གཙང་གསུམ་འབབ་ལྡན་དགའ་མའི་དྭངས་བཅུད་ཀུན། །
གཅིག་ཏུ་འདྲེན་པའི་རྣམ་དཔྱོད་དཔའ་མངའ་བའི། །
རིན་ཆེན་ཐང་མར་བརྡར་བའི་ལྔ་རིག་པ།།
དུས་ཀྱི་ཕོ་ཉ་ལུང་རི་སྨན་སྐྱབས་ཞེས།།
ངེས་དོན་མཚན་སྙན་གྲགས་པའི་དབྱར་སྐྱེས་རྔ། །
སྲིད་པ་གངས་ཀྱི་ར་བའི་ཁྱོན་ལྡིར་ནས། །
རྩོམ་རིག་མདོངས་མཐའི་ཟ་འོག་རྣམ་བཀྲའི་མདངས། །
བློ་ལྡན་དགྱེས་པའི་མིག་གིས་དགའ་སྟོན་སྤེལ། །
རྣམ་རིག་དྭངས་མའི་རྩལ་ལས་མཆེད་པའི་མེས། །
ལོག་རྟོག་མུན་པའི་ཚང་ཚིང་གཏན་བཅོམ་ནས། །
ཤེས་བྱའི་དཀྱིལ་འཁོར་གཅིག་ཏུ་ཟླུམ་པ་ཡིས། །
ལོ་རྒྱུས་སྨྲ་བའི་ལྗགས་བཟང་པདྨོ་བཞད། །
གང་གི་མཁྱེན་དཔྱོད་ཉིན་མོ་བྱེད་པའི་གཟིས། །
སྲོལ་རྒྱུན་རིག་པའི་གངས་ལྷ་མེ་ཏོག་ཡང་། །
སླར་ཡང་རངས་བའི་འཛུམ་དཀར་འཕྲོ་གྱུར་ནས།།
ངོ་མཚར་ཕུན་ཚོགས་སྟོང་གིས་དཔལ་དུ་བཞད། །
འདི་ནས་དུས་གསུམ་འབད་པའི་ལས་རྣམས་ཀུན།།
དགེ་ལེགས་ཡོན་ཏན་བྱེ་བའི་དཔལ་གྱུར་ཏེ། །
བདེན་དོན་རྟེན་འབྲེལ་ཟབ་མོའི་སྙན་ཚིག་འདིས། །
སྐལ་བཟང་ཁྱེད་ལ་ཤིས་པའི་མེ་ཏོག་ཕུལ།།
ཞེས་པ་ནི་དབང་ཆེན་གྱིས་ཚིགས་བཅད་དུ་སྡེབ་པའོ།།
