཀྱི་དགོས་མཁོ། དམངས་འཚོ་ཡི་རིན་ཐང་སྐོར་ལ་གསུང་བཤད་གནང་། རྫོང་སྲིད་གྲོས་ཀྱི་ཀྲུའུ་ཞི་གཞོན་པ་བསམ་གཏན་གྱིས་སྡེ་དགེ་པར་གཞིའི་བཀའ་འགྱུར་གསར་བརྐོས་མའི་ལས་ཀ་ཕྱོགས་བསྡོམས་སྙན་ཞུ་ཕུལ་བ་དང་རྫོང་སར་དགོན་པའི་མཁན་པོ་ཕུན་ཚོགས་རྣམ་རྒྱལ་གྱིས་སྡེ་དགེ་པར་གཞིའི་བཀའ་འགྱུར་གསར་བརྐོས་མ་ཞུ་དག་མཛད་ཚུལ་ངོ་སྤྲོད་གནང་། རྫོང་སྲིད་གྲོས་ཀྱི་ཀྲུའུ་ཞི་གཞོན་པའམ་རྫོང་ཡིག་ཚགས་ཁང་གི་འགོ་གཙོ་ཟླ་བ་གཡང་སྐྱིད་ཀྱིས་སྡེ་དགེ་པར་ཁང་འཛམ་གླིང་དྲན་ཤེས་ཀྱི་མིང་ཐོ་རུ་རེ་ཞུ་བྱེད་པའི་གནས་ཚུལ་ངོ་སྤྲོད་བྱས། སྡེ་དགེ་པར་ཁང་གི་པར་དཔོན་བསོད་ནམས་དབང་རྒྱལ་གྱིས་2025ལོར་སྡེ་དགེ་པར་ཁང་གི་ཚད་ལྡན་དོ་དམ་དང་རིག་དངོས་སྐྱོང་སྐྱོབ་ཀྱི་ལས་དོན་སྐོར་ངོ་སྤྲོད་བྱས། སྡེ་དགེ་པར་གཞིའི་བཀའ་འགྱུར་གསར་བརྐོས་མའི་འགན་ཁུར་པ་འཇམ་དབྱངས་གྲགས་པས་བཀའ་འགྱུར་བསྐྱར་བརྐོས་ཀྱི་བརྒྱུད་རིམ་ངོ་སྤྲོད་བྱས། རྫོང་རིག་གནས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་འགྱུར་མེད་དབང་མོས་སྡེ་དགེ་པར་ཁང་གི་དཀར་ཆག་གཉིས་ཀྱི་ལས་དོན་སྐོར་དང་རྗེས་ཕྱོགས་ཀྱི་ལས་དོན་ཐད་ངོ་སྤྲོད་བྱས།

གཞན་ཡང་དཀར་མཛེས་ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་ཚེ་དབང་འཇིགས་མེད་དང་དཀར་མཛེས་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་ཟུར་པ་ཀརྨ་རྒྱལ་མཚན། རྒྱལ་ཡོངས་གེ་སར་ལས་དོན་འགོ་ཁྲིད་ཚོ་ཆུང་གཞུང་ལས་ཁང་གི་ཀྲུའུ་རེན་གཞོན་པ་འཇམ་དབྱངས་ཆོས་སྒྲོན། སི་ཁྲོན་ཏང་གི་འཛུགས་སྐྲུན་དུས་དེབ་ཁང་གངས་ལྗོངས་ཉི་གཞོན་གྱི་འགོ་གཙོ་དཀོན་མཆོག་རྡོ་རྗེ་བཅས་ཀྱིས་ཚོགས་འདུའི་བཀོད་སྒྲིག་ལྟར་པར་ཁང་གི་ལས་དོན་ཁག་ལ་དཔྱད་བརྗོད་དང་རྗེས་མའི་རེ་བ་བཏོན།

