མངྒ་ལཾ་སྭ་སྟི་བྷ་ཝནྟུ། མཚུངས་མེད་བླ་མ་མཆོག་ལ་གུས་བཏུད་ནས། །གླ་ཕི་དམ་པ་གནས་ཞེས་གྲགས་པ་འདིའི། །བྱུང་བ་མདོ་བསྡུས་གུས་ལྡན་སྤྲོ་བསྐྱེད་ཕྱིར། །ཅུང་ཟད་བརྗོད་ལ་ཤེས་ལྡན་རྣ་བར་བློགས། །དེ་ཡང་འཛམ་བུས་མཚན་པའི་གླིང་མཆོག་འདིར། །གནས་ཆེན་ཉེར་བཞི་ཡུལ་ཆེན་སོ་གཉིས་ཞེས། །བདེ་མཆོག་འཁོར་ལོའི་སྤྲུལ་པའི་དཀྱིལ་འཁོར་དུ། །ལྷུན་གྱིས་གྲུབ་ཅིང་རྣལ་འབྱོར་ལྡན་རྣམས་ཀྱིས། །སྤྱོད་པ་སྐྱོང་བའི་གནས་ཀྱི་ཁྱབ་པས་ན། །འདི་ནི་ཉེ་བའི་མཐུན་སྤྱོད་ཙ་རི་ཏྲའི། །གནས་དང་ཉེ་འབྲེལ་ཁ་བ་དཀར་པོ་ཡི། །ཡན་ལག་ཉིད་དུ་དོན་གྱིས་ཐོབ་པའི་ཕྱིར། །བདེ་མཆོག་དང་ནི་ཕག་མོ་ཞལ་གཉིས་མའི། །རང་བྱོན་ཡོད་ཅེས་སྔོན་ནས་ཡུལ་འདིར་གྲགས། །གནའ་བོའི་གྲུབ་ཆེན་དམ་པ་སངས་རྒྱས་ཀྱང་། །གནས་འདིར་བྱོན་ཞིང་བྱིན་གྱིས་བརླབས་པ་ཡིན། །ལོ་རྒྱུས་འགའ་ཞིག་རྒན་པོ་རྣམས་ལས་ཐོས། །གཏམ་དེར་ངེས་པའི་མཚན་མ་ཅི་འདྲ་ཡང་། །ཏ་མོ་ཙུ་གསི་ཞེས་གྲགས་འཕགས་ཡུལ་གྱི། །གྲུབ་ཆེན་ཙཱི་ནའི་ཡུལ་དུ་བྱོན་པ་དེ། །འདིར་བྱོན་ཚེ་ན་ཏའི་ལིའི་མི་དཔོན་ཞིག །དད་པ་ཐོབ་ནས་རྗེས་སུ་ལྷགས་པའི་ཚེ། །གྲུབ་ཆེན་རྒྱ་གར་ཡུལ་དུ་རྫུ་འཕྲུལ་གྱིས། །བཞུད་ཟིན་ཕྱག་མཁར་ན་བཟའ་བཞག་མཐོང་ནས། །མཆོད་རྟེན་བཞེངས་པ་ད་ལྟའི་འདི་ཡིན་ཞེས། །དེ་ཡི་སློབ་མ་ཞིག་ཀྱང་ཡུལ་འདི་རུ། །བསོད་སྙོམས་སྤྱོད་ཅིང་རྫུ་འཕྲུལ་མང་བསྟན་ནས། །རིང་ཞིག་བཞུགས་ཏེ་མྱ་ངན་འདས་པ་ཡི། །མཆོད་རྟེན་གཡོན་ཕྱོགས་ཡོད་པ་འདི་ཡིན་ཞེས། །གཏམ་དུ་གྲགས་པ་བདེན་དུ་རུང་སྙམ་ཞེས། །དམ་པ་ཏ་མོ་གང་ཟག་གཅིག་གྱུར་ན། །དམ་པའི