དཀར་མཛེས་ཁུལ་སྡེ་དགེ་རྫོང་སྨྱན་སྦྱོར་ལྟེ་གནས་ཀྱིས་རོགས་རམ་འོག གསར་འགོད་པས་སྒྲོལ་མའི་ཨ་ཕར་བཅར་འདྲི་ཞུས་པ་དང་། འབྲོག་སར་ཕྱུགས་འཚོ་བའི་ཁོང་ཚོས་དྲ་གྲགས་ཟེར་བ་གང་ཡིན་མིན་དེ་ཙམ་ཤེས་ཀྱི་མེད་ཁར། དེ་སྔོན་སྐད་གྲགས་ཆོད་པའི་ལི་ཐང་གི་བསྟན་འཛིན་ལ་ཡང་རྒྱུས་མངའ་དེ་ཙམ་མེད། ད་ཐེངས་སྒྲོལ་མ་གློ་བུར་དུ་སྐད་གྲགས་ཆོད་དོན་ནི། དཔྱིད་གསར་དུས་ཆེན་རིང་། སྒྲོལ་མའི་ཨ་ཁུས་སྒྲོལ་མར་བརྙན་ཐུང་ཞིག་ཕབ་ལེན་བྱས་ཏེ་དྲ་ཐོག་ཏུ་སྐུར་བས་ཡིན། སྡེ་དགེ་སྨྱོན་སྦྱོར་ལྟེ་གནས་ཀྱི་ལས་དོན་མི་སྣས་ཁོང་ཚོ་སྒྲོལ་མ་ཆུང་ཆུང་འཚོལ་བར་སླེབས་སྐབས། ནང་མི་ཚོས་གཞི་ནས་སྒྲོལ་མའི་བརྙན་ཐུང་དེ་དྲ་ཐོག་ཏུ་སྐད་གྲགས་ཆོད་པ་ཤེས་རྟོགས་བྱུང་བ་དང་། དྲ་གྲོགས་ཚོས་དོ་སྣང་ཆེན་པོ་གནང་བར་སྒྲོལ་མའི་པཱ་ལགས་ཀྱིས་བཀའ་དྲིན་ཆེ་ཞུས་ཤིང་། ཁོང་གིས་སྒྲོལ་མའི་ཚབ་ཞུས་ནས་ཚང་མ་སྡེ་དགེར་སྤྲོ་རྩེད་གནང་དུ་ཕེབས་པར་དགའ་བསུ་ཞུ་ཞེས་གསུངས་པ་རེད།
