ཕྱི་རྒྱལ་དུ་འབོར་ཆེན་གྱར་སོང་བའི་ཏུན་ཧོང་གི་བོད་ཀྱི་གནའ་བོའི་ཡིག་ཆ་དུས་ཡུན་ལོ་ངོ་13རིང་དུ་ཕྱོགས་བསྒྲིགས་དཔེ་སྐྲུན་བྱས་པ།
ཡོང་ཁུངས། མི་དམངས་དྲ་བ།
སྤེལ་དུས།: ༢༠༡༨ ལོའི་ཟླ་ ༥ ཚེས་ ༣
ཕྱི་རྒྱལ་གྱི་མི་རིགས་ཡིག་ཆ་ཞིབ་འཇུག་ཁང་གི་འགོ་འཛིན་གཞོན་པ་ཚེ་རིང་གིས། ཏུན་ཧོང་མའོ་ཀོ་བྲག་ཕུག་ནས་ཕྱིར་རྔོག་པའི་ཡིག་ཆ་འབོར་ཆེན་ནང་དུ། བོད་ཡིག་གནའ་བོའི་ཚད་ལྡན་ཡིག་ཆ་གྲངས་འབོར་ནི་རྒྱ་ཡིག་ཕུད་རྗེས་མང་ཤོས་དེ་ཡིན་པ་རེད།
ཚེ་རིང་གིས། རྒྱལ་ནང་དང་བསྡུར་ན། དབྱིན་ཇི་དང་ཧྥ་རན་སེ། ཨ་རི། ཉི་ཧོང་། ཨུ་རུ་སུ་སོགས་རྒྱལ་ཁབ་ཏུ་ཏུན་ཧོང་གི་གནའ་བོའི་ཡིག་ཆའི་ནང་དོན་ཕུན་སུམ་ཚོགས་པ་ཡོད་པ་སྟེ། ནང་བསྟན་གྱི་ཡིག་ཆ་ཕུད་ད་དུང་ཁྲིམས་ལུགས། སྤྱི་ཚོགས་ཀྱི་གན་རྒྱའི་རིགས། ལོ་རྒྱུས། གསོ་བ་རིག་པ། མི་ཆོས། དམངས་ཁྲོད་གཏམ་རྒྱུད། བརྡ་སྤྲོད་སོགས་ཀྱི་ཡིག་ཆའང་ཡོད་པ་རེད། གཞན་ཡང་ལེགས་སྦྱར་གྱི་སྒྱུར་ཡིག་དང་། རྒྱ་ཡིག་གི་རྩོམ་རིག་ལོ་རྒྱུས་ཀྱི་གྲགས་ཅན་བརྩམས་ཆོས་ཀྱང་ཡོད་པ་རེད་ཅེས་བཤད།
ཚེ་རིང་གི་ངོ་སྤྲོད་བྱས་པར་གཞིགས་ན། ཞིབ་འཇུག་ཁང་འདི་ཡིས་ཏུན་ཧོང་གི་གནའ་བོའི་ཡིག་ཆ་བོད་དབྱིན་གྱི་པར་མའི་དཔེ་དེབ་9དང་། བོད་ཧྥ་ཡི་པར་མའི་དཔེ་དེབ་22ཕྱོགས་བསྒྲིགས་བྱས་ཡོད་པ་སྟེ། དུས་ཡུན་ལོ་ངོ་13རིང་ལ། བྱ་གཞག་འདི་ད་དུང་མཇུག་སྒྲིལ་མེད་པ་དང་། ཆེས་མཐའ་མའི་འཆར་གཞིར་བོད་དབྱིན་གྱི་པར་མའི་དཔེ་དེབ་15དང་། བོད་ཧྥ་ཡི་པར་མའི་དཔེ་དེབ་30ལྷག་ཕྱོགས་བསྒྲིགས་བྱ་རྒྱུ་ཡིན་ཞིང་། དེའི་རྗེས་སུ་ད་དུང་རྒྱལ་ཁབ་གཞན་གྱིས་ཉར་ཚགས་བྱས་པའི་བོད་ཀྱི་གནའ་བོའི་ཡིག་ཆ་པར་སྐྲུན་བྱ་རྒྱུ་ཡིན་པ་རེད།