མཚོ་སྔོན་པོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་དཔྱིད་དུས་ཀྱི་རི་ཐང་སྐོར་ཞིབ་འགོ་བརྩམས་པ།
ཡོང་ཁུངས། མི་དམངས་དྲ་བ།
སྤེལ་དུས།: ༢༠༡༩ ལོའི་ཟླ་ ༤ ཚེས་ ༡༥
ལྟ་ཞིབ་ཚད་ལེན་ལས་གསལ་སྟོན་བྱས་པ་སྟེ། དགོ་དམར་14ཡི་བརྟག་དཔྱད་ས་ཁུལ་ལ་བརྟག་དཔྱད་ཞིབ་མོ་བྱས་པར་བརྟེན། དགོ་དམར་2484མཐོང་བ་དང་། དེའི་ནང་ལ་དགོ་བ་ཕོ་729དང་། དགོ་བ་མོ་1755ཡོད། རྫོང་ལ་གཞིགས་ནས་དབྱེ་ན། མཚོ་ལྷོ་བོད་རིགས་རང་སྐྱོང་ཁུལ་ཆབ་ཆ་རྫོང་དུ་24དང་། མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་དུ་335 རྐང་ཚ་རྫོང་དུ་2086 མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཐེམ་ཆེན་རྫོང་དུ་39བཅས་ཡོད། སྲུང་སྐྱོང་ཁུལ་གྱི་མངའ་ཁོངས་ལས་དབྱེ་ན། སྲུང་སྐྱོང་ཁུལ་ནང་དུ་691དང་སྲུང་སྐྱོང་ཁུལ་ཕྱི་རོལ་ཏུ་1793ཡོད།
དུས་མཚུངས་སུ་བསྡོམས་བརྩིས་བྱས་པར་གཞིགས་ན། ཆུ་བྱ་སྡེ་ཚན་9དང་རིགས་32ཁྱོན་བསྡོམས་ཆུ་བྱ་17300ལྷག་མཐོང་ཡོད། དེའི་ནང་ལ་མཚོ་སྔོན་པོར་རྒྱུད་སྤེལ་བྱེད་པའི་དུས་བྱ་ཁྲུང་ཁྲུང་མགོ་ཁྲ་དང་ཆུ་སྐྱར་མགོ་སྨུག ཆུ་སྐྱར། སོ་བྱ་སོགས་མཚོ་སྔོན་པོར་སླེབས་ཟིན་ཅིང་། ཁ་གྲངས་2000ཉེ་བ་ཙམ་ཡོད། སོ་བྱས་ཚང་བཅའ་བཞིན་ཡོད་ལ། ངང་པ་90ལྷག་མཚོ་སྔོན་པོའི་འགྲམ་དུ་བབས་པ་དང་། ཁྲུང་ཁྲུང་སྐེ་ནག་ཀྱང་རིམ་བཞིན་ཚོགས་བསྒྲིགས་ནས་ཡོང་བཞིན་ཡོད།
