སི་ཁྲོན་ཞིང་ཆེན་བོད་ཡིག་སློབ་གྲྭ་བཙུགས་ནས་ལོ་༤༠འཁོར་བའི་གྲུབ་འབྲས་ཚོགས་འདུ་སྙན་ཞུ་དར་མདོ་རུ་སྤེལ།

ཟླ༦པའི་ཚེས་༢༨ཉིན་གྱི་སྔ་དྲོར། ཏང་བཙུགས་ནས་ལོ་༡༠༠འཁོར་བ་དང་། སི་ཁྲོན་ཞིང་ཆེན་བོད་ཡིག་སློབ་གྲྭ་བཙུགས་ནས་ལོ་༤༠འཁོར་བའི་གྲུབ་འབྲས་ཚོགས་འདུ་སྙན་ཞུ་དེ་དར་མདོ་རུ་སྤེལ།

སི་ཁྲོན་ཞིང་ཆེན་འཐབ་འགྱུར་པུའུ་ཡི་པུའུ་ཀྲང་གཞོན་པ། ཞིང་ཆེན་མི་རིགས་ཆོས་ལུགས་ཨུ་ཡོན་ལྷན་ཁང་གི་ཏང་ཙུའུ་ཧྲུའུ་ཅི་ཀྲང་ཧྥུ་གོས་གསུང་བཤད་གནང་ནས་ཀྲུང་གོ་གུང་ཁྲན་ཏང་གི་འགོ་ཁྲིད་འོག་བོད་འབྲེལ་ས་ཁུལ་གྱི་ཕྱོགས་གང་ཐད་ལ་གྲུབ་འབྲས་གཡུར་དུ་ཟ་བ་ཐོབ་ཅིང་། ལྷག་པར་དུ་སི་ཁྲོན་ཞིང་ཆེན་བོད་ཡིག་སློབ་གྲྭའི་ལོ་བཞི་བཅུའི་རིང་དུ་འགྱུར་ལྡོག་ཆེན་པོ་བྱུང་ཡོད་པ་ནི་ཏང་བཙུགས་ནས་ལོ་བརྒྱ་འཁོར་བའི་ལེགས་སྐྱེས་བཟང་པོ་ཞིག་རེད་ཅེས་གསུངས། དཀར་མཛེས་ཁུལ་སྲིད་གཞུང་གི་ཁུལ་དཔོན་གཞོན་པ་ཁྲེང་ཅིན་དང་། སི་ཁྲོན་ཞིང་ཆེན་བོད་ཡིག་སློབ་གྲྭའི་སློབ་གཙོ་འཇམ་བློས་ཤིས་ཚིག་ཕུལ་ཞིང་། སློབ་གྲྭའི་ཧྲུའུ་ཅི་གཞོན་པ་ཚེ་རིང་རྡོ་རྗེས་ཚོགས་འདུ་གཙོ་སྐྱོང་གནང་།

སི་ཁྲོན་ཞིང་ཆེན་འཐབ་འགྱུར་པུའུ་ཡི་པུའུ་ཀྲང་གཞོན་པ།

ཞིང་ཆེན་མི་རིགས་ཆོས་ལུགས་ཨུ་ཡོན་ལྷན་ཁང་གི་ཏང་ཙུའུ་ཧྲུའུ་ཅི་ཀྲང་ཧྥུ་གོས་གསུང་བཤད་གནང་བཞིན་པ།

དཀར་མཛེས་ཁུལ་སྲིད་གཞུང་གི་ཁུལ་དཔོན་གཞོན་པ་ཁྲེང་ཅིན་གྱིས་ཤིས་ཚིག་འབུལ་བཞིན་པ།

སི་ཁྲོན་ཞིང་ཆེན་བོད་ཡིག་སློབ་གྲྭའི་སློབ་གཙོ་འཇམ་བློས་ཤིས་ཚིག་འབུལ་བཞིན་པ།

ཚོགས་འདུ་མཇུག་སྒྲིལ་རྗེས་བོད་ཡིག་སློབ་གྲྭའི་སློབ་མ་སྟོང་ལྷག་གིས་“ལོ་བརྒྱའི་སྟོན་ཆེན།”“ཡང་བསྐྱར་ཏང་ལ་གླུ་ཞིག་ལེན།”“བཀྲ་ཤིས་པའི་དུས་ཆེན”སོགས་རིག་རྩལ་འཁྲབ་སྟོན་བྱས།

ཕྱི་དྲོར། སློབ་གྲྭའི་དུས་ཆེན་ཐོག་ཕེབས་པའི་འགོ་ཁྲིད་དང་སྐུ་མགྲོན་ཚོས་སློབ་གྲྭའི་གྲུབ་འབྲས་འགྲེམས་སྟོན་ལ་གཟིགས་པ་རེད།

