སྲིད་གྲོས་དཀར་མཛེས་ཁུལ་སྐབས་བཅུ་བཞི་པའི་གྲོས་ཚོགས་ཐེངས་ལྔ་པ་ཚོགས་འགོ་བཙུགས།

སྲིད་གྲོས་དཀར་མཛེས་ཁུལ་སྐབས་བཅུ་བཞི་པའི་གྲོས་ཚོགས་ཐེངས་ལྔ་པ་ཚོགས།

ཀྲའོ་པོ་ཡིས་གསུང་བཤད་གནང་། ཧྥུང་ཧྥ་ཀུའེ་དང་ཧྲུའུ་ཏ་ཁྲུན་ཚོགས་འདུར་ཕེབས་ནས་རྟེན་འབྲེལ་ཞུས།

ཝང་ཡུས་ཆུང་ཚོགས་འདུར་ཞུགས།

སྤྱི་ཟླ་2པའི་ཚེས་9ཉིན་གྱི་སྔ་དྲོར། ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་དཀར་མཛེས་བོད་རིགས་རང་སྐྱོང་ཁུལ་ཨུ་ཡོན་ལྷན་ཁང་སྐབས་བཅུ་བཞི་པའི་གྲོས་ཚོགས་ཐེངས་ལྔ་པ་ལྕགས་ཟམ་རྫོང་ནས་འཚོག་འགོ་བཙུགས།

ཁུལ་སྲིད་གྲོས་ཏང་ཚན་ཁག་གི་ཧྲུའུ་ཅི་ཝང་ཡུས་ཆུང་དང་ཀྲུའུ་ཞི་གཞོན་པ་ལིའུ་ཙུང་ཅན། རྡོ་རྗེ་བཀྲ་ཤིས། སྐུ་བཅར་ཡོན་ཏན་རྒྱ་མཚོ། ནན་ཧུང་། ཐུབ་བསྟན་ཆོས་ཀྱི་རྒྱལ་མཚན། ཚེ་རིང་དབང་མོ། འཆི་མེད། དྲུང་ཆེན་ཞེ་ཏ་ཆོན་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་ཡོད།

ཀྲུང་གུང་དཀར་མཛེས་ཁུལ་ཨུའི་ཧྲུའུ་ཅི་ཀྲའོ་པོ་དང་། ཀྲུང་གུང་དཀར་མཛེས་ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཧྥུང་ཧྥ་ཀུའེ། ཁུལ་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་ཧྲུའུ་ཏ་ཁྲུན་བཅས་ཚོགས་འདུར་ཕེབས་ནས་རྟེན་འབྲེལ་ཞུས་པར་མ་ཟད་ཀྲུའུ་ཞི་སྟེགས་བུར་བཞུགས།

ཐེངས་འདིའི་གྲོས་ཚོགས་སུ་འབྱོར་དགོས་པའི་ཨུ་ཡོན273ཡིན་ཞིང་། ཨུ་ཡོན241དངོས་སུ་འབྱོར་ཡོད་པས་གཏན་འབེབས་མི་གྲངས་དང་མཐུན་པ་རེད། ནན་ཧུང་གིས་འགོ་འཛུགས་ཚོགས་འདུ་གཙོ་སྐྱོང་བྱས། སྔ་དྲོའི་ཆུ་ཚོད9པར་སྲིད་གྲོས་དཀར་མཛེས་ཁུལ་ཨུ་ཡོན་ལྷན་ཁང་སྐབས་བཅུ་བཞི་པའི་གྲོས་ཚོགས་ཐེངས་ལྔ་པ་རྒྱལ་གླུའི་ཁྲོད་ནས་འཚོག་འགོ་བཙུགས་པ་རེད།

