ཁོང་རྣམ་པས་འགྲེམ་ཚོགས་འདིའི་ཐོག་རང་མི་རིགས་རིག་གནས་དར་སྤེལ་བཏང་།

        སྤྱི་ཟླ་9པའི་ཚེས་16ཉིན་གྱི་སྔ་དྲོར། སྐབས་བཅོ་བརྒྱད་པའི་ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་ཚོགས་འདུའི་སྒོ་འབྱེད་མཛད་སྒོ་དང་སྐབས་བཅོ་བརྒྱད་པའི་ཀྲུང་གོའི་ནུབ་རྒྱུད་རྒྱལ་སྤྱིའི་མཉམ་ལས་གླེང་སྟེགས་ཁྲེང་ཏུའུ་ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་གྲོང་ཁྱེར་དུ་སྒོ་འབྱེད་པ་དང་། རྒྱལ་ཁབ་དང་ས་ཁུལ་66གི་སྐུ་མགྲོན་དང་ཚོང་མགྲོན་ཁྲི་5ལྷག་མཉམ་དུ་འཛོམས་ཏེ། དྲ་ཐོག་དང་ཡུལ་དངོས་ཟུང་འབྲེལ་གྱི་རྣམ་པའི་འགྲེམ་ཚོགས་སུ་ཞུགས།

        རྒྱུས་ལོན་བྱས་པར་གཞིགས་ན། ཐེངས་འདིའི་འགྲེམ་ཚོགས་ཐོག་སི་ཁྲོན་ཞིང་ཆེན་གྱི་གྲོང་ཁྱེར་དང་ཁུལ་17གྱིས་ལྗང་མདོག་སྐྱེ་ཁམས་དང་། སྨན་རྫས་བདེ་ཐང་། རིག་གནས་ཡུལ་སྐོར། ཟས་རིགས་འཐུང་ཆུ། སྒྲིག་ཆས་བཟོ་སྐྲུན་སོགས་ཀྱི་ཁྱབ་ཁོངས་གཙོ་བོར་བྱས་པའི་འགྲེམ་ཚོང་སྤེལ་བ་དང་། དཀར་མཛེས་ཁུལ་དང་རྔ་བ་ཁུལ་གཉིས་ཀྱིས་ཁུལ་དང་རྫོང་ཁག་སོ་སོའི་ཁྱད་ཆོས་དང་ལེགས་ཆ་འབུར་དུ་ཐོན་པའི་ཁྱད་ལྡན་ཐོན་རྫས་བགྲང་ལས་འདས་པ་ཞིག་འགྲེམ་ཚོང་བྱས་ཡོད།

        རྔ་བའི་འགྲེམ་ཁུལ་གྱི་ཧུང་ཡོན་འགྲེམ་ཁུལ་དུ་ཀུན་ཕན་ཞིང་འབྲོག་ཆེན་ལས་མཉམ་ལས་ཁང་གི་ཁྱད་ལྡན་ཐོན་རྫས་ལ་མི་རྣམས་ཀྱིས་དགའ་བསུ་ཆེན་པོ་ཐོབ་བཞིན་འདུག་པར། མགྲོན་པོ་རྣམས་ཀྱིས་ལྷད་མེད་འོ་ཞོའི་རོ་བཅུད་ལ་མྱོང་རོལ་བྱེད་ཞོར་དུ་ཞོ་སྒམ་རེ་གཉིས་ཉོས་ཏེ་འགྲོ་བཞིན་མཆིས། གསར་འགོད་པས་རྒྱུས་ལོན་བྱས་པ་ལྟར་ན། ཆེད་ལས་མཉམ་ལས་ཁང་འདི་2016ལོར་བཙུགས་པ་དང་། ཧུང་ཡོན་རྫོང་གིས་དམངས་འཚོའི་ཁེ་ལས་ཆེས་ཆེ་བ་དེ་ཡིན་ཏེ། སྡེ་པ་44ཡན་གྱི་དཔལ་འབྱོར་རྩ་འཛུགས་དང་ཆེད་ལས་མཉམ་ལས་ཁང་གིས་གཞི་གཅིག་ཏུ་གྲུབ་པ་དང་། 2018ལོར་ཞིང་ཕྱུག་ཐོན་རྫས་དར་སྤེལ་ཚད་ཡོད་སྤྱི་གཉེར་ཁང་བཙུགས་ཏེ། མི་རིགས་མཐུན་སྒྲིལ་དང་མི་དམངས་ལ་ཕན་བདེ་སྐྲུན་པའི་དམིགས་ཡུལ་གྱིས་དབུལ་གྲོལ་འགག་སྒྲོལ་ལས་དོན་ཐད་ཞབས་འདེགས་ཆེན་པོ་གནང་ཡོད།

