ཤིན་ཧྭ་གསར་འགྱུར་དྲ་བས་སྤེལ་བའི་གནས་ཚུལ་ལྟར་ན། ཟླ་7ཚེས་28ཉིན། ལྐོག་རྔོན་ལ་རྒོལ་བའི་ཁྲིམས་བསྟར་བྱ་སྤྱོད་བསྟུད་མར་སྤེལ་བ་དང་སྐྱེ་ཁམས་ཁོར་ཡུག་སྲུང་སྐྱོང་མུ་མཐུད་ཤུགས་ཆེ་རུ་བཏང་རྐྱེན། འཛམ་གླིང་རང་བྱུང་ཤུལ་བཞག་ས་གནས་དང་། མི་ཡུལ་གྱི་དག་ཞིང་”སྟེ་ཨ་ཆེན་གངས་རྒྱབ་ཏུ་ལོ་བཅུ་གཅིག་རིང་རི་དྭགས་ལྐོག་རྔོན་བྱེད་པའི་མེ་མདའི་སྒྲ་ཐོས་མ་བྱུང་། གཙོད་སོགས་རི་སྐྱེས་སྲོག་ཆགས་སོས་དལ་བག་ཕེབས་ངང་རྒྱུད་སྤེལ་དང་འཚོ་གནས་བྱེད་པ་དེ་མཚོ་བོད་མཐོ་སྒང་གི་མཛེས་སྡུག་གི་ལྗོངས་རྣམ་ཞིག་ཏུ་གྱུར་ཡོད།
མཚོ་བོད་མཐོ་སྒང་གི་ལྟེ་བར་གནས་པའི་ཨ་ཆེན་གངས་རྒྱབ་ནི་རྒྱལ་ཁབ་རིམ་པ་དང་པོའི་སྲུང་སྐྱོང་སྲོག་ཆགས་ཏེ་གཙོད་འཚོ་གནས་བྱེད་ཡུལ་གལ་ཆེན་དེ་ཡིན་པ་དང་། དུས་རབས་20པའི་ལོ་རབས་80པར། ཁྲིམས་འགལ་ཅན་གྱིས་ཁེ་ཕན་བསམ་ནས་ཨ་ཆེན་གངས་རྒྱབ་ཏུ་ཡོང་ནས་ཁྲིམས་འགལ་ངང་རྔོན་བརྒྱབ་པས། གཙོད་ཀྱི་ཁ་གྲངས་ནི་དེ་སྔའི་གཙོད་འབུམ་2ནས་ཁྲི་2བར་ཉུང་དུ་ཕྱིན། ཕྱོགས་ཁག་གིས་ལོ་མང་རིང་བསྟུད་མར་སྲུང་སྐྱོང་བྱས་པར་བརྒྱུད། ཨ་ཆེན་གངས་རྒྱབ་ཀྱི་གཙོད་ཀྱི་ཁ་གྲངས་ནི་ད་ལྟའི་ཁྲི 7 བར་སླར་གསོ་བྱུང་ཡོད།
“ཨ་ཆེན་གངས་རྒྱབ་ནི་མིག་སྔར་འཛམ་གླིང་ཐོག་གདོད་མའི་སྐྱེ་ཁམས་ཁོར་ཡུག་ཆ་ཚང་པོར་ཉར་བའི་ས་ཁུལ་ཅིག་ཡིན་ལ། མཐོ་སྒང་གི་རི་སྐྱེས་སྲོག་ཆགས་ཀྱི་དག་པའི་ཞིང་ཁམས་ཀྱང་ཡིན།”ཅེས་བསོད་ནམས་དར་རྒྱས་སྲུང་སྐྱོང་ས་ཚུགས་ཀྱི་རི་སྐོར་རུ་མི་རྡོ་རྗེ་ཚེ་རིང་གིས་སྲུང་སྐྱོང་ས་ཚུགས་ཀྱི་ས་བཀྲ་ལ་མཛུབ་མོ་བསྟན་ནས་དེ་ལྟར་བཤད།