ཚོགས་འདུར་ཐོག་མར་སྲིད་གྲོས་དཀར་མཛེས་ཁུལ་སྐབས་བཅུ་བཞི་པའི་གྲོས་ཚོགས་ཐེངས་ལྔ་པའི་གྲོས་རིམ་ལ་གྲོས་ཞིབ་བྱས་ནས་གྲོས་འཆམ་བྱུང་།

ལིའུ་ཙུང་ཅན་གྱིས་སྲིད་གྲོས་དཀར་མཛེས་ཁུལ་ཨུ་ཡོན་ལྷན་ཁང་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་ཚབ་བྱས་ནས་ལས་དོན་སྙན་སེང་ཞུས། སྙན་སེང་ནང་བསྟན་དོན། 2025ལོར། ཀྲུང་གུང་དཀར་མཛེས་ཁུལ་ཨུའི་འགོ་ཁྲིད་བརྟན་པོ་འོག། ཁུལ་སྲིད་གྲོས་རྒྱུན་ལས་ཨུ་ལྷན་གྱིས་ཏང་གི་འགོ་ཁྲིད་དང་འཐབ་ཕྱོགས་གཅིག་གྱུར། གྲོས་མོལ་དམངས་གཙོ་བཅས་ཟུང་འབྲེལ་དམ་ཟབ་བྱས་པ་དང་། སྲིད་གྲོས་ནང་ཞུགས་པའི་སྡེ་ཚན་ཁག་དང་རྒྱ་ཆེ་བའི་སྲིད་གྲོས་ཨུ་ཡོན་ལ་མཐུན་སྒྲིལ་དང་སྣེ་ཁྲིད་བྱས་ཏེ། ཁུལ་ཨུའི་སྤྱིའི་ལས་དོན་བཀོད་སྒྲིག་ལ་དམ་པོར་དམིགས་ཤིང་། “བློ་སེམས་དཀར་ཞིང་སྤྱོད་ཡོན་ལྡན་པའི”ཡིད་རྟོན་རྒྱུན་འཁྱོངས་ལག་ལེན་བསྟར་བ་དང་། “བློ་ཁ་ཏང་ལ་ཕྱོགས་པའི”རྩ་བ་སྔར་བས་བརྟན་སྲུང་། “ཁྱིམ་དང་རྒྱལ་ཁབ་ལ་ལྷག་བསམ་ཟོལ་མེད་ཡིན་པ”མཐའ་འཁྱོངས། “འགན་ཁུར་དང་བྱས་རྗེས་ཡོད་པའི”འགན་འཁྲི་ཁུར་བ། “ཕྱར་བ་གྲུ་འདེགས”ཀྱི་མཉམ་ལས་ལ་བརྟེན་ནས“འབད་བརྩོན་མཉམ་འཛུགས”ཀྱི་སྒུལ་ཤུགས་སྔར་བས་ཆེ་རུ་བཏང་། “འབངས་ཀྱི་སྐྱིད་སྡུག་ཡིད་ལ་འཇོག་པ”ལག་ལེན་བསྟར་ནས“དམངས་ཆེད་འགན་སྒྲུབ”ཀྱི་འདུ་ཤེས་སྔར་བས་ལག་ལེན་ཆེ་རུ་བསྟར། “སྡུག་རུས་མཐའ་ལ་བདེ་བ་ཡོད་པའི”འགྱུར་མེད་སེམས་ཤུགས་ལ་བརྟེན་ནས“དཔའ་ངར་ཆེར་བསྐྱེད”རྣམ་པ་སྔར་བས་མངོན་པ་དང་སྲིད་གྲོས་ཀྱི་འགན་འཁྲི་བསྒྲུབས་ཡོད།

