མཐོ་སྒང་ཁྱད་ལྡན་ཐོན་རྫས་ཀྱིས་ཕྱུག་འགྱུར་ལམ་བུ་བཏོད།
ཡོང་ཁུངས། ཚེ་རིང་ལྷ་མོ།
སྤེལ་དུས།: ༢༠༡༩ ལོའི་ཟླ་ ༥ ཚེས་ ༣༡
རི་འཕོངས་སྡེ་བ་ནི་རི་ཁུལ་དུ་གཞིས་ཆགས་པས། ས་ཞིང་ཉུང་ལ་ཁ་ཐོར་དུ་གནས་པ་ཞིག་ཡིན་པས། གཞི་ཁྱོན་ཅན་གྱི་དཔལ་འབྱོར་སྤེལ་བར་མཐུན་རྐྱེན་མི་འཛོམས་པ་དེ་ནི་ས་ཁུལ་དེའི་ཞིང་ལས་ཐོན་ལས་འཕེལ་རྒྱས་ལ་འགྲོ་བའི་གེགས་ཆེན་པོ་ཞིག་ཏུ་གྱུར་འདུག དེ་བས་ཇི་ལྟར་བྱས་ཏེ་དམངས་ཚོགས་རྣམས་དབུལ་བྲལ་ཕྱུག་འགྱུར་བྱེད་པའི་བགྲོད་ལམ་དེ་ཇེ་ཡངས་ལ་གཏོང་བ་ནི། རི་འཕོངས་སྡེ་བའི་ཨུ་ཡོན་ཁང་གཉིས་དང་སྡེ་བཞུགས་ལས་ཀའི་རུ་ཁག་གིས་ལོ་འདི་འགར་བསམ་གཞིག་གང་མང་བྱེད་བཞིན་པའི་གནད་དོན་རེད།
ཞིང་ཆེན་ནང་གི་རིགས་མཐུན་རོགས་སྐྱོར་གྱི་སྲིད་ཇུས་ཀྱིས་མཐུན་རྐྱེན་སྦྱར་བས། ན་ནིང་ཟླ4བར། སི་ཁྲོན་ཞིང་ཆེན་གྱི་མ་བུ་བདེ་སྲུང་ཁང་གིས་འཛམ་ཐང་སྟོད་མ་ཡུལ་ཚོ་རུ་ཉམས་ཞིབ་རང་བཞིན་གྱི་སྤྱིལ་བུ་ཆེན་པོ་ཞིག་བཙུགས་ཏེ། དཔལ་འབྱོར་རིན་ཐང་ཆེ་བའི་ཞིང་ལས་སྐྱེ་དངོས10ལྷག་ལ་ཚོད་ལྟའི་འདེབས་འཛུགས་བྱས། ལོ་གཅིག་གི་རྗེས་སུ། ཡུལ་དེ་རུ་ཞོག་ཁོག་འདེབས་འཛུགས་བྱེད་པར་ཤིན་ཏུ་འཚམས་པ་ཤེས་རྟོགས་བྱུང་བ་རེད། དེའི་ཁར་མང་ཚོགས་རྣམས་ལ་ཞོག་ཁོག་འདེབས་པའི་སྲོལ་རྒྱུན་ཡོད་ལ་ཉམས་མྱོང་གིས་ཕྱུག་པ་དང་། ཞོག་ཁོག་འདེབས་པ་དང་མང་ཚོགས་རྣམས་རི་མགོར་སྨན་རྩྭ་བརྐོ་རུ་འགྲོ་བ་ལ་ཡང་དུས་འདོམ་བྱུང་མེད་པས་ཤིན་ཏུ་སྟབས་བདེ་བ་རེད།
དབུལ་ཕོངས་ཀྱི་རྩ་བ་གཅོད་དགོས་ན་ཐོན་ལས་འཕེལ་རྒྱས་ལ་བརྟེན་དགོས། སྡེ་དམངས་རྣམས་ལ་ཞོག་ཁོག་འདེབས་འཛུགས་ཀྱི་སྲོལ་རྒྱུན་ཡོད་པར་མ་ཟད། འདེབས་འཛུགས་ལག་རྩལ་སླ་མོ་ཡིན་པས་སློབ་བདེ་ལ། རིན་ཐང་བྲལ་བའི་ཉམས་མྱོང་མང་པོ་བསགས་ཡོད་པ་རེད། རྒྱུས་ལོན་པ་ལྟར་ན། ན་ནིང་རི་འཕོངས་སྡེ་བར་ཞོག་ཁོག་རྒྱ་མ3000ལྷག་འདེབས་འཛུགས་བྱས་ཤིང་། ཡོང་འབབ་ཀྱང་ཤིན་ཏུ་མང་།
ད་སྐབས། ཞོག་ཁོག་འདེབས་འཛུགས་རྟེན་གཞི་རུ་ལས་ཀ་རྒྱུན་ལས་བྱེད་པའི་དབུལ་ཕོངས་ཁྱིམ་ཚང་གི་མི12ཡོད་པ་རེད། ཁོ་ཚོས་ལོ་རེར་མི་རེའི་ཆ་སྙོམས་ཡོང་འབབ་སྒོར3000འཕར་སྣོན་བྱས་ཡོད་ཅེས་རི་འཕོངས་སྡེ་བའི་ཧྲུའུ་ཅི་དང་པོ་ཀྲའོ་ཧྥུ་ཝེ་ཡིས་གསར་འགོད་པར་བཤད། འདེབས་འཛུགས་ཁྱིམ་ཚང་གི་ལག་རྩལ་གྱི་དཀའ་གནད་ཐག་གཅོད་བྱེད་སླད། ཁོས་ཆེད་མཁས་ལག་རྩལ་བ་དང་གྲོས་བསྡུར་མང་དུ་བྱས་པ་དང་། ཞིང་ནང་དུ་སོང་སྟེ་འདེབས་འཛུགས་ལག་རྩལ་ཐད་ལ་ནད་བསྟུན་སྨན་ཐོ་བྲིས་པར་མ་ཟད། ཁོ་རང་གི་ཆེད་ལས་ཀྱི་དགེ་མཚན་སྤྱད་དེ། ཞོག་ཁོག་འདེབས་ཆས་ལ་ལེགས་བཅོས་བྱས་ཏེ། མང་ཚོགས་ཀྱི་སྣེ་ཁྲིད་དེ་ཚན་རིག་དང་མཐུན་པའི་འདེབས་འཛུགས་ཀྱི་ལམ་དུ་བསྐྱོད་པ་རེད།
ཞོག་ཁོག་འདེབས་འཛུགས་ཀྱི་ཉམས་མྱོང་རྙིང་བ་ཡིས་རི་འཕོངས་སྡེ་བའི་མང་ཚོགས་ལ་ཕྱུག་འགྱུར་གྱི་རེ་བ་གསར་བ་བསྩལ་བ་རེད། ལྗང་མདོག་དང་སྐྱེ་ལྡན་ཅན་གྱི་མཐོ་སྒང་གི་ཁྱད་ཆོས་ཀྱིས་ཕྱུག་པའི་ཞོག་ཁོག་གི་ཚོང་རྟགས་རིམ་བཞིན་འཛུགས་བཞིན་ཡོད་ལ། མི་དམངས་མང་ཚོགས་ལ་སྣེ་ཁྲིད་དེ་དབུལ་བྲལ་ཕྱུག་འགྱུར་གྱིས་འབྱོར་འབྲིང་གི་ལམ་དུ་བསྐྱོད་དང་སྐྱོད་བཞིན་པ་རེད།