རྫོང་སྲིད་གྲོས་ཀྱི་ཀྲུའུ་ཞི་གཞོན་པ་བསམ་གཏན་གྱིས་སྡེ་དགེ་པར་གཞིའི་བཀའ་འགྱུར་གསར་བརྐོས་མ་འདི་ནི་སྡེ་དགེ་རྫོང་ཏང་ཨུ་དང་སྲིད་གཞུང་། འབྲེལ་ཡོད་སྡེ་ཁག་གི་རྒྱབ་སྐྱོར་འོག །བོད་རབ་བྱུང་བདུན་པའི་ཆུ་སྦྲུལ་ལོའི་བོད་ཟླ་2པའི་ཚེས11རྒྱལ་ཕུར་འགྲུབ་སྦྱོར་སྟེ་སྤྱི་ལོ་2014ལོའི་ཟླ་4པའི་ཚེས་10ཉིན་མདོ་ཁམས་སྡེ་དགེ་དགོན་ཆེན་ལྷུན་གྲུབ་སྟེང་སྡེ་དགེ་པར་ཁང་ཆོས་མཛོད་བཀྲ་ཤིས་སྒོ་མང་དུ་འགོ་བརྩམས་ཏེ་སྤྱི་ལོ་2026ལོའི་ཟླ་2པའི་ཚེས་5ཉིན་བདེ་ལེགས་ངང་བརྐོ་མཇུག་བསྒྲིལ་བ་དང་། མ་དངུལ་འགྲོ་སོང་ཐད་སྤྱི་ལོ་2016ལོའི་ཡར་སྔོན་དུ་གཙོ་བོ་ཁྲེང་ཏུའུ་གྲོང་ཁྱེར་ཀའོ་ཞིན་ཆུས་ཀྱི་ཁ་གཏད་རོགས་དངུལ་ལས་སྒོར་ཁྲི་500ལ་ཉེ་བར་བཏང་བ་དང་། སྤྱི་ལོ་2016ལོ་ནས་ཁམས་པའི་རིག་གནས་ཞིབ་འཇུག་ཁང་གིས་རེ་ཞུ་བྱས་པའི་ཆེད་སྤྱོད་མ་དངུལ་སྒོར་ཁྲི་600ཡིས་རྨང་གཞི་བྱས་ཐོག །སྤྱི་ལོ་2017ལོ་ནས་སྤྱི་ལོ་2024ལོའི་བར་བསྡོམས་པས་སྒོར་ཁྲི་3700ལྷག་བཏང་བར་མ་ཟད། སྤྱི་ལོ་2025ལོར་བསྡོམས་པས་སྒོར་ཁྲི་2600བཏང་ཡོད། པར་བརྐོས་ལས་གཞི་འདི་སྡེ་དགེ་རྫོང་ཁྲི་པ་མི་རིགས་ལག་རྩལ་འཕེལ་རྒྱས་ཚད་ཡོད་ཀུང་སིས་འགན་ཁུར་ཞིང་། པར་རྐོ་མཁན་ནི་སྡེ་དགེ་དང་ཀུ་སེའི་པར་བརྐོས་ཡིན། དེ་ཡང་2014ལོར་ཐོག་མ་པར་བརྐོས་མི་སྣ་32ནས་2015ལོར་མི་སྣ་52དང་། དེ་བཞིན་2018ལོ་ནས་རིམ་བཞིན་པར་བརྐོས་མི་སྣ་ཁ་གསབ་བྱས་ཏེ། 2025ལོར་ཆེས་མང་སྐབས་པར་བརྐོས་མི་སྣ་298ཡོད། པར་དུ་བརྐོས་ཟིན་པ་རྣམས་ཞུ་དག་དང་བརྐོ་བཙུགས་ཐེངས་མང་བྱས་རྗེས་མཇུག་མཐའི་ཞུ་ཆེན་ཁམས་བྱེ་བཤད་གྲྭས་བྱས་པ་རེད་ཅེས་བཤད།

དཀར་མཛེས་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་ཟུར་པ་ཀརྨ་རྒྱལ་མཚན་གྱིས་ད་ཐེངས་སྡེ་དགེ་པར་གཞིའི་བཀའ་འགྱུར་གསར་བརྐོས་མའི་ལས་གཞི་འདི་པར་གཞི་རྙིང་པ་གས་པ་དང་། ཟད་པ། འཆུས་པ། འཁྱོགས་པ་ལ་སོགས་པའི་སྐྱོན་དུ་གྱུར་དང་འགྱུར་བཞིན་པས། སྔོན་གྱི་པར་གཞི་ཇི་མ་ཇི་བཞིན་དུ་བསྐྱར་བརྐོའི་བྱ་རིམ་ཁག་ལ་དཀའ་བ་མ་བསམ་ནས་ཕན་པ་བསམས་ཏེ། ཇི་ལྟར་ཆ་ཚང་བ་དང་། ཇི་ལྟར་ཞུས་དག་པ། ཇི་ལྟར་བརྐོས་ཟབ་པ། ཇི་ལྟར་སྲུང་ཞིང་ལག་ལེན་བདེ་བའི་ཐབས་ལ་ནན་ཏན་དུ་བྱས་ཏེ་བརྐོས་འདུག །ཀྲུང་ཧྭ་བཀའ་འགྱུར་ཆེན་མོ་ནི་ཀྲུང་གོའི་ཁྱད་ཆོས་ལྡན་པའི་སངས་རྒྱས་ཆོས་ལུགས་ཀྱི་ཤེས་བྱ་ཀུན་འདུས་ཀྱི་དཔེ་ཚོགས་ཆེན་པོ་ཡིན་ལ། དེའི་ནང་བོད་ཡིག་གི་བཀའ་བསྟན་འགྱུར་གྱིས་གལ་འགངས་ཤིན་ཏུ་ཆེ་བའི་གནས་བབ་བཟུང་ཡོད་པ་དང་། སྤྱི་ཚོགས་ཚན་རིག་སྡེ་ཁག་དང་། སློབ་གྲྭ་ཆེན་མོ། རྒྱ་ཆེ་བའི་དད་ལྡན་དམངས་ཚོགས་བཅས་ཀྱི་རེ་འདོད་བསྐང་ཐུབ་ཅེས་གསུངས།