སྙན་སེང་ནང་བསྟན་དོན། 2026ལོར་ཁུལ་སྲིད་གྲོས་རྒྱུན་ལས་ཨུ་ལྷན་གྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་པ་དང་། ཏང་གི་ཚོགས་ཆེན་ཉི་ཤུ་པ་དང་དེ་བཞིན་ཀྲུང་ཨུ་ཚང་འཛོམས་གྲོས་ཚོགས་རིམ་བྱུང་གི་སྙིང་དོན་ལག་ལེན་མཐར་ཕྱིན་བསྟར་བ། ཞིང་ཆེན་ཏང་ཨུ་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་བརྒྱད་པ་དང་ཁུལ་ཨུ་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་བཅུ་པའི་ཐབས་ཇུས་བཀོད་སྒྲིག་གལ་ཆེན་ཁྱོན་ཡོངས་ནས་དོན་ལ་འཁྱོལ་བ། ཀྲུང་གུང་དཀར་མཛེས་ཁུལ་ཨུའི་འགོ་ཁྲིད་བརྟན་པོ་འོག“དཀར་མཛེས་གསར་པར་འབད་པས་བསྐྱོད·ཨུ་ཡོན་རྣམས་ཀྱིས་བྱ་སྤྱོད་སྤེལ་བའི”གཙོ་དོན་ལག་ལེན་བྱེད་སྒོས་སྣེ་ཁྲིད་དེ། “དཔལ་འབྱོར་ཞིང་ཆེན་ཆེན་པོས་གཙོ་ཁྲིད་བྱེད་པའི”གྲོས་འདོན་ལ་དམིགས་ཏེ་ཞིང་ཆེན་ཡོངས་ཀྱི་སྲིད་གྲོས་ཁོངས་གཏོགས་ཕུལ་བྱུང་ལ་བརྩོན་ལེན་བྱ་རྒྱུ་དང་། “སྣེ་ཁྲིད་རང་བཞིན་གྱི་ལས་གཞི་གལ་ཆེན”ཇུས་འདོན་ལ་དམིགས་ཏེ་ཞབས་ཞུའི་ལྟེ་གནས་ཀྱི་ཁྱོན་ཡོངས་མིག་དཔེ་བརྩོན་ལེན་བྱ་རྒྱུ། “ཁྱད་ཆོས་རང་བཞིན་གྱི་འགན་སྒྲུབ་ལས་དོན”ཐབས་འདོན་ལ་དམིགས་ཏེ་རྗེས་སྙེག་དང་མཆོང་བརྒལ་གྱི་དཔེ་སྟོན་བརྩོན་ལེན་བྱས་ཏེ་སྲིད་གྲོས་ལས་དོན་སྤུས་ཚད་ཇེ་མཐོ་དང་ཕན་འབྲས་ཆེ་རུ་གཏང་རྒྱུར་སྐུལ་འདེད་གཏང་དགོས། ཐོག་མཐའ་བར་གསུམ་དུ་རྒྱལ་ཁབ་ལ་འགན་འཁྲི་སྒྲུབ་པ་དང་དམངས་ལ་འགན་འཁྲི་སྒྲུབ་པའི་ཐོག་མའི་ཕུགས་འདུན་གྱི་འགན་འཁྲི་བརྟན་སྲུང་བྱས་ཏེ། ཆེད་དོན་གྲོས་མོལ་སྒྲིག་གཞིའི་ནུས་པ་སྔར་ལས་འདོན་སྤེལ་གང་ལེགས་བྱས་ཏེ། འགན་ཁུར་བྱས་རྗེས་ཡོད་པ་དང་ཧུར་བརྩོན་འབད་འཐབ་ཀྱིས་ཀྲུང་གོའི་ལུགས་ཀྱི་ དེང་རབས་ཅན་གྱི་དཀར་མཛེས་ཁུལ་གྱི་ལེའུ་གསར་པ་བྲི་ཆེད་སྲིད་གྲོས་ཀྱི་བྱས་རྗེས་འབུལ་དགོས།

