ཁམས་ཉག་རོང་དུ་བོད་ཟླ་བཅུ་གཉིས་པའི་ཚེས་བཅུ་གསུམ་ཉིན་དེ། ལོ་སྐོར་ཟླ་བ་བཅུ་གཉིས་ཀྱི་ནང་ཚན་དུས་ཆེན་ཆེས་ཆེ་བ་ཞིག་ཏུ་བརྩིས་ནས་ཟབ་རྒྱས་སུ་རོལ་བ་སྟེ། རྒྱའི་ལོ་སར་དང་བོད་ཀྱི་བཅུ་གསུམ་ཞེས་དེ་ལས་ཆེ་བའི་དུས་ཆེན་མེད་པར་བཤད། ཉག་རོང་དུ་བཅུ་གསུམ་གྱི་དུས་ཆེན་རོལ་ཅིང་། དུས་ཆེན་འདི་ལོ་སར་དུ་བརྩི་བའི་སྲོལ་འདི་ཇི་ལྟར་བྱུང་བའི་སྐོར་ལ་བཤད་ཚུལ་མི་འདྲ་བ་གསུམ་སྣང་སྟེ།
གཅིག་ནི་ཉག་དཔོན་ཨ་མགོན་གྱིས་ཁམས་ཆབ་མདོ་མན་ཆད་དང་ཤར་རྒྱལ་མོ་རོང་ཡན་ཆད་དྲག་པོའི་དཔུང་གིས་དབང་དུ་སྡུད་སྐབས། དམག་ཇུས་ལ་བྲེལ་བས་ལོ་སར་བོད་ཟླ་བཅུ་གཉིས་པའི་ཚེས་བཅུ་གསུམ་དུ་སྔ་སྣུར་བྱས། དེ་ནས་ཡུལ་གཞན་དུ་དམག་དྲངས་པས་གཡུལ་ལས་རྣམ་པར་རྒྱལ་པས་གོང་གི་ཟླ་ཚེས་དེ་བརྩི་མི་དགོས་པའི་གཟའ་སྐར་བཟང་པོར་བརྩིས་ཏེ་དུས་ཆེན་རོལ་བའི་སྲོལ་བྱུང་ཚུལ།
གཉིས་ནི་ལྕགས་མདུད་ཤེས་རབ་རྒྱ་ཚན་དེ་ཉིད་མཁས་དང་གྲུབ་པའི་སྙན་པ་ཕྱོགས་མེད་དུ་ཁྱབ་པ་དང་ཉག་སྟོད་སྡེ་བཞིའི་བཀུར་གནས་སུ་གྱུར་པར་བོད་ཟླ་དང་པོར་ལོ་སར་རོལ་ན། ཆོ་འཕྲུལ་ཆེན་པོའི་ཟླ་བའི་ནང་བཤས་མང་པོ་བཤའ་བར་དགོངས་ཏེ་ཟླ་བ་སྔ་མའི་གཟའ་སྐར་ཤིན་ཏུ་དགེ་བའི་ཚེས་བཅུ་གསུམ་ཉིན་ལོ་སར་སྔ་སྣུར་བྱས་པ་ལས་དུས་ཆེན་རོལ་བའི་སྲོལ་བྱུང་ཚུལ།
གསུམ་ནི་ཁམས་ཉག་རོང་ནི་སྔོན་ཁྲ་མོ་གླིང་གི་ས་ཆ། འབྲུ་དགའ་བདེ་ཆོས་སྐྱོང་བེར་ནག་གི་གདན་ས། གྲུབ་བརྙེས་ཀྱི་རིག་འཛིན་བར་མ་ཆད་པར་འབྱུང་བའི་རོང་ཆེན་ཏེ། གླིང་རྗེ་གེ་སར་རྒྱལ་པོ་དེ་ཉིད་ཀྱིས་ཕྱོགས་བཞིའི་དགྲ་བཞི་བཏུལ། ནག་པོ་བདུད་དང་སེར་པོ་ཧོར། སྨུག་པོ་འཇང་ལ་སོགས་པའི་ཡུལ་ཐམས་ཅད་དུ་སངས་རྒྱས་ཀྱི་བསྟན་པ་ཉི་འོད་བཞིན་ཁྱབ་པར་མཛད་དེ། མི་ཡུལ་གྱི་འགྲོ་དོན་རེ་ཞིག་རྫོགས་ནས་ལྷ་ཡུལ་དུ་གཤེགས་ཁར་བོད་ཟླ་བཅུ་གཉིས་པའི་ཚེས་བཅུ་གསུམ་ཉིན། གླིང་དཀར་སྟོད་སྨད་ཐམས་ཅད་དགའ་སྟོན་གྱི་དཔལ་ལ་རོལ་བས། དེར་རྗེས་དྲན་གྱི་ཆེད་དུ་སྲོལ་འདི་ཚུགས་པ་ཡིན་ཚུལ་གྱི་ངག་རྒྱུན་དུ་ཡང་སྣང་ངོ་།
བཅུ་གསུམ་རོལ་བའི་དུས་བཟའ་བཅའ་བཏུང་གསུམ་གྱི་རིགས་དང་རྒྱན་གོས་གཟབ་མཆོར་སྤྲས་སྟངས། རྟའི་བང་རྩལ་འགྲན་སྟངས་སོགས་ནི་བོད་ཡུལ་སྤྱི་དང་འདྲ། ཡུལ་ལྷ་གཞི་བདག་མཆོད་བསྟོད་ཀྱི་སྟ་གོན་ལ། བསང་ཤིང་། བསང་རྫས། དཀར་གསུམ་མངར་གསུམ་གྱི་ཕྱེ་མར། ཇ་ཕུད། ཆང་ཕུད། འོ་ཕུད། ལ་བཙས་གསོ་བྱེད་ཀྱི་རྒྱལ་མཚན་རྩེ་མོ་སོགས་ཀྱི་རླུང་རྟ་སྣ་ཚོགས། གཞི་བདག་གི་སྐོང་རྫས་ཤིང་ལས་གཞོག་པའི་མདའ་གཞན་ན་མ་དར་བའི་སྲང་ཤིང་ཞེས། ཤིང་སྟག་པའི་ཡལ་ག་འདམ་དོ་ཙམ་གྱི་ཡུ་བ་ཅན་ཡལ་ག་མང་པོ་ཡོད་པར་ཁབ་ཀྱིས་བུ་ག་གཏོར་པར་བྱ་དཀར་གྱི་སྒྲོ་ཡིས་བརྒྱན་པ། ཀླུ་མཆོད་སོགས་ལ་མཁོ་བའི་བལ་མཚོན་དང་དར་ཕྲེང་སྒོ་དར་རྣམས་སོ། །
