གསུངས་ནས་ངག་རྟ་དཀར་མོ་དྲུག་འགྱུར་ལ་དྲངས་ཏེ་གླུ་འདི་འདྲ་བཞེངས་པར་གདའ་འོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་རེ་རེ་མི་ལེན་ཀ་མེད་རེད། །
རེ་རེ་མ་བླངས་ཚོད་ཡོད་རེད། །
སྐྱིད་ན་ཇ་ཆང་མཚར་གླུ་རེད། །
སྡུག་ན་རང་སེམས་སྐྱོ་གྲོགས་རེད། །
ས་འདིའི་ས་ངོ་མ་ཤེས་ན། །
རྨ་སྤོམ་ར་ཤར་གྱི་ལམ་སྣེ་རེད། །
ཕོ་ང་དང་ང་ངོ་མ་ཤེས་ན། །
རྨ་རི་བོ་བཞི་ཡི་འདུས་མདོ་ན། །
མཁར་མི་འགྱུར་དངུལ་ཆུ་ཁྲོ་རྫོང་ན། །
ལྡོང་མི་འགྱུར་རྒྱ་ཚ་ཞལ་དཀར་ཡིན། །
གླིང་རྨོག་དཀར་སྟེང་གི་དར་འཕྲུ་ཡིན། །
ཁྲབ་དཀར་སྟེང་གི་ཚེ་མདུད་ཡིན། །
མཁར་བུམ་ཆུང་སྟེང་གི་གསེར་ཏོག་ཡིན། །
རྒྱལ་མཚན་སྟེང་གི་ནོར་བུ་ཡིན། །
གསེར་ཁྲི་སྟེང་གི་གོང་གནོན་ཡིན། །
རྟ་འདོ་བའི་སྟེང་གི་ཁེབས་གདན་ཡིན། །
གཉེན་བྱམས་པའི་སྟེང་གི་ཕ་མ་ཡིན། །
དགྲ་མ་ཐུབ་སྟེང་གི་འཆི་བདག་ཡིན། །
གླུ་འདི་ཡི་གླུ་ངོ་མ་ཤེས་ན། །
རྒྱ་ཚའི་དཀར་མོ་དྲུག་འགྱུར་རེད། །
ཧོར་སེར་དུག་གི་རྒྱ་མཚོ་ནས། །
ཐང་རྩེ་གསེར་གྱི་མེ་ཏོག་འཁྲུངས། །
མདའ་ཉག་ཕྲན་གསེར་གྱི་ལོ་འདབ་རྒྱས། །
རྩལ་དྲུག་གསེར་ལ་འབྲས་བུ་སྨིན། །
ལྷ་ཚངས་པའི་མདུན་ནས་བཀོད་ལེ་བུ། །
ཧོར་དམག་གླིང་ལ་བསླེབས་ཚུན་ནས། །
ཐང་རྩེ་ཡིད་ལ་འཁྲུལ་བ་མེད། །
མདའ་ཉག་ཕྲན་འཕེན་ཡ་རྡོ་ལ་བྱས། །
མཚོན་སྔོན་མོའི་གཡུག་ཡ་ཤིང་ལ་བྱས། །
མདུང་བ་དན་ཚད་ཡ་གནམ་ལ་བྱས། །
ཐང་རྩེ་ཁྱུང་གི་སྣང་ངུ་ལ། །
རྩལ་དྲུག་སྒོ་ངའི་སྦུབས་ནས་རྒྱས། །
ཨ་ནུ་སེང་ཆེན་སྙིང་ལ་བཞག །
གླིང་དཔའ་བརྟུལ་གཅིག་དང་ཁྱད་པར་མེད། །
སྐྱེ་ས་ཧོར་ལ་བྱས་ན་ཡང་། །
སེམས་དཀར་པོ་གླིང་དཀར་ཕྱོགས་ལ་གདའ། །
གེ་སར་དབུ་འཕང་མ་སྨད་ན། །
ཁྱོད་ཐང་རྩེ་གླིང་དཀར་རྒྱན་ལ་འཇོག །
གྲི་རྣོ་ཆོད་ཡ་ཟི་སྐར་ཕྲན་འདིས། །
ལྷ་དབང་ཕྱུག་ཆེན་པོ་མན་ཆད་ནས། །
འཆི་བདག་ཆོས་རྒྱལ་ཡན་ཆད་རྣམས། །
བཏབ་ན་མི་ཆོད་གཅིག་ཀྱང་མེད། །
ཁྱོད་ཐང་རྩེ་བུ་ལ་གཟུར་ནས་གདའ། །
ཡིད་ཆེས་པའི་མི་ལ་དེ་གས་ཆོག །
དེ་ནས་གླུ་ཡི་སྙིང་པོ་ལ། །
ད་ལོ་ཧོར་དམག་ཚུར་འོང་འདི། །
ཁོ་གུར་དཀར་ལན་ལེན་གུར་སེར་ལན། །
