དཀར་མཛེས་ཁུལ་གྱི་སློབ་གྲྭ་ཚོགས་པའི་དུས་ཚོད་གཏན་འཁེལ་བྱས།

སྤྱི་ཟླ་3པའི་ཚེས་27ཉིན། དཀར་མཛེས་ཁུལ་སློབ་གསོ་དང་ལུས་རྩལ་ཅུས་ཀྱིས་སློབ་འགོ་འཛུགས་པའི་བརྡ་ཁྱབ་བསྒྲགས་འདུག །

ཁུལ་ཡོངས་ཀྱི་མཐོ་འབྲིང་ལོ་རིམ་གསུམ་པ་（མཐོ་རྒྱུགས་ལ་ཞུགས་པར་མིང་ཐོ་བཀོད་པའི་འབྲིང་རིམ་ལས་རིགས་སློབ་གྲྭའི་མཐར་ཕྱིན་འཛིན་གྲྭའི་སློབ་མ་）རྣམས་ཞིང་ཆེན་གྱི་བཀོད་སྒྲིག་ལྟར་མཉམ་དུ་སྤྱི་ཟླ་4པའི་ཚེས་1ཉིན་སློབ་འགོ་འཛུགས་རྒྱུ་དང་། དམའ་འབྲིང་ལོ་རིམ་གསུམ་པའི་སློབ་མ་རྣམས་སྤྱི་ཟླ་4པའི་ཚེས་7ཉིན་སློབ་འགོ་འཛུགས་རྒྱུ། སློབ་ཆུང་དང་དམའ་འབྲིང་། མཐོ་འབྲིང་། འབྲིང་རིམ་ལས་རིགས་སློབ་གྲྭ་རྣམས་སྤྱི་ཟླ་4པའི་ཚེས་10ཉིན་སློབ་འགོ་འཛུགས་རྒྱུ་དང་། བུ་བཅོལ་ཁང་དང་དམིགས་བསམ་སློབ་གསོའི་སློབ་གྲྭ་རྣམས་སྤྱི་ཟླ་4པའི་ཚེས་20ཉིན་སློབ་འགོ་འཛུགས་རྒྱུ་ཁྱབ་བསྒྲགས་བྱས་འདུག །