པཎ་ཆེན་རིན་པོ་ཆེས་ཀན་སུའུ་རུ་བརྟག་དཔྱད་ཞིབ་འཇུག་གནང་བ་དང་འབྲེལ་ཆོས་ལུགས་བྱེད་སྒོ་སྤེལ་བ།

“སྔོན་ཆད་ང་ཡང་འབྲོག་པ་ཞིག་ཡིན། སྔོན་ཆད་འབྲོག་པའི་འཚོ་བ་ནི་ཉེན་ཁ་ཤིན་ཏུ་ཆེ་ཞིང་འགན་ལེན་མེད་པ་ཞིག་ཡིན་པ་ངས་ཤེས་ཡོད”ཅེས་བཤད། ཟླ་7ཚེས་24ཉིན་པཎ་ཆེན་རིན་པོ་ཆེ་ཀན་སུའུ་ཞིང་ཆེན་ཀླུ་ཆུ་རྫོང་མཚོ་ཉིན་གྲོང་རྡལ་ཀ་ཤུལ་གྲོང་ཚོ་བཀྲ་ཤིས་གཞིས་ཀར་ཕེབས་སྐབས་འབྲོག་པའི་སྤྲོ་སྐྱིད་ཁང་གི་སྦྱིན་བདག་གུ་རུ་བཀྲ་ཤིས་དང་མཉམ་དུ་བཞུགས་ནས་འཚོ་བའི་སྐོར་གླེང་།
གུ་རུ་བཀྲ་ཤིས་ཀྱི་སྒོ་རའི་ནང་མགྲོན་ཁང་གི་སྒེའུ་ཁུང་གཙང་མ་ཞིང་སྒོ་རའི་ནང་རྐུབ་སྟེགས་བསྒྲིགས་ནས་མགྲོན་པོ་རྣམས་ལ་ཁ་བརྡ་བྱེད་པར་འདུག་སྟེགས་མཁོ་འདོན་བྱས་ཡོད། གླེང་མོལ་བྱེད་སྐབས་ཤེས་རྟོགས་བྱུང་བར་གཞིགས་ན། ཉེ་བའི་ལོ་ཤས་རིང་། ཀ་ཤུལ་གྲོང་ཚོས་རྩྭ་ཐང་གི་གུར་དང་འབྲོག་པའི་གཞིས་ཀ་རྩེ་གྲ་གཙོ་བོར་བྱས་པའི་གྲོང་གསེབ་ཀྱི་ཡུལ་སྐོར་སྤུས་རྟགས་བཏོད་པས་ཁོར་ཡུག་སྔར་ལས་ལེགས་ལ་གྲོང་མིའི་ཡོང་འབབ་ཀྱང་སྔར་ལས་མང་དུ་ཕྱིན་ཡོད་པ་རེད། 2020ལོར་གུ་རུ་བཀྲ་ཤིས་ཀྱིས་འབྲོག་པའི་གཞིས་ཀ་གཉེར་སྐྱོང་བྱས་པའི་ཡོང་འབབ་སྒོར་ཁྲི་3ཟིན་ཡོད་པ་རེད།
2003ལོ་དང་2010ལོར། པཎ་ཆེན་རིན་པོ་ཆེས་སྔ་རྗེས་སུ་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་དུ་བརྟག་ཞིབ་ཐེངས་གཉིས་གནང་མྱོང་ཡོད། སླར་ཡང་ཀན་ལྷོར་འབྱོར་སྐབས་ལམ་བར་དུ་དད་ལྡན་མང་ཚོགས་དང་རྟག་ཏུ་འཕྲད་ཀྱི་ཡོད་པ་དང་། དཔུང་ཁག་དེར་སྤྱིར་ན་སྨི་བརྒྱ་ཕྲག་དང་ཐ་ན་སྟོང་ཕྲག་ཁ་ཤས་ལས་མེད་པའི་ནང་ས་ཆ་གཞན་ནས་ཆེད་མངགས་ཡོང་བའི་དགེ་འདུན་པ་དང་དད་ལྡན་མང་ཚོགས་མང་པོ་ཡོད་པ་རེད། དད་ལྡན་མང་ཚོགས་ཀྱི་དཔུང་ཁག་དང་འཕྲད་ཐེངས་རེར་པཎ་ཆེན་རིན་པོ་ཆེས་རླངས་འཁོར་དལ་བགྲོད་དམ་ཡང་ན་སྒེའུ་ཁུང་ཕྱེ་བའམ་ཡང་ན་རླངས་འཁོར་ནས་བབས་ཏེ་དད་ལྡན་མང་ཚོགས་ལ་འཛུམ་དམུལ་དམུལ་ངང་ཕྱག་གཡུག་གཡུག་གནང་བ་རེད།