འཆི་མེད་ཀྱིས་སྲིད་གྲོས་དཀར་མཛེས་ཁུལ་ཨུ་ཡོན་ལྷན་ཁང་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་ཚབ་ཞུས་ནས་ཚོགས་ཆེན་ལ་ཁུལ་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་ཚུན་གྱི་གྲོས་གཞིའི་ལས་དོན་གནས་ཚུལ་སྙན་སེང་ཞུས། ཁུལ་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་ནས་བཟུང་རྒྱ་ཆེ་བའི་ཨུ་ཡོན་དང་། སྲིད་གྲོས་ནང་ཞུགས་པའི་སྡེ་ཚན་ཁག། ཆེད་དོན་ཨུ་ཡོན་ལྷན་ཁང་ཁག་བཅས་ཀྱིས་གྲོས་གཞི་ཁྱོན་བསྡོམས207བཏོན་པ་དང་། 2025ལོའི་ཟླ་བ12པའི་ཚེས31ཉིན་བར་ཞིབ་བཤེར་ཐོ་འགོད་བྱས་པའི་གྲོས་གཞི203ཚང་མར་ལན་བརྒྱབ་པ་རེད།

ཀྲའོ་པོ་ཡིས་ཚོགས་འདུར་གསུང་བཤད་གནང་བ་དང་ཀྲུང་གུང་དཀར་མཛེས་ཁུལ་ཨུའི་ཚབ་མཛད་ནས་ཚོགས་ཆེན་འཚོག་པར་སྤྲོ་སེམས་ཆེན་པོས་རྟེན་འབྲེལ་དང་སྲིད་གྲོས་ཨུ་ཡོན་དང་ཚོགས་ཞུགས་བློ་མཐུན་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་གནང་། ཁོང་གིས་འདས་མ་ཐག་པའི2025ལོ་ནི་དཀར་མཛེས་ཁུལ་གྱིས་ཧུར་བརྩོན་ཆེན་པོས་ཀྲུང་གོ་ལུགས་ཀྱི་དེང་རབས་ཅན་གྱི་ལེའུ་གསར་པ་འབྲི་བའི་བརྒྱུད་རིམ་ཁྲོད་སྔ་མཐུད་རྗེས་སྐྱོང་དང་སྟོབས་བསྡུ་ཐོལ་བརྒལ་བྱུང་བའི་ལོ་ཞིག་རེད། ལོ་གཅིག་རིང་ང་ཚོས་བརྟན་བརླིང་ནི་ལས་འགན་གཙོ་བོ་ཡིན་པ་མཐའ་འཁྱོངས་ནས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་འདུ་ཤེས་བརྟན་པོར་བཅངས་ནས། སྤྱི་ཚོགས་སྤྱི་ཡོངས་རྒྱུན་མཐུད་བརྟན་བརླིང་དང་ཆོས་ལུགས་ཁྱབ་ཁོངས་ཞི་མཐུན་ཡིན་པ། བདེ་འཇགས་སྲུང་ཡོལ་སྔར་བས་སྲ་བརྟན་ཡོང་བ་རེད། ལོ་གཅིག་རིང་ང་ཚོས་འཕེལ་རྒྱས་ནི་ལས་འགན་གཙོ་བོ་ཡིན་པ་མཐའ་འཁྱོངས་ནས་ས་གནས་ཀྱི་གནས་ཚུལ་དང་བསྟུན་ནས་རིག་གནས་ཡུལ་སྐོར་དང་ནུས་རྒྱུ་གཙང་བ། ཁྱད་ཆོས་ཞིང་འབྲོག་བཅས་ཀྱི“དོན་ཆེན་གསུམ”ལེགས་པོར་བྲིས་ནས་འཕེལ་རྒྱས་ཀྱི་སྤུས་ཚད་དང་ཕན་འབྲས་སྔར་བས་ལེགས་སུ་ཕྱིན་ཡོད། ལོ་གཅིག་རིང་ང་ཚོས་སྐྱེ་ཁམས་ནི་བླང་བྱ་གཙོ་བོ་ཡིན་པ་མཐའ་འཁྱོངས་ནས། ཐཱན་བསྙུང་འབག་བསྙུང་དང་འབག་མེད་རྒྱ་བསྐྱེད་ལ་མཐུན་སྦྱོར་དང་སྐུལ་འདེད་བཏང་བས་སྐྱེ་ཁམས་རྨང་གཞི་སྔར་བས་མཛེས་སྡུག་ལྡན། ལོ་གཅིག་རིང་ང་ཚོས་དམངས་འཚོ་ནི་ཆབ་སྲིད་ཀྱི་གྲུབ་འབྲས་གཙོ་བོ་ཡིན་པ་མཐའ་འཁྱོངས་ཏེ། ཞིང་ཆེན་དང་ཁུལ་གྱི་དམངས་འཚོའི་དོན་དངོས་ལེགས་པར་བསྒྲུབས། “9·5”ལྕགས་ཟམ་ཁའི་ས་འགུལ་གྱི་གནོད་རྗེས་བསྐྱར་སྐྲུན་ལས་འགན་ཁྱོན་ཡོངས་ནས་ལེགས་གྲུབ་བྱུང་བ་དང་སྤྱི་པའི་ཞབས་ཞུའི་བྱ་གཞག་གི་སྤུས་ཚད་དང་ཕན་འབྲས་ཆེ་རུ་ཕྱིན་ནས་དམངས་འཚོའི་བདེ་སྐྱིད་སྔར་བས་ཚོར་ཐུབ་པ་བྱུང་ཡོད།

