རྩ་ཁྲིམས་ཀྱི་སྙིང་སྟོབས་དར་སྤེལ་བཏང་ནས་ཁྲིམས་སྐྱོང་སྤྱི་ཚོགས་བསྐྲུན་དགོས།
ཡོང་ཁུངས། མི་དམངས་དྲ་བ།
སྤེལ་དུས།: ༢༠༡༨ ལོའི་ཟླ་ ༣ ཚེས་ ༢༢
——བོད་རང་ལྗོངས་ཀྱི་རྒྱལ་ཡོངས་སྲིད་གྲོས་ཀྱི་ཨུ་ཡོན་ལྗོངས་སྤྱི་ཚོགས་ཚན་རིག་ ཁང་གི་ཞིབ་འཇུག་པ་གཞོན་པ་སྤེན་པ་ལྷ་མོར་བཅར་འདྲི་ཞུས་པའི་སྐོར།
སྤེན་པ་ལྷ་མོས་ད་ཐེངས་ཀྱི་རྩ་ཁྲིམས་བཟོ་བཅོས་ནང་ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་བྱེད་པའི་འབད་འཐབ་དམིགས་ཚད་རྩ་ཁྲིམས་ནང་བཅུག་པ་དེ་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལམ་ལུགས་མཐའ་འཁྱོངས་དང་འཕེལ་རྒྱས་གཏོང་བའི་ཁྲོད་རྒྱལ་ཁབ་སྟོབས་འབྱོར་དང་ཤེས་དཔལ་གྱི་བརྗིད་ཆེའི་འཆར་གཞི་རྩ་ཁྲིམས་ཀྱི་དབང་གྲགས་ཐོག་ནས་གསལ་པོ་སྟོན་པ་ཞིག་ཡིན་ལ། དེས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་འཛུགས་རྒྱུར་ཡང་དོན་སྙིང་གལ་ཆེན་ལྡན་ཡོད། དེ་དང་ཆབས་ཅིག“ཞི་མཐུན”གྱི་མི་རིགས་འབྲེལ་བ་རྩ་ཁྲིམས་ནང་བཅུག་སྟེ་རང་རྒྱལ་གྱི་མི་རིགས་འབྲེལ་བའི་འཕེལ་རྒྱས་ཁ་ཕྱོགས་སྔར་བས་གསལ་པོ་སྟོན་ཡོད། ཞི་མཐུན་ནི་མི་རིགས་ཕན་ཚུན་འགྲོ་འོང་དང་། སྤེལ་རེས། མཉམ་འདྲེས་བཅས་བྱས་པ་ལས་བྱུང་བའི་འཕེལ་རྒྱས་ཀྱི་རྣམ་པ་ཞིག་ཡིན་ལ། དེ་བས་རང་རྒྱལ་གྱི་མི་རིགས་འབྲེལ་བ་འཕེལ་རྒྱས་ཀྱི་དམིགས་ཚད་འདུན་པ་ཞིག་ཡིན་པའི་ངོས་འཛིན་གནང་བ་རེད།
སྤེན་པ་ལྷ་མོས་ཟླ་12ཚེས་4ཉིན་དེ་རྒྱལ་ཡོངས་ཀྱི་རྩ་ཁྲིམས་དྲིལ་བསྒྲགས་ཉིན་མོར་གཏན་འཁེལ་བྱས་པ་ནས་བཟུང་། དམངས་ཡོངས་ཀྱི་ཁྲིམས་སྐྱོང་འདུ་ཤེས་སྔར་བས་ཟབ་ཏུ་གཏོང་བ་དང་སྤྱི་ཚོགས་ཡོངས་སུ་རྩ་ཁྲིམས་ཀྱི་འདུ་ཤེས་བརྟན་པོ་འཛུགས་རྒྱུར་སྐུལ་འདེད་གཏོང་ཆེད་ནུས་པ་གལ་ཆེན་བཏོན་ཡོད། དེར་བརྟེན་ངས་རྩ་ཁྲིམས་བཟོ་བཅོས་དང་ཟུང་འབྲེལ་བྱས་ཏེ་སྤྱི་ཚོགས་ཡོངས་སུ་རྩ་ཁྲིམས་ཀྱི་ངོ་བ་དང་། གནས་བབ། ནང་དོན་བཅས་ཁྱབ་གདལ་དང་དྲིལ་བསྒྲགས་བྱེད་པ་དང་རྩ་ཁྲིམས་ལ་བརྟེན་ནས་རྒྱལ་ཁབ་སྐྱོང་བའི་ཁྲིམས་སྐྱོང་རྣམ་པ་བསྐྲུན་ཏེ་མི་དམངས་མང་ཚོགས་ཀྱིས་དེ་བས་ལེགས་པའི་སྒོ་ནས་རྩ་ཁྲིམས་ཀྱི་དབང་གྲགས་ལ་སྲུང་སྐྱོང་དང་རྩ་ཁྲིམས་ཀྱི་འོས་འགན་ལག་བསྟར་ཐུབ་པ་བྱ་རྒྱུ་ཡིན་ཞེས་གསུངས་པ་རེད།