2018ལོའི་འཛམ་ཐང་རྫོང་གི་རྟ་རྒྱུག་འགྲན་ཚོགས་དངོས་སུ་འགོ་བརྩམས།
ཟླ8པའི་ཚེས13ཉིན་གྱི་སྔ་དྲོར། 2018ལོའི་ཛམ་བྷ་ལའི་རྟ་རྒྱུག་འགྲན་ཚོགས་ཆེན་མོ་འཛམ་ཐང་རྫོང་གི་ན་མདའ་ནོར་བུའི་ཐང་དུ་སྤེལ། ཡུལ་ལྷ་གཞི་བདག་ལ་ལྷ་བསང་གཏོང་བ་དང་། ངོ་མཚར་ཆེ་བའི་སྐྱ་རྩལ་འཁྲབ་སྟོན། དགའ་བདེའི་སྣང་བས་ཕྱུག་པའི་གླུ་དང་རོལ་མོའི་ཁྲོད་ནས་ཉིན་དྲུག་རིང་གི་རྟ་རྒྱུག་འགྲན་ཚོགས་ཆེན་མོ་དངོས་སུ་འགོ་ཚུགས།
ལམ་ཐག་རིང་བོ་ནས་ཡོང་བའི་མི་རྣམས་ཀྱིས་སྔ་མོ་ནས་རྒྱུག་རའི་མཐའ་འཁོར་གྱི་སྤང་ལྗོངས་སུ་སྦྲ་གུར་ཕུབ་ཡོད་ལ། སྦྲ་གུར་དེ་དག་ཏུ་མི་སྒེར་གྱི་སྡོད་གནས་ཡོད་ལ། ཚོང་ཁང་དང་ཟ་ཁང་ཡང་མང་དུ་ཡོད་པས། བགྲང་གིས་མི་ལང་བའི་སྦྲ་གུར་གྱི་ཚོམ་བུ་དེ་ནི་དཀར་སེར་དམར་ལྗང་གི་མེ་ཏོག་ཕོན་པོ་ཞིག་དང་འདྲ་བར་སྤང་ལྗོངས་འདིའི་མཛེས་སྡུག་གི་རྒྱན་ཆ་རུ་གྱུར་འདུག
རྒྱུས་ལོན་པ་ལྟར་ན། ཚེས13ནས18བར་གྱི་ཉིན་དྲུག་གི་རིང་ལ། འཛམ་ཐང་དང་རྔ་བ། གསེར་རྟ། རྨ་ཆུ། བསང་ཆུ་སོགས་མཐའ་འཁོར་གྱི་རྫོང་7ནས་ཡོང་བའི་རྒྱུག་རྟ་300ལྷག་ལ། སྨི་1000དང་། སྨི་2000། སྨི་3000། སྨི་5000བཅས་ཀྱི་འགྲན་བསྡུར་དང་། སྨི་500ཅན་གྱི་གཡག་གཤིབ་དང་སྐྱ་རྩལ་འཁྲབ་སྟོན་བཅས་ཡོད།
འཛམ་ཐང་གི་རྟ་རྒྱུག་དུས་ཆེན་ནི་རྔ་བ་ཁུལ་གྱི་འབྲོག་ཁུལ་གྱི་རྟ་རྒྱུག་གི་གྲུབ་ཆ་གཙོ་བོ་ཞིག་ཡིན་ལ། སི་ཁྲོན་ནུབ་བྱང་གི་གྲངས་ཉུང་མི་རིགས་ས་ཁུལ་གྱི་གཞི་རྒྱ་ཆེ་བའི་ལུས་རྩལ་འགྲན་ཚོགས་ཤིག་དང་ཐུན་མིན་ཁྱད་ཆོས་ལྡན་པའི་མི་རིགས་རིག་གནས་ཀྱི་རྟགས་མ་ཞིག་ཡིན།
འཛམ་ཐང་གི་རྟ་རྒྱུག་འགྲན་ཚོགས་ཀྱིས་བོད་མི་དམངས་ཀྱི་ཐུན་མིན་ཡུལ་སྲོལ་མངོན་ཡོད་ལ། དེས་ས་གནས་ཀྱི་ཁྱད་ཆོས་ཅན་ལྡན་པའི་རིག་གནས་དང་། ལྗོངས་རྒྱུ། ཞིང་འབྲོག་ཐོན་ལས་ཀྱི་འཕེལ་རྒྱས་ལ་སྣེ་ཁྲིད་དེ། ས་ཁུལ་གྱི་དཔལ་འབྱོར་གོང་དུ་སྤེལ་ཅིང་། མི་རིགས་ཀྱི་རིག་གནས་ཉིང་བཅུད་རྒྱུད་འཛིན་བྱས་ཡོད།