ཀྲའོ་པོ་ཡིས་བསྟན་དོན། གྲུབ་འབྲས་དེ་དག་ཐོབ་པའི་རྩ་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྣེ་ཁྲིད་དང་། ཏང་ཀྲུང་དབྱང་དང་ཞིང་ཆེན་ཏང་ཨུས་འགོ་ཁྲིད་བརྟན་པོ་ལ་རག་ལས་པ་ཡིན་ཞིང་། ཁུལ་ཡོངས་གོང་འོག་གཅིག་སྒྲིལ་དང་དམ་འཛིན་དངོས་སྒྲུབ་བྱས་པའི་འབྲས་བུ་ཡིན་ལ། སྲིད་གྲོས་རིམ་ཁག་རྩ་འཛུགས་དང་རྒྱ་ཆེ་བའི་སྲིད་གྲོས་ཨུ་ཡོན་ཚོས་ཕྱར་བ་གྲུ་འདེགས་དང་། ལག་སྦྲེལ་འབད་བརྩོན་བྱས་པའི་འབྲས་བུ་ཞིག་ཀྱང་རེད། ལོ་གཅིག་རིང་ཁུལ་ཡོངས་ཀྱི་སྲིད་གྲོས་ཁོངས་གཏོགས་ཀྱིས་མཐུན་སྒྲིལ་དང་དམངས་གཙོའི་གཙོ་དོན་གཞི་ཆེན་པོ་གཉིས་དམ་འཛིན་བྱས་ཏེ། ཆབ་སྲིད་ཀྱི་ཁ་ཕྱོགས་གཅིག་མཐུན་དང་ནང་སེམས་ཀྱི་བསམ་བློའི་གཅིག་འདྲེས། བྱ་སྤྱོད་ཀྱི་གོམ་ཁ་མཉམ་སྤོ་བཅས་རྒྱུན་འཁྱོངས་ཏེ། “གོང་བུ་འདུས་ཤུགས”ཇེ་ཆེར་དང“ཐབས་བཀོད་ལེགས་པོ”ཇེ་མང་། “ཉམས་འགྱུར་གསར་པ”ཇེ་ཡག་ལ་འགྲོ་བཞིན་ཡོད་པས། ཁུལ་ཡོངས་ལ་སྲིད་གྲོས་ཀྱི་འགན་འཁྲི་མངོན་པ་དང་སྲིད་གྲོས་ཀྱི་བྱས་རྗེས་བཞག་པ་རེད།

