རང་ལ་ནད་དུག་འགོས་རྗེས་སྦ་གསང་བྱས་པས་ཁྲིམས་ཆད་ཕོག

        སྤྱི་ཟླ་11པའི་ཚེས་5ཉིན། སི་ཁྲོན་ཞིང་ཆེན་ཏ་ཀྲོའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་སྤྱི་ལོ་2020ལོའི་ལོ་འཁོར་གྱི་གྲོང་ཁྱེར་ཧྲིལ་པོའི་ཁྲིམས་ཁང་གི་དཔེ་མཚོན་གྱོད་གཞི་ཆེན་པོ་བཅུ་ཁྱབ་བསྒྲགས་བྱས་ཡོད།

        དེའི་ཁྲོད། གྱོད་དཔེ་དང་པོ་ནི་ཞུ་སྦྱོར་ཕྱི་མ་ཀྲུང་ཆེ་གེ་མོས་རིམས་ནད་འགོག་བཅོས་ལ་འགལ་རྐྱེན་བཟོས་པའི་གྱོད་གཞི་དེ་ཡིན།
        དེ་ཡང་། མི་དེས་རྐང་བཙུགས་ནས་འགུལ་སྐྱོད་བྱ་ཡུལ་དང་འབྲེལ་གཏུག་བྱ་མི་སྦ་གསང་བྱས་པས། ཁོ་དང་འབྲེལ་གཏུག་དམ་ཟབ་བྱེད་མཁན་ཁྲོད་ཀྱི་མི་4ལ་ཏོག་གསར་གློ་ཚད་རིམས་ནད་འགོས་པ་དང་མི་106གསོ་རིག་ལོགས་དབྱེ་བྱ་དགོས་བྱུང་ཡོད།  
        གྱོད་དོན་འདིའི་གནས་ཚུལ་དངོས་དང་ཞུ་སྦྱོར་ཕྱི་མའི་འགྱོད་བཤགས་བྱས་ཚུལ་ལ་གཞིགས་ནས། རིམས་ནད་འགོག་བཅོས་ལ་འགལ་རྐྱེན་བཟོས་པའི་བྱས་ཉེས་སུ་ཞུ་སྦྱོར་ཕྱི་མ་ཀྲུང་ཆེ་གེ་མོར་དུས་བཀག་བཙོན་འཇུག་ལོ་གཅིག་གི་ཉེས་ཆད་བཅད་ཡོད། འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་རྗེས། ཀྲུང་ཆེ་གེ་མོས་ཁྲིམས་གཏན་འཁེལ་བའི་དུས་ཚོད་ནང་བསྐྱར་གཅོད་ཞུ་གཏུག་བྱས་མེད་པས། འདྲི་གཅོད་དང་པོའི་དཔྱད་མཚམས་ལ་ཁྲིམས་ནུས་ཐོན་ཡོད།
        གྱོད་དོན་ངོ་སྤྲོད་བྱས་པར་གཞིགས་ན། ཏོག་གསར་གློ་ཚད་རིམས་ནད་ཐོག་མར་མཆེད་དུས། ཞུ་སྦྱོར་ཕྱི་མ་ཀྲུང་ཆེ་གེ་མོས་སྡེ་ཁུལ་གྱི་རིམས་འགོག་སྤྱི་བསྒྲགས་སྣང་མེད་བཏང་སྟེ། སྤྱི་ལོ་2020ལོའི་ཟླ་1པོའི་ཚེས་22ཉིན་ཧུའུ་པེ་ཞིང་ཆེན་ཨེ་ཀྲོའུ་གྲོང་ཁྱེར་དུ་ཕྱིན་པའི་དོན་དངོས་སྦ་གསང་བྱས་ནས་སི་ཁྲོན་ཞིང་ཆེན་གྱི་མངའ་ཁོངས་སུ་གཉེན་གྲོགས་དང་ཐུག་འཕྲད་འདུ་འཛོམས་ཡང་སེ་བྱས་པ་མ་ཟད། སྒོ་རྩིས་ཚོང་ཁང་ཆེ་གྲས་དང་ཇ་ཁང་སོགས་མི་ཚོགས་མང་སར་ཡང་ཐེངས་མང་ཕྱིན་ཡོད།

        ལོ་དེའི་ཟླ་2པའི་ཚེས་4ཉིན། ཀྲུང་ཆེ་གེ་མོར་ཏོག་གསར་གློ་ཚད་རིམས་ནད་འགོས་པ་གཏན་འཁེལ་བྱུང་ཡོད། ནད་རྟགས་གཏན་འཁེལ་བྱས་རྗེས། ཀྲུང་ཆེ་གེ་མོས་ཤེས་བཞིན་དུ་རང་ཉིད་ཀྱི་2020ལོའི་ཟླ་1པོའི་ཚེས་28ཉིན་ནས་ཟླ་2པའི་ཚེས་2ཉིན་བར་གྱི་འགུལ་སྐྱོད་བྱ་ཡུལ་དང་འབྲེལ་གཏུག་བྱ་མི་སྦ་གསང་བྱས་ཏེ་རང་ཉིད་དང་བཟའ་མི་ཚང་མ་ཁྱིམ་དུ་བསྡད་དེ་ཕྱིར་སྐྱོད་མེད་ལུགས་རྫུན་ཞུ་བྱས་ཡོད། དོན་དངོས་སྦ་གསང་བྱས་པའི་བྱ་སྤྱོད་དེས་འབྲེལ་ཡོད་སྡེ་ཚན་གྱིས་དུས་ཐོག་ཏུ་རིམས་ནད་དོ་དམ་ཚོད་འཛིན་བྱ་རྒྱུར་འགལ་རྐྱེན་ཆེན་པོ་བཟོས་ཡོད་པ་རེད།

        རྒྱལ་ཡོངས་གོང་འོག་ཚང་མས་རྡོག་རྩ་གཅིག་ཏུ་སྒྲིལ་ནས་རིམས་ནད་འགོག་བཅོས་བྱེད་པའི་འགག་རྩའི་དུས་སྐབས་སུ། རིམས་ནད་ཐོན་མང་བའི་ས་ཁུལ་གྱི་ཆ་འཕྲིན་རིམ་བཤེར་དང་འབྲེལ་ཡོད་ལོགས་དབྱེའི་བྱ་ཐབས་དོན་འཁྱོལ་ནན་པོ་བྱ་རྒྱུ་ནི་མགོ་ཁུངས་ནས་རིམས་ནད་འགོས་ཁྱབ་འགྲོ་རྒྱུ་བཀག་འགོག་བྱེད་པའི་རྨང་གཞིའི་རང་བཞིན་གྱི་འགོག་སྲུང་བྱ་ཐབས་ཤིག་ཡིན། འོན་ཀྱང་། མི་ཁག་གཅིག་གིས་སྒེར་སེམས་ཆེན་པོས་རྐང་བཙུགས་ནས་འགུལ་སྐྱོད་བྱ་ཡུལ་དང་འབྲེལ་གཏུག་བྱ་མི་སྦ་གསང་བྱས་པ་དང་རིམས་འགོག་བྱ་ཐབས་དོན་འཁྱོལ་མ་བྱས་པས། རིམས་ནད་སྔོན་འགོག་ཚོད་འཛིན་བྱ་རྒྱུའི་ཐད་ཉེན་ཁ་དང་བར་ཆད་ཆེན་པོ་བཟོས་ཡོད་པ་རེད། །