་གནས་སུ་གྲགས་པའང་དོན་དང་ལྡན། །དེ་ལྟ་ཉིད་ན་དམ་པ་སངས་རྒྱས་དང། །ཀརྨ་པ་གཉིས་ཐུགས་རྒྱུད་གཅིག་པའི་ཕྱིར། །གནས་འདི་ཀརྨ་པ་ཡིས་བྱིན་བརླབས་པས། །འབྲི་གུང་ཕག་མོ་ཞབས་དྲུག་གཟིགས་སྣང་དུ། །བྲག་ངོས་ཞྭ་ནག་དང་བཅས་ཀརྨ་པའི། །རང་བྱོན་གསལ་ཅེས་གསུང་བའང་ཤིན་ཏུ་འཐད། །སྤྱིར་ནི་རི་རྩེ་མཐོ་ཞིང་ཕྱོགས་ཡངས་པས། །
ལྷག་མཐོང་སྒོམ་པའི་གནས་སུ་བཟང་བ་དང་། །ནགས་ཚལ་སྟུག་ཅིང་བསིལ་དྲོད་སྙོམས་པ་ཡིས། །ཞི་གནས་སྒོམ་པའི་གནས་སུ་བཟང་བ་དང་། །མཐུན་རྐྱེན་རྙེད་སླ་འགལ་རྐྱེན་ཉུང་བ་ཡིས། །མ་ལུས་དམ་ཆོས་བསྒྲུབ་ཏུ་བཏུབ་པ་དང་། །རྩ་བ་རྒྱས་པའི་རི་རྒྱུད་རིང་ལྡན་ཕྱིར། །ཆོས་བརྒྱུད་རིང་དུ་གནས་ཤིང་བརྟན་པ་དང་། །མདུན་དུ་ཆུ་བོ་ཆེན་པོ་གཉིས་འདུས་ཕྱིར། །དབྱེན་སྦྱོར་མི་ནུས་ཐབས་ཤེས་འབྲེལ་བ་དང་། །ཕྱོགས་ཀྱི་རི་རྣམས་ཁེངས་ཚུལ་མི་ལྡན་པས། །ཆེན་པོ་རྣམས་ཀྱིས་རྟག་ཏུ་འདུད་པ་སོགས། །དཔྱད་ཀྱི་ལེགས་དགུ་མ་ལུས་རབ་ཏུ་ཚང། །གཞན་ཡང་དམ་པ་དང་ནི་ནག་ཆུང་གི །ཕྱག་ཞབས་རྗེས་དང་ཚེ་ཆུ་སྒྲུབ་ཆུ་སོགས། །ཤིན་ཏུ་མང་བར་གྲུབ་ཅིང་གྲགས་མོད་ཀྱི། །ཕག་མོ་ཞབས་དྲུང་གིས་མཛད་གནས་ཡིག་ཏུ། །གསལ་དང་སྐྱེ་བོ་རྣམས་ལའང་གྲགས་པའི་ཕྱིར། །ཤེས་འདོད་དེ་དག་རྣམས་ལས་རྟོགས་པར་གྱིས། །དེས་ན་གནས་འདིར་མཆོད་བསྟོད་ཕྱག་བསྐོར་དང་། །བསྙེན་སྒྲུབ་ལ་སོགས་བགྱིད་པའི་སྐྱེ་བོ་རྣམས། །དགེ་ལེགས་བསམ་པ་ཡིད་བཞིན་འགྲུབ་གྱུར་ཞིང་། །ཆོས་སྤྱོད་ལེགས་པའི་འབྲས་བུ་མྱུར་དུ་སྨིན། །སྡིག་སྒྲིབ་ཉེས་ལྟུང་ནད་གདོན་བར་ཆད་ཞི། །
གླ་ཕི་དམ་པའི་གནས་ཀྱི་རྡོ་རིང་།