ཀྲའོ་པོ་ཡིས་བསྟན་དོན། ཁུལ་ཨུ་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་བཅུ་པར“ལོ་ལྔའི་འཆར་འགོད་བཅོ་ལྔ་པའི”དུས་སྐབས་ནི་དཀར་མཛེས་ཁུལ་གྱིས་གནས་བབ་དང་བསྟུན་ནས་མདུན་སྐྱོད་བྱེད་པ་དང་རྗེས་སྙེག་མཆོང་བརྒལ་བྱེད་པའི་དུས་མཚམས་གལ་ཆེན་ཞིག་ཡིན་པར་བརྡར་ཤ་བཅད་པ་རེད། ཁུལ་ཡོངས་ཀྱི་སྲིད་གྲོས་རྩ་འཛུགས་དང་རྒྱ་ཆེ་བའི་སྲིད་གྲོས་ཨུ་ཡོན་ཚོས“ལོ་ལྔའི་འཆར་འགོད་བཅོ་ལྔ་པའི”དམིགས་འབེན་ལ་དམིགས་ནས། བློ་རིག་ལྡན་པའི་གཏམ་བཤད་དང་སེམས་ཤུགས་གཅིག་སྒྲིལ། དངོས་སྒྲུབ་དོན་གཉེར་བཅས་བྱས་ཏེ། མྱུར་སྒྲུབ་ལ་བརྩི་མཐོང་དང་དངོས་སྒྲུབ་ཧུར་བརྩོན། དཀའ་སྒྲུབ་ལ་མི་སྐྲག་པ། ཐབས་སྒྲུབ་ལ་མཁས་པར་བཅས་བྱས་ཏེ། རྒྱང་ལམ་གསར་པར་འགན་འཁྲི་གསར་པ་དང་གྲུབ་འབྲས་གསར་པ་འཐོབ་པར་འབད་བརྩོན་བྱ་དགོས།