རྒྱུས་ལོན་བྱུང་བ་ལྟར་ན། སྡེ་དགེའི་བཀའ་འགྱུར་ལ་ཁྱོན་བསྡོམས་གླེགས་བམ་མམ་པོད་103བཞུགས་ལ་ཤིང་པར་33049སྟེ། གླེགས་བམ་སོ་སོའི་དབུ་ཁང་གཡས་གཡོན་དུ་འདུལ་མདོ་རྒྱུད་གསུམ་རང་རང་ནས་བྱུང་བའི་ཡི་དམ་གྱི་ལྷའི་གཙོ་བོ་དང་། དེའི་བྱེད་པ་པོ། པཎྜི་ཏ་དང་། ལོ་ཙཱ་བ་སོགས་ཀྱི་སྐུ་བརྙན་ཁྱོན་212ཙམ་བཞུགས། པར་གཞིའི་བཞུགས་བྱང་གི་གྲངས་ཀ་ནི་དཀར་ཆག་དང་། སྡེ་དགེའི་པར་ཁང་དུ་ད་ལྟར་བཞུགས་སུ་གསོལ་བའི་པར་གཞི་ངོ་མའི་མཐའ་ལྡེབ་རིང་རྩིས་ཀྱི་གྲངས་གཉིས་གོ་བསྡུར་ཡང་ཡང་བྱས་ཏེ་འཁོད་པ་ཡིན་པས་ཡིད་རྟོན་རུང་བའོ། །བཀའ་འགྱུར་ནང་གསེས་ཀྱི་རིགས་དབྱེ་སྟངས་ཀྱང་སྤྱིར་བཀའ་འགྱུར་གྱི་པར་གཞི་མི་འདྲ་བ་ལ་ཁྱད་པར་རེ་ཡོད་ནའང་གསར་བརྐོས་མའི་ཕྱི་ཁོག་སྔོན་མ་ལས་ཅུང་ཆེ་བ་རིང་ཚད་ལི་སྨི་72དང་ཞེང་ཚད་ལི་སྨི་12བཅས་ཏེ་འདི་སྡེ་དགེའི་བཀའ་འགྱུར་རང་གི་རིགས་དབྱེ་སྟངས་ལྟར་སོར་བཞག་བྱས་ཡོད། མདོར་ན་སྔོན་གྱི་སྡེ་དགེ་པར་གཞིའི་བཀའ་འགྱུར་ལྟར་སྤྱི་ཡོངས་ལ་འཕྲི་སྣོན་མ་བྱས་པ་དང་། པར་ཤིང་ཐོག་སྔོན་གྱི་པར་གཞི་དང་མི་འདྲ་བ་པར་གཞིའི་གཡོན་གདོང་ཟུར་ཡུ་བའི་སྟེང་འོག་ལ་པར་ལེབ་འདིའི་སྡེ་ཚན་དང་པོད་རྟགས་པར་ལེབ་ཀྱི་གྲངས་གང་ཡིན་གདོང་རྟགས་བརྐོས་ཡོད་པ་ནི་པར་འབྲུ་སྲུང་སྐྱོང་དང་ལག་ལེན་ལ་སྟབས་བདེའི་ཕན་ནུས་ཡོད། གཞན་ཡང་ཤིང་པར་གྱི་ཡུ་བ་སྔར་ལས་ལྷག་པའི་འཇམ་མཉེན་དོད་པོ་བྱས་པས་ལས་གྲ་བའི་བདེ་འཇགས་ལ་ཕན་པའི་དགེ་མཚན་ལྡན།

གཞན་ཡང་གླེང་རིན་ཡོད་པ་ཞིག་ལ་སྡེ་དགེ་པར་གཞིའི་བསྟན་འགྱུར་མི་འགྱངས་བར་བསྐྱར་བརྐོ་བྱ་གྲབས་འདུག །