ཀན་ལྷོ་ཁུལ་དུ་བཞུགས་རིང་པཎ་ཆེན་རིན་པོ་ཆེས་སྔ་རྗེས་སུ་དཔལ་ཤེས་སྟེང་ཁ་དགོན། བེ་ཤིང་དགོན། ཤིས་ཚང་དགོན། ཁོ་ཚེ་དགོན་བདེ་ལྡན་ཆོས་འཁོར་གླིང་། བླ་བྲང་བཀྲ་ཤིས་དགོན་སོགས་སུ་ཆོས་ལུགས་བྱེད་སྒོ་སྤེལ་བར་ཕེབས་པ་རེད། ས་ཆ་གང་དང་གང་དུ་སླེབས་ཚེ་ས་གནས་དེ་གའི་གྲྭ་དམངས་རྣམས་ཀྱིས་གུས་ལུགས་མཐོ་ཤོས་ཀྱི་ཐོག་ནས་བསུ་བ་ཞུ་གི་ཡོད། དེ་དང་དུས་མཚུངས་པཎ་ཆེན་རིན་པོ་ཆེ་ཀན་སུའུ་རུ་བཞུགས་རིང་བསྙེན་བཀུར་འབྱོར་གནང་བ་མཐའ་དག་ཀྱང་ས་གནས་དེ་གར་བཞག་གནང་བ་རེད།
པཎ་ཆེན་རིན་པོ་ཆེས་བྱ་སྤྱོད་དེ་བརྒྱུད་བོད་བརྒྱུད་ནང་བསྟན་ལས་རིགས་དང་ལྷག་པར་དུ་ན་གཞོན་སྤྲུལ་སྐུ་དང་ཆོས་ལུགས་ལས་རིགས་ཀྱི་འཐུས་ཚབ་མི་སྣ་དེ་བས་མང་བ་སྤྱི་ཚོགས་ཀྱི་སྤྱི་ཕན་ནང་ཞུགས་ནས་མེས་རྒྱལ་དང་མི་དམངས་ཀྱི་ཆེད་དུ་རང་ཉིད་ཀྱི་ལེགས་སྐྱེས་མང་ཙམ་འབུལ་རྒྱུའི་རེ་བ་ཡོད་ཅེས་གསུངས་པ་རེད།
བསང་ཆུ་རྫོང་དང་ལན་ཀྲོའུ་གྲོང་ཁྱེར་དུ་བརྟག་ཞིབ་གནང་རིང། པན་ཆེན་གྱིས་ད་དུང་ཁག་དབྱེ་ནས་ས་གནས་དེ་གའི་དབྱི་སི་ལན་ཆོས་ཚོགས་ཀྱི་འཐུས་མིར་མཇལ་འཕྲད་གནང་བ་རེད། ཆོས་ལུགས་དེ་གཉིས་ཀ་ནི་ཕྱི་ཕྱོགས་ནས་ཡོང་བའི་ཆོས་ལུགས་ཡིན་ཞིང་། ཡུན་རིང་གི་ལོ་རྒྱུས་ཁྲོད་མུ་མཐུད་ཀྲུང་གོའི་སྤྱི་ཚོགས་དང་འཚམ་པ་བྱས་པ་མ་ཟད། རིམ་བཞིན་ངང་ཀྲུང་གོའི་རིག་གནས་ཀྱི་གྲུབ་ཆ་ཞིག་ཏུ་གྱུར་ཡོད།
པཎ་ཆེན་རིན་པོ་ཆེས་ཀྲུང་གོའི་ཆོས་ལུགས་ལས་རིགས་ཀྱི་མི་སྣས་རྒྱལ་སྐྱོང་དམངས་ཕན་གྱི་འགན་འཁྲི་ཁུར་ནས་རྒྱལ་གཅེས་ཆོས་གཅེས་ཀྱི་དར་ཆ་མཐོན་པོར་བསྒྲེངས་ཏེ་ཀྲུང་ཧྭ་མི་རིགས་བསྐྱར་དར་ཆེད་ལེགས་སྐྱེས་འབུལ་དགོས་པ་དང་། མི་རིགས་56གི་མི་དམངས་འཆམ་མཐུན་ཡོང་བ་དང་མེས་རྒྱལ་སྟོབས་ཆེར་གཏོང་ཆེད་ལེགས་སྐྱེས་འབུལ་དགོས་ཞེས་གསུངས་པ་རེད།