ཀྲའོ་པོ་ཡིས་བསྟན་དོན། ཁ་ཕྱོགས་བརྟན་པོ་དམ་འཛིན་བྱེད་པའི་ཐད་སྔར་ལས་བློ་བརྟན་འགྱུར་མེད་བྱས་ཏེ་ཐོག་མཐའ་བར་གསུམ་དུ་ཏང་གི་འགོ་ཁྲིད་མཐའ་འཁྱོངས་པ་དེ་ཆབ་སྲིད་ཀྱི་རྩ་བའི་རྩ་དོན་དང་ཆབ་སྲིད་ཀྱི་འགན་འཁྲི་གལ་ཆེན་དུ་བརྩི་དགོས་པ་དང་། ཆབ་སྲིད་ལ་མཐོང་ཆེན་བྱ་རྒྱུ་དེ་སྲིད་གྲོས་ལས་དོན་གྱི་ལས་འགན་སྒྲུབ་པའི་བརྒྱུད་རིམ་ཧྲིལ་པོར་ཁྱབ་པ་དང་། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་སྔར་ལས་ཤེས་རྟོགས་ཟབ་མོ་དང“སྲུང་སྐྱོང་གཉིས”མཐའ་གཅིག་ཏུ་སྒྲུབ་ཐུབ་པ་བྱ་དགོས། ཞབས་ཞུ་འཕེལ་རྒྱས་ཐད་སྔར་བས་གནད་ལ་འཁེལ་ཞིང་ལས་ཆོད་ཆེ་བ་དང་། བསྒྱུར་བཅོས་སྔར་བས་ཁྱོན་ཡོངས་ནས་ཟབ་ཏུ་གཏང་བ་དང་། འཕེལ་རྒྱས་སྤུས་ཚད་མཐོན་པོར་སྐུལ་འདེད་གཏང་བ་དང་དམངས་འཚོ་འགན་སྲུང་ལེགས་སུ་གཏང་བ། སྤྱི་ཚོགས་བརྟན་བརླིང་སྲུང་སྐྱོང་བྱེད་པ་སོགས་གཙོ་གནད་དང་དཀའ་གནད་ཀྱི་གནད་དོན་ལ་དམ་པོར་དམིགས་ནས། བརྟག་དཔྱད་ཞིབ་འཇུག་གཏིང་ཟབ་དང་གྲོས་མོལ་གྲོས་བསྡུར་གཏིང་ཟབ། རྒྱ་ཁྱབ་བློ་འདྲི་དང་རིགས་པས་ཁུངས་སྐྱེལ་བྱེད་པ། ལྟ་སྐུལ་གྱི་གཙོ་གནད་དམ་འཛིན་བཅས་བྱས་ཏེ་རྒྱང་ལྟ་རང་བཞིན་དང་གསར་གཏོད་རང་བཞིན། བཀོལ་སྤྱོད་རང་བཞིན་ཆེ་བ་བཅས་ཀྱི་ཐབས་ཇུས་དང་གྲོས་འགོ་དེ་བས་མང་བ་འདོན་དགོས། མི་སེམས་གཅིག་སྒྲིལ་ཐད་སྔར་ལས་རྒྱ་ཁྱབ་དང་ཤུགས་ཆེན་དུ་བཏང་ནས། མི་དམངས་སྲིད་གྲོས་ཏང་ཨུ་སྲིད་གཞུང་དང་ལས་རིགས་ཁག་གི་མང་ཚོགས་དང་འབྲེལ་གཏུག་བྱེད་པའི་འབྲེལ་ཐག་ཡིན་པའི་ནུས་པ་འདོན་སྤེལ་གང་ལེགས་བྱས་ཏེ། དོགས་གཞི་སེལ་བ་དང་འབྲེལ་བ་མཐུན་སྦྱོར། འགལ་བ་སེལ་བའི་ལས་དོན་མང་པོ་བསྒྲུབས་ནས། མཐུན་པ་ཡོང་ཐབས་ཆེ་ཤོས་དང་གཅིག་མཐུན་རི་མོ་ལེགས་པོར་འབྲི་བ། དྲང་ནུས་ཆེ་ཤོས་བསྡུ་རུབ་བཅས་བྱ་དགོས། ནང་སྟོབས་སྦྱོང་བརྡར་བྱེད་པའི་ཐད་སྔར་ལས་ཟབ་ནན་དང་དོན་དངོས་འཚོལ་ཞིབ་བྱས་ཏེ། བསམ་གཞིགས་བསྒྱུར་བཅོས་དང་འདུ་ཤེས་གསར་གཏོད། དངོས་སྒྲུབ་བྱ་ཐབས་བཅས་ལ་བརྟེན་ནས་སྲིད་གྲོས་ལས་དོན་ལམ་ལུགས་ཅན་དང་ཚད་ལྡན་ཅན། གོ་རིམ་ཅན་བཅས་ཀྱི་ཆུ་ཚད་མཐོ་རུ་གཏང་དགོས། ཆབ་སྲིད་གྲོས་མོལ་དང་དམངས་གཙོ་ལྟ་སྐུལ། སྲིད་ཞུགས་སྲིད་གྲོས་ཀྱི་ནུས་པ་རྒྱུན་ཆད་མེད་པར་ཆེ་རུ་བཏང་སྟེ། “སྲིད་གྲོས་ཤེས་པ་དང་གྲོས་མོལ་ཤེས་པ། སྲིད་གྲོས་མཁས་པ་དང་སྒྲིག་ཁྲིམས་སྲུང་བ། སྒྲིག་སྲོལ་ལ་བརྩི་བ་དང་སྤྱོད་ལམ་ལ་མཐོང་ཆེན”བཅས་བྱེད་པའི་སྲིད་གྲོས་ཨུ་ཡོན་དཔུང་ཁག་ཅིག་ཤུགས་ཡོད་རྒུས་འཛུགས་དགོས། འགན་འཁུར་གྱི་བྱ་སྤྱོད་ཐད་སྔར་ལས་གཟེངས་སུ་ཐོན་པ་དང་བྱེད་ཐབས་སྔར་བས་དོན་གཉེར་ཡིན་པའི་སྒོས་སྤྱི་ཡོངས་ལ་ཞབས་འདེགས་ཞུ་བ། འགན་འཁུར་སྔར་ལས་སྟོབས་ཆེན་གྱི་ཐོག་ནས་གནས་བབ་གསར་པ་གསར་འབྱེད་བྱས་ཏེ་དཀར་མཛེས་ཁུལ་གྱི་སྲིད་གྲོས་བྱ་གཞག་འཕེལ་རྒྱས་སྤུས་ཚད་མཐོན་པོར་ཡོང་བར་སྐུལ་འདེད་ཧུར་ཐག་གཏང་དགོས།

