ཕྱོགས་བཞི་མཚམས་བརྒྱད་ནས་ཡོང་བའི་ཚོང་པ་མང་པོ་ཞིག་གིས་ཉེ་བའི་ལོ་འགའ་ཡི་རིང་ལ་ཡང་ཚོང་ལས་གསར་པ་ཞིག་རྙེད་འདུག་པ་དེ་ནི་ཆུ་ནང་གི་ཉ་དང་འབུ་ཕྲན་མང་པོ་བཟུང་སྟེ། ཚོང་ར་ནས་འཚོང་བཞིན་འདུག བོད་མི་ཚོས་རྒྱུན་དུ་ཚོང་ར་དེ་ལས་ཉ་དང་འབུ་ཕྲན་སོགས་ཀྱི་སྲོག་བླུས་ཏེ་ཆུའི་ནང་དུ་གཏོང་བཞིན་འདུག
ཉིན་ཞིག ཨ་ཁུ་ཚེ་རིང་གིས་ཀྱང་ཚོང་ར་ནས་ཉ་འགའ་བླུས་ཏེ་ཉེ་འགྲམ་ཆུའི་ནང་དུ་གཏོང་གྲབས་བྱེད་དུས། གྲྭ་པ་ཞིག་གིས"ཨ་ཁུ། ཁྱེད་ཀྱིས་ཉ་འདི་དག་ད་ལྟ་ཆུ་ནང་དུ་བཏང་ན་ཡང་། སང་ཉིན་ཁོ་ཚོས་སླར་ཡང་བཟུང་ཏེ་འདི་ནས་བཙོང་ངེས་རེད། དེ་ལས་རང་ཁྱིམ་གྱི་ཁྲོན་པའི་ནང་དུ་གསོས་ན་མི་ལེགས་སམ"ཟེར་བས། ཁོས་ཀྱང་བདེན་པ་སྙམ་ནས་རང་ཁྱིམ་གྱི་ཁྲོན་པའི་ནང་དུ་བཏང་། དེ་ནས་ཁོ་རང་ཡིད་ཚིམ་པའི་སྒོས་ལུག་ཤ་རྐང་ཡ་ཞིག་ཁྱེར་ཡོང་ནས་ཉ་ལ་སྟེར་རྩིས་བྱས། ཆུང་མས"ཨ། ཚེ་རིང་། ད་སྐབས་ང་ཚོ་མི་ལ་ཤ་བཟའ་རྒྱུ་དེ་འདྲ་མེད་དུས། ཉ་ལ་དེ་ཙམ་སྟེར་རྒྱུ་ག་ལ་ཡོད།"ཅེས་མ་རངས་པར་བཤད། ཚེ་རིང་ཅུང་ཁྲོས་ནས་ཟེར་རྒྱུར"འོ་ན། འདྲེ་མོ་ཁྱོད་ཀྱིས་ཉ་འདི་ཚོ་ལྟོགས་ནས་འཆི་རུ་འཇུག་རྒྱུ་ཡིན་ནམ"སྐབས་དེར། སྤྱང་གྲུང་ལྡན་པའི་བུ་ཆུང་ཉི་མས"ཨ་ཕ། ཨ་མ། དེ་འདྲའི་སེམས་ཁྲལ་བྱེད་དགོས་དོན་ཅི་ཡོད། ད་ཅི་ཚོང་རའི་ནང་དུ་ཉ་འབུ་མང་པོ་བཙོང་རྒྱུ་ཡོད་པ་མ་ཡིན་ནམ"ཟེར་བས། ཨ་ཁུ་ཚེ་རིང་གི་གདོང་ལ་སླར་ཡང་འཛུམ་མདངས་ཤིག་ཤར་ནས། "རེད། རེད། ངའི་བུ་འདི་རིག་པ་གྲུང་པ་ལ་ལྟོས་དང"ཟེར་བཞིན། བུ་ཆུང་ཉི་མ་ཉ་འབུ་ཉོ་བར་བཏང་། ཡུད་ཙམ་འགོར་རྗེས། ཉི་མས"ད་ལྟ་ཚོང་ར་ན་ཉ་འབུ་བཙོང་རྒྱུ་མི་འདུག"ཟེར་ནས་ཚུར་སླེབས་འདུག ཨ་ཁུ་ཚེ་རིང་གིས་མགོ་བོ་བཏེགས་ཏེ་གནམ་ལ་ལྟ་བཞིན་བསམ་བློ་ཞིག་བཏང་རྗེས་ཉི་མ་ལ། "བུ། ཁྱོད་རྒྱུན་དུ་ཆུ་འགྲམ་དུ་འགྲོ་རྒྱུ་དགའ་པོ་ཡོད། དེ་རིང་གནམ་ངོ་ཡང་ཡག་པོ་འདུག ཁྱོད་ཀྱིས་ནུ་མོ་ཁྲིད་ནས་སོང་སྟེ། ཉ་འབུ་མང་ཙམ་བཟུང་ནས་མྱུར་དུ་ཁྱེར་ཤོག"ཟེར་ནས་ཉ་འབུ་འཛིན་པར་བཏང་རྗེས། ལག་གི་ཕྲེང་བ་འདྲེན་བཞིན་སླར་ཡང་མ་ཎི་ཡིག་དྲུག་གི་དབྱངས་རྟ་ངག་ནས་གྱེར་རོ།
།རྩོམ་སྒྲིག་འགན་འཁུར་བ། ཀུན་ཁྱབ། བསྟན་པ་ཡར་རྒྱས།