        དེ་ཡང་ཁུལ་གཉིས་ཀྱི་འགྲེམ་ཁུལ་སོ་སོས་པར་རིས་དང་བརྙན། དྲྭ་ཐོག་ཐད་གཏོང་། དངོས་རྫས་འགྲེམ་འཁྲབ། ཡུལ་དངོས་མྱོང་ཚོར། མི་རིགས་ཀྱི་གླུ་གར་སོགས་སྤྱད་དེ་དཀར་མཛེས་ཁུལ་གྱི་ཞིང་འབྲོག་ཐོན་ཁུངས་དང་། ཡུལ་སྐོར་ཐོན་ཁུངས། སྐྱེ་ཁམས་བཟོ་ལས་ཐོན་ཁུངས། དེང་རབས་ཞབས་ཞུའི་ཐོན་ཁུངས། ཁྱད་ལྡན་རིག་གནས་ཐོན་ཁུངས་བཅས་གཅིག་སྡུད་ཐོག་འགྲེམ་སྟོན་བྱས་ཤིང་། འགྲེམ་སྟོན་ལ་ལྟ་སྐོར་བྱེད་པའི་སྤྲོ་སྣང་འཕེལ་བ་དང་ཉོ་ཚོང་བར་གྱི་མཉམ་འགུལ་གྱི་ནུས་པ་མཐོ་རུ་གཏོང་ཆེད། འགྲེམ་ཁུལ་གྱི་ཡུལ་དངོས་ནས་མི་རིགས་ཀྱི་གླུ་གར་དང་། བོད་རིགས་ཀྱི་རྒྱན་གོས་ངོམ་སྟོན། ཐང་ག་བཤམ་སྟོན་སོགས་གྲ་སྒྲིག་བྱས་ཡོད་པར་མ་ཟད། རྡོ་བརྐོས་སོགས་ཀྱི་ལག་ཤེས་པ་གདན་དྲངས་ནས་ཡུལ་དངོས་ནས་ཐང་ག་འབྲི་བཞིན་པ་དང་། རྡོ་བརྐོ་བ་སོགས་ཀྱི་འགྲེམ་སྟོན་དམིགས་བསལ་ཅན་དང་ཁྱད་པར་ཅན་བཀོད་སྒྲིག་བྱས་འདུག །

        ཐེངས་འདིའི་འགྲེམ་ཚོགས་སུ་དཀར་མཛེས་ཁུལ་གྱིས་ཕྱོགས་གང་ཅིའི་ཐད་ནས་ནུས་ཤུགས་ཆེན་པོ་བཏོན་ཡོད་དེ། ཐོན་རྫས་ཕྱིར་འཚོང་དང་རིག་གནས་ཁྱབ་བསྒྲགས་ཀྱི་ཆེད་དུ། ཁུལ་ནང་གི་དྲ་གྲགས་མང་པོ་ཞིག་གདན་ཞུ་བྱས་ནས་དྲ་ཐོག་ཐད་གཏོང་གི་བྱེད་སྒོ་འགྲེམ་ཚོགས་སྤེལ་རིང་གི་ཉིན་དུ་མར་རྒྱུན་ཆད་མེད་པར་སྤེལ་བཞིན་པ་དང་། དྲ་གྲགས་དེ་དག་གིས་རང་རང་གི་ལས་འགན་གང་ནུས་ཀྱིས་ལེགས་འགྲུབ་རྒྱུན་འཁྱོངས་བྱས་མཐར། ངལ་གསོའི་དུས་ཚོད་བེད་སྤྱད་དེ་ཚོང་རྫས་གཞན་དག་དང་རང་ཕ་ཡུལ་གྱི་རིག་གནས་ཚོང་རྫས་ཀྱང་ཅི་ནུས་ཀྱིས་ངོ་སྤྲོད་དང་ཁྱབ་བསྒྲགས་བྱེད་བཞིན་པ་རེད། ཕ་ཡུལ་དར་མདོ་གྲོང་ཁྱེར་ལྷ་སྒང་འབྲོག་སྡེ་ནས་ཡིན་པས་དྲ་གྲགས་ཧོར་བསོད་དབང་ལྷ་མོས་གསར་འགོད་པར་བཤད་རྒྱུར། ང་རང་དྲ་གྲགས་སམ་དྲ་ཐོག་ཚོང་པ་ཞིག་གི་ཆ་ནས་དུས་དང་རྣམ་པ་ཀུན་དུ་ཕ་ཡུལ་གྱི་རིག་གནས་ཁྱབ་བསྒྲགས་བྱ་རྒྱུ་དེ་ཡིད་ལ་དམ་པོར་འཆང་ཡོད། ད་ཐེངས་འགྲེམ་ཚོགས་འདི་འདྲ་ཆེན་པོར་ཞུགས་པ་ཐེངས་དང་པོ་ཡིན་མོད། ཡིན་ཡང་རང་གི་འོས་འགན་ལེགས་པོ་འཁྱོངས་རྒྱུ་དེ་སྨོས་མ་དགོས་པ་རེད།

        ཐེངས་འདིའི་འགྲེམ་ཚོགས་ཉིན་ལྔའི་རིང་སྤེལ་རྒྱུ་ཡིན་ཏེ། སྤྱི་ཚེས་20ཉིན་དངོས་སུ་མཇུག་བསྒྲིལ་རྒྱུ་རེད།