གདན་ཞུས་ལྟར་འགོ་འཛུགས་ཚོགས་ཆེན་ལ་ཕེབས་པ་དང་ཀྲུའུ་ཞི་སྟེགས་བུར་བཞུགས་མཁན་གྲས་སུ་ཀྲུང་གུང་དཀར་མཛེས་ཁུལ་ཨུ་དང་། ཁུལ་མི་དམངས་འཐུས་ཚོགས་རྒྱུན་ལས་ཨུ་ལྷན། ཁུལ་མི་དམངས་སྲིད་གཞུང་། དཀར་མཛེས་ཡན་ལག་དམག་ཁུལ། ཁུལ་འབྲིང་རིམ་མི་དམངས་ཁྲིམས་ཁང་། ཁུལ་མི་དམངས་ཞིབ་དཔྱོད་ཁང་བཅས་ཀྱི་མགོ་ཁྲིད་བློ་མཐུན་དང་། སི་ཁྲོན་མི་རིགས་སློབ་གླིང་། དཀར་མཛེས་ལས་རིགས་སློབ་གླིང་། དྲག་ཆས་ཉེན་རྟོག་ཡན་ལག་རུ་ཁག། ཀྲེ་ཅང་ཞིང་ཆེན་དཀར་མཛེས་རོགས་སྐྱོར་ལས་དོན་རུ་ཁག་བཅས་ཀྱི་འགན་འཁུར་བློ་མཐུན་གཙོ་བོ་དང་ཁུལ་སྲིད་གྲོས་ཀྱི་བློ་མཐུན་རྒན་རབས། ཁུལ་སྡོད་ཞིང་ཆེན་སྲིད་གྲོས་ཨུ་ཡོན་བཅས་ཡོད།

རྫོང(གྲོང་ཁྱེར)ཁག་གི་ཧྲུའུ་ཅི། ཁུལ་རིམ་པའི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན། ཞིང་ཆེན་ཁོངས་གཏོགས་སྲིད་འཛིན་ཁེ་ལས་དང་དོན་ལས་སྡེ་ཚན་གྱི་འགན་འཁུར་བློ་མཐུན། ཁུལ་ཁོངས་གཏོགས་ཁེ་ལས་དང་དོན་ལས་སྡེ་ཚན་གྱི་འགན་ཁུར་བློ་མཐུན། ཁུལ་སྲིད་གྲོས་ཨུ་ཡོན་མིན་པའི་ཁུལ་སྲིད་གྲོས་ཀྱི་དྲུང་ཡིག་ཆེན་མོ་གཞོན་པ་དང་། ཨུ་ཡོན་ལྷན་ཁང་ཁག་གི་ཀྲུའུ་རེན། ཀྲུའུ་རེན་གཞོན་པ་བཅས་འགོ་འཛུགས་ཚོགས་འདུར་ཟུར་ཞུགས་བྱས་པ་རེད། །