སི་ཁྲོན་ཞིང་ཆེན་བོད་ཡིག་སློབ་གྲྭ་ནི་བོད་ཀྱི་བཅུ་ཕྲག་རིག་གནས་གཙོ་བོ་དང་། དེང་རབས་རིག་གནས་ཟུར་བརྒྱན་བྱས་པའི་གནའ་དེང་རིག་གནས་བསླབ་སའི་འབྲིང་རིམ་ཆེད་གཉེར་སློབ་གྲྭ་ཞིག་ཡིན། སློབ་གྲྭ་དེ་སྤྱི་ལོ༡༩༨༡ལོའི་ཟླ་༡༠པའི་ཚེས་༥ཉིན་སྡེ་དགེ་རྫོགས་ཆེན་ཤྲཱི་སེང་དུ་དངོས་སུ་བཙུགས་ནས་ཐེངས་དང་པོའི་སློབ་མ་༨༠ལྷག་བསྡུས། སྤྱི་ལོ་༡༩༨༣ལོའི་ཟླ་༧པར་མགར་ཐར་དུ་གནས་གཞི་གཡར་ནས་ཐེངས་གཉིས་པའི་སློབ་མ་བསྡུས། ༡༩༨༥ལོའི་ཟླ་༧པར་རྟའུ་རྫོང་དུ་སློབ་གནས་སྤོས། ༡༩༩༤ལོའི་ཟླ་༣པའི་ཚེས་༡༨ཉིན་དར་མདོ་གཡག་རྭ་ལུང་པར་དངོས་སུ་སྤོས་རྗེས་གཞི་མས་གཏན་སྡོད་བྱུང་བ་ཞིག་རེད། སློབ་གྲྭ་འདིར་ཆེད་སྦྱོང་དུ་བོད་ཀྱི་སྐད་ཡིག་དང་བོད་ཀྱི་གསོ་བ་རིག་པ། བཟོ་རིག་པ། བོད་རྒྱ་ཡིག་སྒྱུར། བོད་རྒྱ་དྲུང་ཡིག །བོད་རྒྱ་རྩིས་འཕྲུལ། ལས་བྱེད་ཟབ་སྦྱོང༌། བོད་རྒྱ་རིག་གནས་ཡུལ་སྐོར་བཅས་དང༌། གཞན་ཡང་དངོས་ཚན་དང་ཆེད་ཚན། ལས་བྱེད་ཟབ་སྦྱོང་འཛིན་གྲྭ་སོགས་རིམ་པ་མི་འདྲ་བའི་འཛིན་གྲྭ་སྣ་མང་ཡོད་པའི་ཕྱོགས་བསྡུས་རང་བཞིན་གྱི་འབྲིང་གཉེར་སློབ་གྲྭ་ཞིག་ཡིན།

བོད་ཡིག་སློབ་གྲྭ་འདིས་སྔོན་རྗེས་སུ་སློབ་མ་ཁྱོན་བསྡོམས་ཁྲི་གཅིག་ལྷག་གསོ་སྐྱོང་བྱས་ཤིང་། སློབ་མ་དེ་དག་པེ་ཅིང་དང་། བོད་འབྲེལ་ལྗོངས་ཞིང་ལྔ་དང་རང་སྐྱོང་ཁུལ། རྫོང་རིམ་པ་ནས་ཡུལ་ཚོ་སོགས་མ་ཁྱབ་པ་མེད་ཅིང་། ལས་རྐང་སོ་སོའི་ཐོག་ནུས་པ་གལ་ཆེན་འདོན་བཞིན་ཡོད། ད་ལྟ་སློབ་གྲྭ་རུ་སློབ་མ་༡༦༠༠ཙམ་དང་། དགེ་རྒན་ལས་བཟོ་༧༦ཙམ་ཡོད།

ལོ་བཞི་བཅུའི་རིང་དུ་གོང་རིམ་གྱི་རིམ་པ་ཁག་གི་ལས་ཁུངས་དང་དབུ་ཁྲིད་རྣམ་པའི་ཐུགས་ཁུར་འོག་སློབ་གྲྭ་དེ་མེད་པ་ནས་ཡོད་པ་དང་། ཡོད་པ་ནས་ཇེ་དར་ཇེ་རྒྱས་སུ་གྱུར་ཅིང་། ད་ལྟ་སློབ་གྲྭའི་འཛུགས་སྐྲུན་སོགས་ཕྱོགས་གང་ཐད་ནས་ལེགས་པོ་འགྲུབ་ཅིང་། མེ་ཏོག་ལྡུམ་ར་ལྟ་བུ་ཆ་རྐྱེན་བཟང་ཞིང་། ཁོར་ཡུག་གཙང་བའི་སློབ་གྲྭ་ཞིག་ཏུ་གྱུར་ཡོད།

དགོང་མོ་ད་དུང་སློབ་གྲྭས་མཉམ་སྤྲོའི་དགོང་ཚོགས་འཚོག་རྒྱུ་རེད།

སློབ་གྲྭའི་གྲུབ་འབྲས་འགྲེམས་སྟོན།