ཀྲུང་གོའི་གསར་འགོད་པ་མཐུན་ཚོགས་ཀྱིས་ཕྱི་རྒྱལ་གྱི་འཕྲིན་སྦྱོར་ལ་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་དྲིལ་བསྒྲགས་མཚམས་སྦྱོར་བྱས་པ།

བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ཀྱི་འབྱུང་རྐྱེན་དང་འཕེལ་རྒྱས། རྒྱུན་འཛིན་ཞེས་པའི་བརྗོད་དོན་གཙོ་བོའི་གསར་འགྱུར་ཇ་སྟོན་བཞུགས་མོལ་གྱི་ཡུལ་དངོས།

ཀྲུང་གོའི་གསར་འགོད་པ་མཐུན་ཚོགས་ཀྱིས་སྤྱི་ཟླ་3པའི་ཚེས་27ཉིན་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ཀྱི་འབྱུང་རྐྱེན་དང་འཕེལ་རྒྱས། རྒྱུན་འཛིན་ཞེས་པའི་བརྗོད་དོན་གཙོ་བོའི་གསར་འགྱུར་ཇ་སྟོན་བཞུགས་མོལ་འཚོགས་པ་དང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་གཞོན་པ་ལི་ཏེ་ཁྲེང་གདན་འདྲེན་ཞུས་ནས། རྒྱལ་ཕྱི་ནང་གི་གསར་འགོད་པ་དང་ཀྲུང་གོར་བཅའ་སྡོད་གཞུང་ཚབ་ཁང་གི་དཔོན་རིགས་60ཙམ་ལ་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ལམ་ལུགས་ངོ་སྤྲོད་བྱས་པ་དང་། སྤྲུལ་སྐུའི་ཡང་སྲིད་ངོས་འཛིན་བྱེད་སྐབས་ཀྲུང་གོའི་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་དགོས་པ་དང་། ཆོས་ལུགས་ཆོ་ག་དང་ལོ་རྒྱུས་ཀྱི་སྒྲིག་སྲོལ་ལ་གཞིར་བཟུང་པར་བརྒྱུད། “རྒྱལ་ནང་དུ་བཙལ་འཚོལ་དང་གསེར་བུམ་དཀྲུག་པ། ཀྲུང་དབྱང་སྲིད་གཞུང་གིས་ངོས་འཛིན་བྱེད་པར་ཆོག་མཆན་གནང་བ”བཅས་ཀྱི་བྱེད་ཐབས་ལྟར་ངོས་འཛིན་བྱ་དགོས་པར་བཏོན།

ཐེངས་འདིའི་གསར་འགྱུར་ཇ་སྟོན་བཞུགས་མོལ་དུ་གདན་ཞུས་བྱས་པའི་འཆད་ཁྲིད་མཛད་མཁན་གཙོ་བོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་གཞོན་པ་ལི་ཏེ་ཁྲེང་།

ལི་ཏེ་ཁྲེང་གིས་ཕྱི་རྒྱལ་གྱི་འཕྲིན་སྦྱོར་གསར་འགོད་པ་དང་ཀྲུང་གོར་བཅའ་སྡོད་ཕྱི་རྒྱལ་གྱི་གཞུང་ཚབ་ཁང་གི་དཔོན་རིགས་ཚོས་དོ་ཁུར་བྱེད་པའི་དྲི་བ་དག་ལ་ལན་རེ་རེ་བཞིན་བཏབ། ཐེངས་འདིའི་གསར་འགྱུར་ཇ་སྟོན་བཞུགས་མོལ་དུ་དབྱིན་ཇི་དང་འཇར་མན། འཇར་པན། སི་ཝེས་ཙེར། ཨོ་སི་ཐྲི་ཡ། བྷ་རེ་ཟི། ནི་ཇེ་རི་ཡ། ཟིམ་པབ་ཝེ་སོགས་ཕྱི་རྒྱལ་གྱི་འཕྲིན་སྦྱོར་28དང་། ཞང་ཀང་གི་འཕྲིན་སྦྱོར་4དང་ཀྲུང་དབྱང་གི་འཕྲིན་སྦྱོར་5བཅས་དང་། དེ་མིན་ཨ་རི་དང་དབྱིན་ཇི། ཧོ་ལན། ཕེ་རུ་སོགས་ཀྲུང་གོར་བཅའ་སྡོད་གཞུང་ཚབ་ཁང་8ཀྱི་ཕྱི་འབྲེལ་དཔོན་རིགས་ཞུགས་ཡོད།

གསར་འགོད་པས་དྲི་བ་འདྲི་བ།

ཀྲུང་གོའི་གསར་འགོད་པ་མཐུན་ཚོགས་ཀྱིས་2008ལོའི་ཟླ་11པ་ནས་བཟུང་གསར་འགྱུར་ཇ་སྟོན་བཞུགས་མོལ་གྱི་བྱེད་སྒོ་སྤེལ་བ་དང་ད་བར་ཐེངས་177སྤེལ་ཟིན། ལས་སྟེགས་བསྐྲུན་ཏེ་སྲིད་གཞུང་གི་དཔོན་རིགས་དང་སྐད་གྲགས་ཡོད་པའི་ཆེད་མཁས་པ་གདན་དྲངས་ནས་ཀུན་གྱིས་དོ་སྣང་བྱེད་ཡུལ་དུ་གྱུར་པའི་བརྗོད་གཞི་ཚ་ཤོས་ལ་དམིགས་ནས་གནས་ཚུལ་ངོ་སྤྲོད་དང་། འབྲེལ་ཡོད་སྲིད་ཇུས་དང་ཀྲུང་གོའི་ལངས་ཕྱོགས་གསལ་འགྲེལ་བྱས་ཏེ། རྒྱལ་ཕྱི་ནང་གི་གསར་འགོད་པ་དང་འབྲེལ་གཏུག་སྤེལ་རེས་བྱས་པ་རེད། །

ཚུལ་ཁྲིམས་བཟང་པོས་བསྒྱུར།