ལོ་ངོ་30ཡི་སྔོན་དུ། ལུའོ་ཆོན་ཞང་གི་བུ་ཆེ་བ་བཙས། བདེ་སྐྱིད་ཀྱི་ཉི་མ་ཤར་བར་འདོད་ཀྱང་བསམ་ཡུལ་ལས་འདས་པ་ཞིག་ལ་དུས་དེ་ནས་བཟུང་ཁྱིམ་ཚང་གང་བོའི་ལས་དབང་ལ་འགྱུར་བ་བྱུང་། དེ་ནས་བུ་འབྲིང་བ་དང་བུ་ཆུང་བ་སྔ་ཕྱིར་སྐྱེས་བྱུང་། བུ་གསུམ་ལ་ཆུང་དུས་ནས་བློ་རིག་རྟུལ་བ་དང་ནར་སོན་དལ་བའི་ནད་རྟགས་ཡོད། ལུའོ་ཆོན་ཞང་བཟའ་མི་གཉིས་ཀྱིས་གདུག་རྩུབ་ཆེ་བའི་མངོན་སུམ་གྱི་ལས་འདི་ཁས་མི་ལེན་ཀ་མེད་དུ་གྱུར། བུ་གསུམ་པོར་རིག་རྟུལ་ནད་ཕོག་ཡོད། 2012ལོར། ཁྱོ་ག་ཚེ་ལས་འདས་པ་དང་བསྟུན་ནས། ལུའོ་ཆོན་ཞང་གི་ཕྲག་ཏུ་བབས་པའི་ལས་འགན་སྔར་ལས་ལྕི། མོས་བུ་གསུམ་གཅེས་པར་མ་ཟད་། ད་དུང་རྨོ་འདེབས་དང་གསོ་སྤེལ་གྱི་ལས་ལའང་འབད་དགོས། འཚོ་བ་ལ་དཀའ་ཚེགས་ཇི་འདྲ་ཆེ་རུང་ལུའོ་ཆོན་ཞང་གི་དཔའ་མ་ཞུམ་ལ་གཉའ་ཡང་མ་སྒུར།
བུ་ཆེ་བས་རིག་པ་བལྟོས་བཅས་སུ་ཅུང་བཟང་། ད་ལྟ་ཁྱིམ་མཚེས་དང་མཉམ་དུ་རི་མགོར་སྨན་རྩྭ་འཐུ་རུ་འགྲོ་ཐུབ། སྲིད་གཞུང་གི་ལྟ་རྟོག་འོག བུ་འབྲིང་བས་ཁྱིམ་དང་ཐག་མི་རིང་སའི་ཞིང་རར་ཞོར་ལས་བྱེད་བཞིན་ཡོད། སྒོར་མོ་ཕྲན་ཚེགས་རེ་བཙལ་ནས་ཁྱིམ་གྱི་འཚོ་རྟེན་ལ་ཁ་གསབ་བྱེད་པ་རེད། བུ་ཆུང་བ་རིམ་པ་དང་པོའི་རིག་རྟུལ་ནད་པ་ཡིན་པས་ལྟ་སྐྱོང་དང་གཏན་ནས་འབྲལ་མི་ཐུབ། དེ་བས་དེ་རིང་ཁྱིམ་ནང་དུ་ང་དང་བུ་ཆུང་བ་ལས་མེད་ཅེས་ལུའོ་ཆོན་ཞང་གིས་བུ་ལ་ཞོགས་ཇ་བསྐོལ་ཞོར་གསར་འགོད་པར་བཤད་བྱུང་། ཁྱིམ་ནང་དུ་མི་ཆ་མེད་མང་བོ་ཐོན་པ་མཐོང་དུས། ལུའོ་ཆོན་ཞང་གི་བུ་ཆུང་བས་ཡ་མཚན་ངང་མདུན་ཕྱོགས་སུ་བལྟ་ཞོར་ལྷུག་ལྷུག་ཏུ་བགད་བྱུང་།
ཁྱིམ་ཚང་དེ་དབུལ་ཞིང་ཕོངས་བའི་རྒྱུ་ནི་དམིགས་བསལ་ཞིག་ཡིན་པས། ང་ཚོས་མོ་ཚང་ལ་སྲིད་ཇུས་རང་བཞིན་གྱི་མ་མཐའི་འགན་སྲུང་ལག་ཏུ་བསྟར་ཡོད། སྤྱི་ཕན་རང་བཞིན་གྱི་ལས་གནས་བཀོད་སྒྲིག་བྱས་ཡོད། བཟའ་མི་ཚང་མར་མ་མཐའི་འཚོ་བའི་འགན་ལེན་རེ་ཞུ་བྱེད་རོགས་བྱས་ཤིང་། དེ་མིན་སྣ་མང་ཐོན་ལས་རོགས་སྐྱོར་སོགས་རོགས་སྐྱོར་བྱེད་ཐབས་རབ་དང་རིམ་པ་ལག་ཏུ་བསྟར། ལུའོ་ཆོན་ཞང་ཚང་ལ་བློ་འདོན་རོགས་དང་ཐབས་དྲན་རོགས་བྱས་ཏེ་མོའི་ཁུར་བོ་ཇེ་ཡང་དུ་བཏང་བ་ཡིན་ཞེས་སྡེ་བའི་ཧྲུའུ་ཅི་དང་པོ་ལིས་ལུང་གིས་གསར་འགོད་པར་བཤད་བྱུང་།
ད་ལྟ། ནད་ལ་བསྟེན་ན་སྨན་བཅོས་འགན་ལེན་ཡོད། བུ་ལ་དབང་པོ་སྐྱོན་ཅན་གྱི་ཁ་གསབ་རོགས་དངུལ་ཡོད། བཟའ་མི་ཚང་མར་མ་མཐའི་འཚོ་རྟེན་འགན་ལེན་ཡོད། ད་དུང་སྤྱི་ཕན་རང་བཞིན་གྱི་ལས་གནས་དང་ནགས་སྲུང་བའི་གླ་ཕོགས་ཀྱང་ཡོད་ཅེས་བཤད་རྗེས། ལུའོ་ཆོན་ཞང་གིས་ཏང་དང་སྲིད་གཞུང་གི་ཐུགས་ཁུར་འོག རང་ཉིད་ཀྱིས་འབད་པ་བྱས་ན། བཟའ་མི་ཚང་མའི་འཚོ་བ་ཉིན་བཞིན་ཇེ་བཟང་ཇེ་སྐྱིད་དུ་འགྲོ་བར་ཡིད་ཆེས་ཡོད་ཅེས་འཕྲོར་མཐུད་ནས་བཤད་བྱུང་།