གུར་ནག་ལན་ནམ་མགར་བ་ལན། །
ཤན་པ་ལན་ནམ་ཁྲ་འབར་ལན། །
སྡོང་བོ་ལན་ནམ་ལོ་མ་ལན། །
ལྗང་ཆུང་ལན་ནམ་འབྲས་བུ་ལན། །
ལྷོ་སྤྲིན་ལན་ནམ་ལོ་མ་ལན། །
ལན་ངེས་པའི་རྩ་བ་སུ་ལ་ཐུག །
སྡོང་བོ་ལན་ན་རྩ་བ་འབྲེག །
ལོ་མ་ལན་ན་རྩེ་ནས་བཞར། །
ལྗང་ཆུང་ལན་ན་ཐན་པས་བསྲེག །
འབྲས་བུ་ལན་ན་སེར་རྒོད་འབེབས། །
ལྷོ་སྤྲིན་ལན་ན་རླུང་གིས་གཏོར། །
བ་མོ་ལན་ན་སྨུག་པས་འགེབས། །
ལན་ཆེ་བའི་རྩ་བ་སུ་ལ་ཐུག །
བསམ་ཕུགས་ཡོད་ས་ཅི་ཚུགས་ཡིན། །
ད་ལྟ་ཁ་བགྲོས་ཅི་ལ་བྱེད། །
བློ་ཕུགས་སུ་མཁས་བྱེད་ཅིང་ཡོད། །
གཏམ་བཤད་མཁན་སུ་ལ་བབས་ཤིང་ཡོད། །
གཏམ་མ་གསང་ཐང་རྩེས་བཤད་ན་དགའ། །
དེ་ནས་ང་ལ་ཚུར་ཉོན་དང་། །
ཧོར་མི་མང་བསད་ཀྱང་སྡིག་པའི་རྒྱུ། །
ཁོ་གུར་དཀར་སྦར་གྱིས་ཨེ་ཟིན་བསམས། །
བསམ་བསམ་དོན་ལ་མི་འགྲུབ་དོ། །
ད་ཅི་བྱེད་ཅི་འདྲ་བསམ་བློ་ཐོངས། །
ཧོར་བསད་པའི་ཉུང་མཐའ་མི་རིག་དོ། །
གླིང་ཡེ་ཟད་ལ་མོ་ཡོང་ངེས་ཡོད། །
ད་ནངས་ཞོགས་པའི་རྟིང་མ་ལ། །
སྟག་རོང་ཨ་ནུ་གཟིག་འཕེན་ཁོ། །
རྫོང་ཁག་དགུ་ལས་དགའ་ངེས་ཡིན། །
འབུམ་དམག་བདུན་གྱི་ཁ་ཡ་ཡིན། །
རྨ་ཆུའི་གཞུང་ལ་བསྐུར་ནས་ཐལ། །
ལས་འདི་འདྲས་ནམ་ཕུགས་རྟེན་ས་མེད། །
ཨ་ནུ་བྱེས་ཡུན་རིང་དང་གཅིག །
གུར་དཀར་དམག་མགོ་རྒོད་དང་གཉིས། །
འབྲུག་མོ་གྲགས་གཡེར་ཆེ་དང་གསུམ། །
ཁྲོ་ཐུང་བྱ་ལག་མང་དང་བཞི། །
ལར་ཁ་མང་ལྐོག་ལ་འཛོམས་ལེ་རེད། །
དེ་སྟེ་རང་སྲོག་དམར་པོའི་ཁྲག །
ཐང་དཀྱིལ་ས་ལ་མ་ཕོ་ན། །
ང་རྒྱ་ཚ་མིན་པའི་རྟགས་ལ་ཞོག །
ཐང་རྩེ་གཡུ་ཡི་འབྲུག་རྒྱལ་ཁྱོད། །
གླིང་སྐྱེས་བུའི་སྐུ་ཆོས་བསམ་ངེས་རེད། །
ངས་ཅི་བསམ་དྲང་པོར་བཤད་ལེ་ཡིན། །
ཁྱོད་བསམ་བློ་བཞི་གསུམ་བཅུ་གཉིས་ཐོངས། །
བློ་རྩེ་ཉི་ཤུ་རྩ་ལྔ་ཁོད། །
ལས་ཅི་དགོས་གྲོས་དེ་ང་ལ་ཤོད། །
ཐང་རྩེའི་ཡིད་ལ་དེ་ལྟར་ཞོག །
ཅེས་གསུངས་པ་དང་།
ཐང་རྩེ་ཡང་དགའ་སྐྱོ་ཟུང་འབྲེལ་གྱིས་མཆི་མ་མང་པོ་བཏོན་ཅིང་ན་རེ། གླིང་དཀར་ལྷ་སྲས་རིན་པོ་ཆེ། ཞུ་འོས་ཐང་རྩེ་ང་ལ་ཡོད། དེ་སྟེ་སྲིད་པའི་བཀོད་ཐང་ལ། ལས་འདྲ་ལེ་གཅིག་ཡོང་བསམ་ཡིད་ལ་མེད། ཟེར་ནས་གླུ་འདི་ལྟར་བླངས་པར་གདའ་འོ། །