ཉེ་ཆར། ཞིང་ཆེན་དཔེ་མཛོད་ཁང་དང་། ཞིང་ཆེན་ལྟེ་གནས་དཔེ་མཛོད་ཁང་ཨུ་ཡོན་ལྷན་ཁང་གཞུང་ལས་ཁང་། དཀར་མཛེས་ཁུལ་རིག་གནས་ལུས་རྩལ་རླུང་འཕྲིན་གློག་བརྙན་བརྙན་འཕྲིན་གསར་འགྱུར་དཔེ་སྐྲུན་ཅུས་ཀྱིས་གཙོ་གཉེར་བྱས་པ་དང་། དཀར་མཛེས་ཁུལ་དཔེ་མཛོད་ཁང་གིས་གཉེར་འགན་ཁུར་པའི་རྒྱ་བོད་རིག་གནས་སྤེལ་རེས་ཀྱི་གླེང་སྟེགས་ཞེས་པ་དར་མདོ་རུ་འཚོགས། ད་ཐེངས་ཀྱི་རིག་གནས་སྤེལ་རེས་ཀྱི་བརྗོད་བྱ་གཙོ་བོ་ནི་རྒྱ་བོད་རིག་གནས་སྤེལ་རེས་ཡག་པོ་སྒྲུབ་རྒྱུ་དང་། མི་རིགས་མཐུན་སྒྲིལ་དང་ཐུན་མོང་ཡར་ཐོན་ལ་སྐུལ་འདེད་གཏང་བ་དེ་ཡིན། ཞིང་ཆེན་རིག་གནས་ཐིང་གི་ཐིང་ཀྲང་གཞོན་པ་ཞང་ཧྭ་ཆོན་གླེང་སྟེགས་ནང་ཞུགས་པ་དང་འབྲེལ་གསུང་བཤད་ཀྱང་གནང་།
ངོ་སྤྲོད་བྱས་པར་གཞིགས་ན། 2012ལོའི་ཟླ་10པར་སི་ཁྲོན་ཞིང་ཆེན་དཔེ་མཛོད་ཁང་རྒྱ་བོད་རིག་གནས་སྤེལ་རེས་བྱེད་སྒོ་སྤེལ་བ་ནས་བཟུང་། སྔ་རྗེས་སུ་དཀར་མཛེས་ཁུལ་རྟའུ་རྫོང་མགར་ཐར་དགོན་དང་གཡུ་ཁོག་དགོན། བྲག་འགོ་རྫོང་ལི་ཁོག་མ་སྟོད་མ་ཡུལ་ཤོག་ལྟེ་བའི་སློབ་ཆུང་དུ་རྒྱལ་ཡོངས་རིག་གནས་ཆ་འཕྲིན་ཐོན་ཁུངས་མཉམ་སྤྱོད་ལས་གཞིའི་གཞི་རིམ་གྱི་ཞབས་ཞུའི་དྲ་ཚིགས་བཙུགས་པ་དང། དར་མདོ་གྲོང་ཁྱེར་སྐྱིད་ཐང་ཤང་ཀླུ་ཤུལ་གྲོང་སྡེ། ལྕགས་ཟམ་རྫོང་རི་མཇུག་གྲོང་རྡལ་མུའུ་ཀ་ཀུའུ་གྲོང་སྡེ། རྟའུ་རྫོང་མགར་ཐར་སློབ་ཆུང་། བྲག་འགོ་རྫོང་ལི་ཁོག་མ་སྟོད་མའི་ལྟེ་བའི་སློབ་ཆུང་། རོང་བྲག་རྫོང་གཡུང་དྲུང་དར་རྒྱས་གླིང་དགོན། ཐུབ་ཆེན་གསང་སྔགས་གླིང་སོགས་སུ་སྐོར་སྐྱོད་དཔེ་ཀློག་ཁང་བཙུགསཤིང་། དམིགས་ས་ཡོད་པའི་སྒོ་ནས་དཀར་མཛེས་ཁུལ་གྱི་མི་དམངས་མང་ཚོགས་ལ་བོད་རྒྱ་སྐད་ཡིག་གཉིས་ཀྱི་གློག་རྡུལ་དཔེ་དེབ་དང་དེ་བཞིན་བོད་རིགས་ས་ཁུལ་གྱི་རིག་གནས་དང་ལོ་རྒྱུས་དང་། དངོས་སྤྱོད་ལག་རྩལ། བཅའ་ཁྲིམས་དང་ཁྲིམས་སྲོལ་སོགས་དང་འཚམ་པའི་རྒྱ་བོད་སྐད་ཡིག་གཉིས་ཀྱི་ཐོན་ཁུངས་མཁོ་འདོན་བྱས་པ་དང་། རྒྱ་བོད་རིག་གནས་སྤེལ་རེས་ཀྱི་སྟེགས་བུ་བཙུགས་པས། དཀར་མཛེས་ཁུལ་གྱི་རྒྱ་ཆེའི་མི་དམངས་མང་ཚོགས་ཀྱི་གདེང་འཇོག་བཟང་པོ་ཐོབ་ཡོད།
ཞང་ཧྭ་ཆོན་གྱིས་བཤད་རྒྱུར། ད་རེས་ཀྱི་རྒྱ་བོད་རིག་གནས་སྤེལ་རེས་གླེང་སྟེགས་གཉེར་བ་དེ་ནི་ཀྲུང་དབྱང་གི་བོད་ཀྱི་ལས་ཀའི་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པའི་དགོངས་དོན་ལག་ལེན་མཐར་ཕྱིན་བྱེད་པ་དང་། ཚད་མཐོའི་རིག་གནས་རང་རྟོགས་དང་བོད་རིགས་ས་ཁུལ་གྱི་རིག་གནས་མ་ལག་འཛུགས་སྐྲུན་ལ་སྐུལ་འདེད་གཏང་བ། བོད་རིགས་ས་ཁུལ་གྱི་སྤྱི་ཚོགས་མཆོང་སྐྱོད་འཕེལ་རྒྱས་དང་ཡུན་རིང་བདེ་འགོད་ལ་སྐུལ་འདེད་བྱ་ཆེད། རིག་གནས་མི་སྣས་འབུལ་འོས་པའི་ལེགས་སྐྱེས་ཕུལ་པའི་གོ་སྐབས་ཤིག་ཀྱང་ཡིན། དེ་ནི་ང་ཚོས་དཔེ་མཛོད་ཁང་གི་གཡུལ་ས་བེད་སྤྱོད་བྱས་ནས། མི་རིགས་རིག་གནས་སྤེལ་རེས་དང་གཅིག་འདྲེས་གཏིང་ཟབ་ཏུ་གཏོང་བ་དང་། ཕན་ཚུན་སྐུལ་འདེད་དང་ཐུན་མོང་ཡར་ཐོན་གྱི་མཚོན་རྟགས་གལ་ཆེན་ཞིག་ཡིན།
ཞིང་ཆེན་ཡོངས་ཀྱི་ས་གནས་ཁག་ནས་ཡོང་བའི་རྒྱ་བོད་ཆེད་རམས་པ་ལས་གྲུབ་མི་སྣ་དང་། ཞིང་ཆེན་གསར་འགྱུར་འཕྲིན་སྦྱོར་ཁག་དང་། དཀར་མཛེས་ཁུལ་གྱི་རྫོང་ཁག་(གྲོང་ཁྱེར།)རིག་གནས་སྡེ་ཚན་གྱི་ལས་བགོས་འགན་ཁུར་པ་སོགས་གླེང་སྟེགས་ཚོགས་ཆེན་ནང་ལ་ཞུགས།